У Савет Рэспублікі звярнуліся жыхары многіх рэгіёнаў краіны. Традыцыйна грамадзян хваляваў самы шырокі спектр пытанняў, звязаных з сацыяльнай адаптацыяй дзяцей-інвалідаў, жыллёва-камунальнай гаспадаркай, землекарыстаннем, падаткаабкладаннем, будаўніцтвам, паляпшэннем жыллёвых умоў. Прасілі і аб дапамозе ў працаўладкаванні, цікавіліся магчымасцю вярнуць статус малалетняга вязня, скардзіліся на шум машын за акном і ўздымалі пытанне выхавання моладзі ў духу традыцыйных маральных каштоўнасцяў.
Спынімся на звароце, які быў непадобны на ўсе іншыя.
Прыехаць на прыём з Добруша Наталлю Краўцову прымусіла хвароба яе маленькай дачкі. Дзяўчынцы нядаўна споўнілася два гады, і яна мае патрэбу ў вельмі дарагім лячэнні. Маленькая Віка — адна з тых нямногіх дзяцей у нашай краіне, у якіх дыягнаставана спінальная мышачная атрафія другога тыпу. Каб спыніць развіццё захворвання, дзяўчынцы патрэбна адна ін'екцыя прэпарату замежнай вытворчасці. У сям'і няма такіх грошай, каб набыць адзін з самых дарагіх прэпаратаў у свеце. З просьбай аб дапамозе мама дзяўчынкі звярнулася ў Савет Рэспублікі.
Наталля Качанава ўважліва выслухала жанчыну і сказала, што ў курсе гэтага пытання і ўвогуле такой праблемы, як спінальна-мышачная атрафія. Спікер верхняй палаты парламента пацікавілася ў намесніка міністра аховы здароўя, які прысутнічаў на прыёме, колькі такіх дзяцей у краіне маюць патрэбу ў дапамозе і колькі грошай каштуе адна такая ін'екцыя. Сума — немалая. Аднак калі кожны, па словах Старшыні Савета Рэспублікі, ахвяруе хоць бы некалькімі рублямі, то з'явіцца магчымасць дапамагчы гэтым дзецям.
У прыватнасці, неабыякавыя да чужой бяды грамадзяне могуць пералічыць сродкі на дабрачынны рахунак, адкрыты Беларускім саюзам жанчын. Збор сродкаў для набыцця лекаў для дзяцей з жыццёвапагражальнымі захворваннямі, у тым ліку СМА, ажыццяўляецца па наступных рэквізітах: УНП 100094859, дабрачынны рахунак — BY05 AKBB 3135 0000 1234 5000 0000 у ААТ «АСБ «Беларусбанк», БИК AKBBBY2X. Дабрачынны рахунак у «Беларусбанку» адкрыты і на імя маці дзяўчынкі Наталлі Віктараўны Краўцовай.
Як расказаў намеснік міністра аховы здароўя Юрый Горбіч, у цяперашні момант у Беларусі двое дзяцей да двух гадоў, якія трапляюць пад крытэрыі прэпарату, што адносіцца да геннай тэрапіі. Вікторыя — трэцяе дзіця, якому яшчэ можна дапамагчы. Нягледзячы на тое што дзяўчынцы ўжо споўнілася два гады (эфектыўнасць прэпарату даказана для прымянення ў дзяцей да двух гадоў), яна важыць да 13 кілаграмаў, што таксама абумоўлена яго ўвядзеннем. Іншым дзецям з такім дыягназам (іх у Беларусі каля ста) аказваецца падтрымлівальная тэрапія. Як расказаў Юрый Горбіч, пакуль гэта ажыццяўляецца за кошт спонсарскіх сродкаў. Аднак Міністэрствам аховы здароўя прапрацоўваецца механізм дапамогі, якая будзе аказвацца за бюджэтныя сродкі.
Старшыня Савета Рэспублікі падрабязна распытала заяўніцу аб тым, як у дзяўчынкі пачалося захворванне, у якім стане яна знаходзіцца ў цяперашні час. Таксама пацікавілася, ці ёсць у жанчыны яшчэ дзеці і ці здаровыя яны. Наталля Краўцова расказала, што яна шматдзетная маці. Двое старэйшых дзяцей, на шчасце, праблем са здароўем не маюць. Калі нарадзілася малодшая, Вікторыя, нічога не прадвяшчала бяды. Аб страшным дыягназе бацькі даведаліся, калі дзяўчынка спрабавала зрабіць свае першыя крокі.
Наталля Качанава паабяцала, што будзе зроблена ўсё магчымае, каб закупіць лекі для дзяўчынкі і іншых дзетак, хворых на СМА. «Зробім усё, што ад нас залежыць», — запэўніла яна заяўніцу і адразу падчас прыёму дала шэраг даручэнняў Міністэрству антыманапольнага рэгулявання і гандлю, а падчас невялікага перапынку зрабіла рад званкоў дырэктарам буйных прадпрыемстваў з просьбай ахвяраваць некаторую суму на лячэнне хворага дзіцяці.
Пасля прыёму ў Савеце Рэспублікі Наталля Краўцова падзялілася, што верыць у тое, што атрымаецца сабраць патрэбную суму і яе дачка абавязкова будзе жыць. «Я сыходжу з самымі прыемнымі ўражаннямі, — адзначыла жанчына. — Наталля Іванаўна вельмі ўважліва і добразычліва мяне выслухала, сама абстаноўка спрыяла размове. Спадзяюся, што ўсё будзе добра».
Вераніка КАНЮТА
Фота Віктара ІВАНЧЫКАВА
Мерапрыемства праводзіцца на добраахвотнай аснове.
Не выявіць ні секунды абыякавасці.
