Натарыят ўзнагародзіў журналістаў напярэдадні прафесійнага свята

Пераможцы першага конкурсу «Натарыят і СМІ», абвешчанага летась Беларускай натарыяльнай палатай, атрымалі ўзнагароды з рук старшыні БНП Наталлі Барысенка акурат да свайго прафесійнага свята — Дня друку. Натарыусы штогод заахвочваюць тых, хто дапамагае ў справе прававой адукацыі беларусаў праз газеты, радыё, тэлебачанне і інтэрнэт, аднак спецыяльную ўзнагароду ўручалі ўпершыню.

Натарыус — самы блізкі чалавеку юрыст, які даступны для наведвання, бо ў краіне існуе мноства натарыяльных кантор, а ў апошнія пару гадоў у жыхароў аграгарадкоў яшчэ з’явілася магчымасць запрашаць натарыуса прыехаць адразу дадому да чалавека, таму спецыялісты сталі яшчэ бліжай да людзей. Да таго ж летась павосені была запушчана Адзіная інфармацыйная лінія натарыята, куды пачало паступаць мноства пытанняў, у тым ліку, як запрасіць аўталаўку, што рабіць, калі не прынеслі ў час пенсію... І такіх ненатарыяльных пытанняў да 40 %. І гэта яшчэ адно сведчанне неабходнасці нашай работы, упэўнена Наталля Барысенка:

— Мы заўжды адзначаем, што прававая асвета людзей і своечасовыя тлумачэнні дапамагаюць пазбегнуць многіх праблем. Атрымаць патрэбную інфармацыю можна ўва многіх установах, аднак галоўнае — атрымаць яе своечасова, і мы імкнемся так і рабіць.

Журы конкурса абвясціла галоўных пераможцаў у чатырох намінацыях. Галоўную ўзнагароду ў намінацыі «Найлепшая публікацыя» атрымала Таццяна Грэмяшкевіч, карэспандэнт газеты «Гомельская праўда». «Найлепшую праграму на радыё» стварылі вядучыя праекта «Прававы панядзелак» на Першым нацыянальным канале Беларускага радыё Андрэй Сініца і Настасся Акішава. Пераможца намінацыі «Найлепшая публікацыя ў сетцы Інтэрнэт» — Святлана Васілеўская, рэдактар аддзела галоўнай рэдакцыі інфармацыі «БелТА». «Найлепшы сюжэт (праграму) на тэлебачанні» стварыў творчы калектыў праграм «Вокны горада» і «Бадзёрая раніца» «Тэлерадыёкампаніі «Гродна».

Натарыят — крыху кансерватыўны інстытут, таму натарыусы павінны валодаць асаблівымі рысамі характару. Выпадковых людзей сярод іх вельмі мала, бо работа адсявае такіх людзей: не ўсе вытрымліваюць патрабаванні, якія прад’яўляюцца да гэтых спецыялістаў, заўважыла старшыня БНП:

— Магчымасць удзельнічаць у тэле- і радыёэфірах, дапамога ў падрыхтоўцы друкаваных артыкулаў дазваляе натарыусам данесці інфармацыю і раскрыцца самім. Пры гэтым трэба не «перагрузіць» матэрыялы нарматыўнымі тэрмінамі, не стаць цытатнікам, які адсылае да заканадаўчых дакументаў, а падаць інфармацыю так, каб стала зразумела любому чалавеку. Такім чынам мы ўдасканальваемся з дапамогай журналістаў. І вы дапамагаеце нам фарміраваць давер да нашай работы праз агульны ўзнёсак у рашэнне праблем звычайных людзей. А праз гэта фарміруецца і давер да дзяржаы.

Сапраўды, натарыус — своеасаблівая палачка-выручалачка, якая дапамагае людзям пазбегнуць мноства праблем, перакананы тыя, хто сутыкаўся з іх работай. Журналісты ў сваю чаргу падзякавалі за кампетэнтных спікераў БНП, якія заўжды прафесійна і вельмі аператыўна адгукаюцца на запрашэнні асвяціць пэўную праблему ці расказаць пра новаўвядзенні ў натарыяце, за адкрытасць і гатоўнасць да супрацоўніцтва.

Ірына СІДАРОК

Фота дадзена Беларускай натарыяльнай палатай.