Урокі пандэміі, кніжная рубрыка і парады дактароў — што пачытаць у часопісе «Алеся» ў маі.
Наталля Саевіч узначальвала клініку менш за два гады, калі пачалася пандэмія. Калектыў пад яе кіраўніцтвам не толькі годна справіўся з новым выклікам, але і стаў яшчэ больш згуртаваным. З галоўным урачом 3-й гарадской клінічнай бальніцы ім. Я. У. Клумава журналіст «Алесі» пагутарыла аб уроках пандэміі, жаночым лідарстве і ролі пазітыўнага мыслення.
На думку Наталлі Саевіч, жанчына-лідар не толькі ўмее знаходзіць выйсце са складаных сітуацый, але і выбірае правільную тактыку работы з калектывам, яна — кіраўнік і адначасова — разам з калегамі.
— Штодзень рабіла з калегамі абходы пацыентаў, — успамінае Наталля Саевіч першыя, самыя цяжкія месяцы пандэміі. — Калі супрацоўнікі бачылі, што галоўны ўрач таксама надзявае ахоўны касцюм, ходзіць у ім па 8 гадзін, то разумелі: па-іншаму нельга.
З гутаркі вы даведаецеся і пра тое, чым жыве сёння шматпрофільная сталічная клініка з 195-гадовай гісторыяй.
Акрамя таленту, актрыса Ларыса Маршалава адораная той асаблівай жаноцкасцю, пад уладу якой немагчыма не патрапіць. Чаму яе часта запрашаюць на ролі медсясцёр? Што складана ёй прыняць у сваіх сучасніцах? У чым актрыса знаходзіць апору? Пра ўсё гэта — у гутарцы з вядучым майстрам сцэны Тэатра-студыі кінаакцёра Нацыянальнай кінастудыі «Беларусьфільм».
— Прыцягваюць, перш за ўсё, складаныя персанажы. Чым цяжэй даецца роля, тым больш блізкай і дарагой яна ў выніку, як правіла, становіцца, — дзеліцца Ларыса Маршалава. — Праз пераадоленне, «супраціў матэрыялу» прафесійна расцеш.
Па словах актрысы, класіка абавязкова павінна заставацца ў рэпертуары сучаснага тэатра — яна дазваляе зразумець складанасць жыцця, шматграннасць чалавека.
Анатоля і Дар’ю захапляе вецер насустрач, пахі суніц і кветак, рамантычныя паездкі пад дажджом. Разам муж і жонка вандравалі на матацыкле па многіх гарадах і мястэчках нашай краіны. Першая сумесная іх вандроўка была ў цудоўны горад Ліду, пасля аб’ездзілі шмат цікавых месц, пабывалі ў старажытных замках Беларусі. Наведалі Расію, Польшчу.
На гэтым Анатоль не спыніўся: у межах фестывалю «Мотапалярнік» праехаў Чувашыю, Татарстан, Удмуртыю, Ханты-Мансійскую і Ямала-Ненецкую аўтаномныя акругі і даімчаў на сваім «жалезным кані» нават да паўночнага Салехарда.
Сям’я ўпэўненая, што найлепшыя падарожжы — на матацыкле. Але самае цікавае ў вандроўцы — гэта дарога дамоў.
У пошуках сэнсу
Хто спрачаецца — цалкам можна жыць, не задумваючыся над вечнымі пытаннямі. Але чамусьці перад кожным разумным чалавекам яны ўсё ж устаюць. Можа, таму што «сэнсы» — як якары і як маякі ў бурлівым моры нашага быцця? Яны патрэбны, каб здабыць устойлівасць і бачыць перспектыву. Чаму людзі часам пакутуюць з-за адчування пустэчы ўнутры? Як знайсці свой індывідуальны сэнс? Што адрознівае паспяховых людзей, якія знаходзяць сябе і сваё прызначэнне? Адказы на гэтыя пытанні вы знойдзеце ў гутарцы з кандыдатам псіхалагічных навук, дацэнтам кафедры інавацыйнага ўпраўлення Інстытута бізнесу БДУ, псіхолагам-практыкам, коучам Наталляй Плаўнік.
У майскім нумары «Алесі» вас чакаюць кніжная рубрыка, парады дактароў, гаспадарчыя сакрэты. Майстрыхі даведаюцца, як звязаць модную безрукаўку з экзатычнай назвай «Афрыканская кветка». Напярэдадні сезону адпачынкаў вас пэўна не пакіне абыякавым расповед пра падарожжа ў Стамбул, пра шматлікія славутасці гэтага горада. Зацікавяць парады спецыяліста пра тое, як выбраць сукенку, і топ-8 мадэляў летняга абутку.
Алена ВАЛЕР’ЕВА
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.