На тэрыторыі Бальшавіцкага сельскага Савета Гомельскага раёна сёлета на святочным канцэрце да Дня Перамогі ўласныя нумары прадставяць мясцовыя дашкаляты. Падрыхтаваць выступленне малым дапамог досвед удзелу ў праекце, унікальным не толькі для іх сельсавета, але і ўсяго раёна. Выхаванцы Бальшавіцкага санаторнага дзіцячага садка, іх сем'і і педагогі сваімі сіламі стварылі музейны пакой памяці ваеннай гісторыі. Гэта першы падобны вопыт, які ажыццявілі ў Гомельскім раёне на базе дашкольнай навучальнай установы.
Чатыры месяцы — ад ідэі стварэння да першай экскурсіі па музейным пакоі... Карпатлівую работу па зборы матэрыялаў для экспазіцый правялі жыхары Бальшавіцкага сельскага Савета, супрацоўнікі санаторнага дзіцячага садка, а таксама бацькі, бабулі і дзядулі выхаванцаў.
— Доўга працавалі над тым, каб сабраць інфармацыю аб родных нашых дзяцей, якія ваявалі ў Вялікую Айчынную вайну, — распавяла галоўная ідэйная натхняльніца стварэння музейнага пакоя, загадчыца Бальшавіцкага санаторнага дзіцячага садка Святлана Балабановіч. — Бацькі выхаванцаў прыносілі фатаграфіі герояў, гісторыі пра іх жыццё, узнагародныя кніжкі. З дакументаў і фота наш калектыў ужо сваімі сіламі рабіў копіі. Каб гэтыя экспанаты выглядалі больш натуральна для музея, мы іх састарвалі.
Пра герояў Вялікай Айчыннай вайны — ураджэнцаў роднага сельсавета або Гомельскага раёна праз фатаграфіі, копіі ўзнагародных кніжак і медалёў расказалі не толькі сем'і выхаванцаў, але і самі педагогі і работнікі дзіцячага садка. Маглі паўдзельнічаць у стварэнні экспазіцыі аб героях і проста ўсе ахвотныя жыхары рабочага пасёлка Бальшавік, спецыялісты дашкольнай адукацыі, якія працавалі ў мінулыя гады.
Адказную задачу па стварэнні макетаў і панарам узялі на сябе супрацоўніцы ўстановы адукацыі — намеснік загадчыка Дар'я Гаўрыленка і дапаможны работнік Галіна Шляхценка.
— Для музейнага пакоя зрабіла макет манумента на плошчы Перамогі ў Мінску, — падзялілася Галіна Шляхценка, якая працуе ў дзіцячым садку з першых дзён яго адкрыцця, ужо больш за трыццаць гадоў.
Аўтары панарам, прысвечаных падзеям і фактам ваеннай гісторыі, — Алена Адамчыкава і Юлія Званцова.
— У найбліжэйшых планах — дапрацаваць кожны макет і панарамы экспазіцый запісанай «агучкай». Каб у музычным суправаджэнні і голасам дыктара ішоў аповед пра канкрэтныя старонкі ваеннай гісторыі, якія мы адлюстравалі ў музейным пакоі, — адзначыла жыхарка рабочага пасёлка Бальшавік, выхавальніца санаторнага дзіцячага садка Алена Адамчыкава.
Памочнік выхавальніка Юлія Званцова ў свой час скончыла мастацкую школу. Яе талент малявання цяпер — нагода для гонару калектыву садка і яго выхаванцаў.
— Паралельна рабоце з макетамі ў вольны ад работы час пісала фрэску на сцяне. Не было першапачатковага эскіза малюнка, а толькі пэўныя вобразы-сімвалы, якія хацелася адлюстраваць. Дарэчы, склаўся цэльны малюнак, не з пэўнай выявы, а з чорнага крумкача, зробленага з прасаванай паперы. А «закальцаваць» гісторыю ад пачатку вайны да Перамогі дапамог вобраз белага голуба як сімвала міру, — падзялілася памочнік выхавальніка Юлія Званцова.
