Вы тут

Аляксандр Турчын правёў асабісты прыём


Больш як 20 чалавек выслухаў падчас асабістага прыёму ў Вілейцы старшыня Міаблвыканкама Аляксандр Турчын. Да яго звярнуліся не толькі мясцовыя жыхары, але і заяўнікі з Мядзельскага, Смалявіцкага, Лагойскага, Маладзечанскага раёнаў, Мінска. Былі агучаны самыя розныя тэмы — добраўпарадкавання, работы грамадскага транспарту, медыцынскага абслугоўвання, працаўладкавання, рамонту дарог.


Блок пытанняў датычыў электразабеспячэння жылых дамоў для ацяплення і падагрэву вады. Па словах жыхаркі Вілейкі Ніны Лядак, яна звярталася да мясцовых уладаў з просьбай перавесці яе дом на электраацяпленне. Але ёй адказалі, што зрабіць гэта немагчыма па тэхнічнай прычыне — не хапае магутнасцяў размеркавальных сетак. Жанчына расказала, нягледзячы на тое, што печка часта паліцца, у доме холадна. Як растлумачылі спецыялісты, у планах — дом Ніны Лядак падключыць да электрасетак беларускай чыгункі, што дасць магчымасць правесці электраацяпленне ў 2025 годзе. Аляксандр Турчын падказаў, як вырашыць праблему раней. На яго думку, дастаткова ўладкаваць два канвектары.

У Святланы Міхалькевіч і Тамары Барысенка з аграгарадка Ілля такая ж сітуацыя. Жанчыны паскардзіліся, што дазвол на ўладкаванне электраацяплення будзе толькі ў 2025 годзе. Цяпер у доме для падагрэву вады стаіць бойлер, які цягне шмат электрычнасці, за спажыванне якой даводзіцца аддаваць значную частку пенсіі. 

Аляксандр Турчын лічыць, што энергетыкам неабходна паскорыцца, паколькі ў аграгарадку Ілля, дзе пражывае каля 800 чалавек, не падведзены прыродны газ. Кіраўнік цэнтральнага рэгіёна даручыў адпаведным службам у гэтым годзе падрыхтаваць праект рэканструкцыі электрасетак, а ў 2024-м пачаць будаўніцтва. Ён таксама запэўніў заяўніц, што па гэтым пытанні перагаворыць з міністрам энергетыкі. 

Акрамя таго, Святлана Міхалькевіч расказала, што вуліца Школьная, дзе яна пражывае, уся ў выбоінах. Пасля дажджу па ёй ні прайсці, ні праехаць. Дзецям, якія ідуць у школу, даводзіцца скакаць цераз лужыны. Аляксандр Турчын даў даручэнне старшыні райвыканкама выехаць на месца і паглядзець ці неабходна там асфальтаванне.

— Два гады таму змянілі аўтобусны маршрут Нарач-Рацэвічы, аўтобус пусцілі праз вёску Асіпавічы. Маршрут павялічыўся на 14-15 кіламетраў, падаражэў і кошт праезда. Жыхары аграгарадка Нарач не паспяваюць да 9 раніцы на работу ў райцэнтр, — распавяла жыхарка курортнага пасёлка Нарач Ларыса Ігнатовіч. — Разам з тым, праз Рацэвічы курсіруе некалькі аўтобусаў да Вілейкі.
Мэтазгоднасць змянення маршрута аўтобуса прааналізаваная.

Наталля Гайковіч з вёскі Рагозы Маладзечанскага раёна прасіла пасадзейнічаць у даступнасці да тэрапіі спінальна-мышачнай атрафіі (СМА). Яе 45-гадовы сын Сяргей мае гэтае рэдкае генетычнае захворванне з дзяцінства. Ад хваробы дапамагае прэпарат Рысдзіплан, які выпускаюць у Швейцарыі. Але ён вельмі дарагі. У Беларусі на СМА хварэюць 150 дарослых. Яны самі вымушаны купляць лекі. Наталля Гайковіч запытала: ці можна ініцыяваць стварэнне Дзяржаўнага дабрачыннага фонду па аказанні дапамогі людзям з дыягназам СМА.

— Гэтая тэма рухаецца, аднак я не магу сказаць, на якой яна стадыі. Мяркую, такі фонд у нас будзе, — лічыць Аляксандр Турчын.

Жанчына пацікавілася наконт магчымасці выдзялення сродкаў для набыцця прэпарата найбуйнейшымі прадпрыемствамі Мінскай вобласці.

— Буйныя прадпрыемствы Міншчыны ў рэспубліканскім падпарадкаванні. Вобласць не можа ўстанавіць для іх абавязковыя адлічэнні, — адказаў Аляксандр Турчын. — Праблему неабходна вырашаць на дзяржаўным узроўні.

Старшыня Мінаблвыканкама паабяцаў паглыбіцца ў гэтую праблему, вывучыць яе больш дасканала.

Вольга Кабак прасіла аказаць садзейнічанне па цэнтралізаванай дастаўцы пацыентаў у Маладзечанскую бальніцу для гемадыялізу. Такіх хворых у Вілейскім раёне 12. Праз дзень яны самастойна ездзяць у Маладзечна на гэтую працэдуру. Па словах спецыялістаў, для вырашэння гэтага пытання адсутнічае заканадаўчая база. Аляксандр Турчын прапанаваў скарэктаваць аўтобусныя рэйсы, увязаць іх з часам прыёму пацыентаў. А таксама разгледзець пытанне павелічэння кампенсацыі для праезду ў бальніцу.

Алена Грушкоўская з Маладзечна працавала ў мясцовай стаматалагічнай паліклініцы. Ужо некалькі гадоў яна без работы, паколькі кіраўніцтва медыцынскай установы не прадоўжыла з ёй кантракт. Яна прасіла вывучыць гэтае рашэнне на адпаведнасць працоўнаму заканадаўству. Жанчыне прапанавалі ўладкавацца па спецыяльнасці ў Вілейскай бальніцы. Але яна адмовілася, маўляў, далёка ездзіць.
Усе пытанні, агучаныя падчас прыёму грамадзян, узятыя на кантроль.

Таццяна ЛАЗОЎСКАЯ

Фота БелТА

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».