Вы тут

Героі тыдня — гімнасты, дзюдаісты і веласіпедысты


У традыцыйным аглядзе «Звязды» расказваем самыя цікавыя навіны.


Фота: БелТА.

Героі тыдня. Беларускія спартсмены выступілі на адкрытым чэмпіянаце Расіі па лыжных гонках і біятлоне, які прайшоў у Іжэўску. Бронзавым прызёрам спрынтарскай гонкі на 7,5 кіламетра стаў беларус Васіль Шапцябой, які выступае з атлетам-лідарам Дзмітрыем Будзіловічам. Бронзавы медаль у гонцы на 12,5 кіламетра сярод юнакоў прынеслі біятланіст Кірыл Ражкін і атлет-лідар Мікіта Маслоўскі. На мінулым тыдні ў Ханты-Мансійску прайшоў адкрыты чэмпіянат Расіі па лыжных гонках і біятлоне сярод асоб з паражэннем апорна-рухальнага апарату, на якім прадстаўнікі Беларусі заваявалі пяць узнагарод: тры залатыя і дзве сярэбраныя.

Медалі тыдня. У Хабараўску завяршыліся міжнародныя спаборніцтвы па дзюдо памяці Васіля Ашчэпкава. У турніры ўзялі ўдзел спартсмены з Арменіі, Індыі, Манголіі, Сербіі, Таджыкістана, Расіі і Беларусі. Атлеты разыгралі медалі ў 14 вагавых катэгорыях. У беларускай каманды — пяць медалёў. Сярэбранымі прызёрамі турніру сталі Ксенія Даніловіч (у вазе да 52 кг) і Ульяна Мінянкова (да 57 кг), бронзавымі прызёрамі — Яна Макрэцкая (да 63 кг), Дар'я Канцавая (да 78 кг) і Ягор Кухарэнка (звыш 100 кг). Гэты турнір стаў першым стартам у серыі Russіan Judo Tour, наступным этапам розыгрышу будзе Кубак губернатара Чалябінскай вобласці, які пройдзе 24 і 25 чэрвеня.

Лічба тыдня. Дзевяць медалёў заваявалі беларусы на міжнародных спаборніцтвах па веласпорце на трэку Sіlk Road Namangan ІІ, якія адбыліся ва Узбекістане. Турнір прайшоў пад эгідай Міжнароднага саюза веласіпедыстаў (UCІ), удзел у ім узяло больш як 60 спартсменаў з Беларусі, Узбекістана, Расіі, Казахстана і Ганконга. Двухразовым пераможцам «Шаўковага шляху Намангана» стаў беларус Раман Цішкоў. Спачатку ён перамог у омніуме, а затым у пары з Дзянісам Мазурам выйграў мэдысан.

Таксама «золата» турніру дасталася беларусам Раману Раманаву (гонка па ачках) і Караліне Бірук (скрэтч). Караліна Бірук стала трохразовым бронзавым прызёрам турніру: у омніуме, у гонцы з выбываннем і ў мэдысане ў тандэме з Анастасіяй Колесавай. Анастасія Колесава таксама заваявала сярэбраны медаль у асабістай гонцы на вылет. Яшчэ адным беларускім мультымедалістам стаў Дзяніс Мазур, які заваяваў «серабро» ў гонцы з выбываннем і «бронзу» ў скрэтчы.

Турнір тыдня. Беларускія біятланісты выступілі на адкрытым чэмпіянаце Расіі. У мужчынскай эстафеце Мікіта Лабастаў, Дзмітрый Лазоўскі, Ілья Аўсеенка і Антон Смольскі занялі трэцяе месца. Каманда «Беларусь-2» у складзе Сцяпана Данілава, Паўла Бялько, Аляксандра Кошына і Івана Тулаціна заняла 7-е месца сярод 15 калектываў. Лідар мужчынскай зборнай Антон Смольскі стаў сярэбраным прызёрам гонкі з масавым стартам.

Поспех тыдня. У Екацярынбургу прайшлі міжнародныя спаборніцтвы па спартыўнай гімнастыцы «Гульні выкліку легендаў». У мужчынскіх спаборніцтвах Мікіта Парфяновіч у практыкаваннях на кані заваяваў «золата», у вольных практыкаваннях, а таксама на брусах і перакладзіне — бронзавыя медалі. Даніла Грыгарчук стаў бронзавым прызёрам на кольцах і ў апорным скачку. У юніёрскіх спаборніцтвах Багдан Ільінкоў у практыкаваннях на перакладзіне заваяваў «золата» і «бронзу» ў практыкаваннях на кані, кольцах, апорным скачку і брусах. Антон Калтунчык заняў трэцяе месца ў вольных практыкаваннях і перакладзіне.

Аб'ява тыдня. Выканаўчы камітэт Міжнароднай федэрацыі настольнага тэніса (ІTTF) падтрымаў рашэнне МАК аб допуску спартсменаў з Беларусі і Расіі да спаборніцтваў у якасці нейтральных атлетаў. Пра гэта паведамляе прэс-служба ІTTF. «Выканаўчы камітэт Міжнароднай федэрацыі настольнага тэніса ўхваляе нядаўнюю заяву Міжнароднага алімпійскага камітэта адносна статусу спартсменаў з расійскім або беларускім пашпартам у міжнародных спаборніцтвах. Настольны тэніс мае вялікую гісторыю аб'яднання людзей, нават калі палітычныя сувязі былі яшчэ больш кволыя, узводзіць масты, якія вядуць да лепшага паразумення паміж народамі, і адчыняе дзверы для ўмацавання міру, чаго не могуць зрабіць ізаляцыя і падзел.

Стаўпом алімпійскага руху была і застаецца аўтаномія, якой павінны валодаць спартыўныя арганізацыі. Яны нясуць аднаасобную адказнасць за прыняцце рашэння аб тым, якія гульцы могуць удзельнічаць у міжнародных спаборніцтвах, зыходзячы з іх спартыўных дасягненняў, а не па палітычных матывах або з-за іх пашпартоў. Адзначаючы гэта, ІTTF падтрымлівае допуск гульцоў з Беларусі і Расіі да міжнародных спаборніцтваў па настольным тэнісе, якія арганізоўваюцца Міжнароднай федэрацыяй настольнага тэніса, але на строгіх умовах нейтралітэту. Калі яны будуць выкананы, беларускія і расійскія спартсмены змогуць выступаць на турнірах ужо ў маі. Яны не возьмуць удзел у чэмпіянаце свету ў ПАР з 20 па 28 мая, паколькі кваліфікацыя на яго ўжо завершана», — адзначаецца ў заяве.

Валерыя СЦЯЦКО

Выбар рэдакцыі

Грамадства

 Для чаго Аляксей Хомчык стаў урачом?

Для чаго Аляксей Хомчык стаў урачом?

«Дзядзька Васіль загінуў, ты павінен працягнуць яго справу. Ты добра вучышся, павінен стаць доктарам».

Грамадства

Буякі, суніцы і лісічкі — прыцэньваемся да падарункаў чэрвеня

Буякі, суніцы і лісічкі — прыцэньваемся да падарункаў чэрвеня

«Ёсць і імпартныя, іспанскія — яны па-ранейшаму ў раёне 70 рублёў за кіло, 30 рублёў — кантэйнер».

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.