У Палаце прадстаўнікоў абмеркавалі будучыню партыі «Белая Русь»

У краіне працягваецца плённая работа над умацаваннем Беларускай партыі «Белая Русь». Актыўны ўдзел у гэтым працэсе прымаюць і дэпутаты. Члены Палаты прадстаўнікоў разам са старшынёй грамадскага аб’яднання «Белая Русь» Алегам Раманавым абмеркавалі далейшыя крокі па пабудове партыі і яе ўмацаванні ў грамадска-палітычным жыцці краіны. Вялікае значэнне ў гэтым мае і стварэнне рэгіянальных аддзяленняў партыі. Па словах Алега Раманава, дэпутаты могуць прасоўваць ідэі партыі ў сваіх рэгіёнах. Многія прадстаўнікі дэпутацкага корпуса выказалі жаданне стаць членамі партыі, некаторыя дэпутаты былі ініцыятарамі яе стварэння партыі. 

Алег Раманаў паведаміў, што ўнутрыпалітычны савет партыі будзе дыферэнцыраваны. «Мы прапануем нашым калегам членства ў камісіях па адпаведных напрамках. Акрамя таго, партыя будзе рэалізоўваць праекты рознай накіраванасці. І праз праектную работу мы будзем імкнуцца да дасягнення тых мэт, якія закладзены ў праграме», — адзначыў ён. Алег Раманаў падкрэсліў, што ідэі, закладзеныя ў Статут партыі неабходна давесці да ўсіх слаёў беларускага грамадства. І дэпутаты могуць зрабіць гэта лепей за ўсіх. 
Старшыня грамадскага аб’яднання расказаў, што зараз праводзіцца актыўная зверка дадзеных, якія прадстаўлены заснавальнікамі. Адпрацоўваюцца падпісныя лісты, якія даслалі з рэгіёнаў. Гэтая работа зойме яшчэ каля тыдня. Па словах Алега Раманава, да канца наступнага тыдня яна будзе завершана і поўны пакет дакументаў будзе пададзены ў Міністэрства юстыцыі для праверкі і рэгістрацыі. 

Старшыня Пастаяннай камісіі па дзяржаўным будаўніцтве, мясцовым самакіраванні і рэгламенце Палаты прадстаўнікоў Валянцін Семяняка падкрэсліў, што стымулам да актывізацыі партыйнага будаўніцтва і аб’яднання задровых палітычных сіл для ўдзелу ў дзяржаўным будаўніцтве сталі выніку рэферэндуму 2022 года і наступныя за ім заканадаўчыя пераўтварэнні. Вялікую ролю ў гэтым працэсе адыгралі і прыняцце законаў аб асновах грамадзянскай супольнасці, змяненне Выбарчага кодэкса і іншых заканадаўчых актаў, якія і фарміруюць аснову для дзейнасці палітычных партый. «У сувязі з гэтым з’яўленне новых партый, актывізацыя і падрыхтоўка да перарэгістрацыі дзеючых — гэта працэс, які дазваляе актывізаваць найлепшыя сілы грамадства на цывілізаванае заканадаўчае ўрэгуляванне ўдзелу ў палітычным жыцці нашай краіны», — адзначыў парламентарый. Ён нагадаў, што ГА «Белая Русь» у 2004-м годзе ўтварылася ў Гродзенскім рэгіёне. Валянцін Семяняка расказаў, што быў адным з першых членаў арганізацыі, удзельнікам і арганізатарам розных праектаў, якія вельмі добра зарэкамендавалі сябе ў беларускім грамадстве і ў рэгіёнах. Таму, па яго словах, стварэнне партыі на аснове грамадскага аб’яднання — знакавы момант. «Гэта сусветная практыка, калі палітычная партыя ствараецца на базе грамадскага аб’яднання і падсілкоўваецца зыходзячы з дзеянняў аднаго ці некалькіх грамадскіх аб’яднанняў. Гэта цывілізаваны шлях, вельмі правільны і дакладны. І тое, як ідзе гэты працэс, гэта яшчэ раз пацвярджае», — падкрэсліў Валянцін Семяняка.

Член Пастаяннай камісіі па працы і сацыяльных пытаннях Іна Крачак узначальвае пярвічную арганізацыю Аршанскага раённага грамадскага аб’ядання «Белая Русь». Яна расказала, што ў Аршанскім раёне адбыліся ўстаноўчыя сходы, прайшоў устаноўчы з’езд партыі. Па яе словах, маладая партыя выклікае вялікую цікавасць у жыхароў Аршанскага раёна. «Мы спадзяёмся, што гэта партыя стане масавай і людзі будуць не на кухні абмяркоўваць праблемы, якія іх хвалююць, а на партыйных пляцоўках. Партыя павінна стаць вызначальнай палітычнай сілай. У жыхароў Аршанскага раёна ўжо ёсць вялікая цікавасць, і на ўстаноўчых сходах ужо хацелі ўступіць у партыю», — падкрэсліла яна. 

Член Пастаяннай камісіі па заканадаўстве Ірына Даўгала растлумачыла, чаму пытанні партыйнага будаўніцтва цікавяць насельніцтва. Па яе словах, у грамадзян нашай краіны ёсць патрэба бачыць свой удзел у палітычным жыцці грамадства. І тое, што зараз большасць беларусаў з’яўляюцца членамі грамадскага аб’яднання «Белая Русь», і плануюць стаць членамі адпаведнай партыі — таму пацверджанне. 

Валерыя СЦЯЦКО