Яе калегі таксама падзяліліся мноствам цікавых нюансаў стварэння музейнага праекта сваімі сіламі. Напрыклад, хоць яны працуюць у сельскай мясцовасці, ім цяжка было знайсці добрае пер'е для макетаў. Пер'е па пошце пераслалі сваякі супрацоўнікаў садка. А вось састарваць фота і копіі дакументаў для музея давялося ў ваннах з кавай. Мох для панарам педагогі збіралі на занятках разам з дзецьмі, пасля рвалі-круцілі матэрыял для афармлення макетаў. Усім калектывам стваралі і адзін з цэнтральных экспанатаў музейнага пакоя — ніцую вярбу. Кожны лісточак уручную выразалі з каляровага палімернага матэрыялу, а ствол дрэва зрабілі са скручаных аркушаў паперы.
— Вярба, як расказваем дзецям, — сімвал смутку па тых, хто выканаў свой воінскі абавязак цаной уласнага жыцця. Але не толькі да дрэва, але і да ўсіх рэчаў-сімвалаў у пакоі дзеці могуць дакрануцца рукамі. Наша ідэя — данесці факты ваеннай гісторыі так, каб малым было зразумела і цікава. Напрыклад, мы зрабілі пано з ілюстрацыяй авіябаёў «начных ведзьмаў». Тлумачым дзецям, што так са страхам фашысты называлі лётчыц легендарнага жаночага савецкага авіяцыйнага палка. Дзеці могуць пабачыць макеты самалёта тых часоў і парашутаў, на якіх дэсантуюцца не людзі, а гваздзікі — кветкі памяці, — расказвае Святлана Балабановіч.
Асобнае месца ў экспазіцыі займаюць матэрыялы, прысвечаныя воінам-інтэрнацыяналістам, падрыхтаваныя Дар'яй Гаўрыленкай.
— Тэматыка патрыятычных заняткаў можа мяняцца. Мы прыдумалі «Чамадан памяці». Гэта сапраўдная рарытэтная рэч, якую можна напоўніць тымі прадметамі памяці, пра якія распавядаем дзецям. Напрыклад, у чамадане ляжыць наручны гадзіннік салдата-героя, — тлумачыць Святлана Балабановіч. — Галоўная ідэя нашага музейнага праекта: каб ваенная гісторыя падавалася не толькі праз вусны аповед, але і праз практычную пазнавальную дзейнасць. Мы як педагогі імкнуліся паказаць дзецям, што вайна — гэта мінулае, якое не павінна паўтарыцца. Няхай толькі на макетах, а не ў рэальным жыцці, давядзецца бачыць, што вайна — гэта дрэнна, цёмна, страшна, разбуральна. Я ўпэўненая, што нашы дзеці, калі пойдуць у школу, ужо шмат будуць ведаць пра ваенную гісторыю.
Сёння музейны пакой санаторнага дзіцячага садка ў Бальшавіку гатовы праводзіць экскурсіі для дашкольнікаў і малодшых школьнікаў з усіх населеных пунктаў Гомельскага раёна, сцвярджае выконваючая абавязкі старшыні Бальшавіцкага сельвыканкама Людміла Клец:
— Уражвае тое, што такі цікавы музейны праект сваімі сіламі ажыццявілі вясковыя жыхары і калектыў сельскай навучальнай установы. На тэрыторыі нашага сельсавета пражывае звыш трох тысяч трохсот чалавек, з якіх амаль 800 — дзеці і моладзь. Працуюць у нас сярэдняя школа і дзве дашкольныя навучальныя ўстановы. Але падобнай асобнай музейнай экспазіцыі ад ваеннай гісторыі да сённяшняга часу ў сельсавеце не было. Музейны пакой санаторнага дзіцячага садка атрымаўся такі, што яму могуць пазайздросціць не толькі многія ўстановы адукацыі, але і ў цэлым сельскія населеныя пункты нашага раёна.
Наталля КАПРЫЛЕНКА
Фота аўтара
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.