Наперадзе нас чакае не толькі павелічэнне тэмпературы да 21 градуса, але і дажджы

Трэцяя дэкада красавіка працягвае радаваць жыхароў нашай краіны сонечным і не па сезону цёплым надвор'ем. У апошнія дні сярэднясутачная тэмпература паветра знаходзіцца ў межах ад плюс 10 да плюс 13 градусаў, што вышэй на 2—6 градусаў ад сезоннай нормы. Гэтай вясной пашанцавала і з дажджамі, таму што за 19 дзён красавіка на большай частцы тэрыторыі Беларусі ападкаў выпала ад 34 % да 91 % нормы дадзенага перыяду, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

Будзе цудоўнае надвор'е і ў найбліжэйшыя пару дзён, лічаць сіноптыкі. Да канца гэтага тыдня высокі ціск працягне ўтрымліваць свае пазіцыі і забяспечыць на тэрыторыі краіны сонечнае, цёплае і без істотных ападкаў надвор'е. І будзе ўсё цяплей і цяплей...

У пятніцу будзе без ападкаў. Максімальная тэмпература паветра ад плюс 13 да 19 цяпла. У суботу таксама чакаецца пераважна без ападкаў. Уначы тэмпература паветра будзе ў межах ад плюс 2 да плюс 9 градусаў, удзень — ад плюс 14 да плюс 19 градусаў.

Выключна сонечна будзе і ў нядзелю, калі прагназуецца пераважна без ападкаў. Уначы слупок тэрмометра пакажа плюс 2—9 градусаў, удзень — плюс 16—21 градус.

Як адзначылі спецыялісты Белгідрамета, цёплым чакаецца і пачатак наступнага тыдня. Пры гэтым калі ноччу ў зоне павышанага атмасфернага ціску абыдзецца пераважна без ападкаў, то ўжо ўдзень у няўстойлівай паветранай масе чакаюцца лакальныя кароткачасовыя дажджы, месцамі не выключаны навальніцы.

Згодна з папярэднім прагнозам айчынных сіноптыкаў, у панядзелак уначы будзе пераважна без ападкаў, днём месцамі па краіне пройдуць кароткачасовыя дажджы, магчымыя навальніцы. Тэмпература начнога паветра будзе вагацца ад плюс 3 да плюс 10 градусаў. Днём паветра прагрэецца да 15—21 цяпла.

У аўторак характар надвор'я пачне змяняцца і цяпло будзе пакідаць межы нашай краіны. Ноччу месцамі, днём на большай частцы тэрыторыі краіны прагназуюцца кароткачасовыя дажджы. У дзённыя гадзіны ў асобных раёнах навальніцы. Уначы чакаецца плюс 3—10, удзень — плюс 10—17 градусаў. Месцамі тэмпература павысіцца да 20 градусаў цяпла.

Злёгку сапсуе цёплы графік будучая серада. У гэты дзень на большай частцы тэрыторыі краіны пройдуць кароткачасовыя дажджы, у дзённыя гадзіны па ўсходзе магчымыя навальніцы. Тэмпература паветра ноччу будзе вагацца ад плюс 1 градуса на захадзе да плюс 10 градусаў на ўсходзе краіны. Днём тэмпература паветра апусціцца да плюс 7—14 градусаў, у паўднёва-ўсходніх раёнах да плюс 16 градусаў.

Нічога страшнага, наперадзе май.

Сяргей КУРКАЧ