Сцяг, герб і гімн — нацыянальныя сімвалы Беларусі

14 мая беларусы святкуюць Дзень Дзяржаўнага сцяга, Дзяржаўнага герба і Дзяржаўнага гімна Рэспублікі Беларусь. Свята, якім ушаноўваюцца ўсе тры сімвалы беларускай дзяржаўнасці (уключаючы гімн), сёлета адзначаецца ўпершыню — адпаведны ўказ кіраўнік дзяржавы падпісаў у красавіку. Сімвалічна, што менавіта 14 мая 1995 года, падчас першага рэферэндуму ў краіне, абсалютная большасць нашых суайчыннікаў прагаласавала за той сцяг і герб, з якімі сёння атаясамліваецца беларуская дзяржаўнасць.

Як паказалі вынікі сацыялагічнага даследавання, якое нядаўна праводзіў Інстытут сацыялогіі НАН Беларусі, дзве трэці насельніцтва нашай краіны (66,7 %) галоўнымі нацыянальнымі сімваламі Беларусі лічаць дзяржаўную сімволіку — сцяг, герб і гімн. Прычым значнасць дзяржаўных сімвалаў сярод моладзі вышэйшая (65,9 %), чым у беларусаў сярэдняга ўзросту (61,4 %).

Апытанне праводзілася ва ўсіх абласных цэнтрах і ў Мінску, асобных раённых гарадах і сельскіх населеных пунктах. На пытанні адказвалі 1848 рэспандэнтаў.

Паводле сацдаследавання, станоўчыя адносіны да дзяржаўнай сімволікі Рэспублікі Беларусь адзначаюцца ў большасці апытаных (80,5 %). Гэта сведчыць аб тым, што сімвалы нашай краіны з'яўляюцца народнымі. У свядомасці грамадзян дзяржаўная сімволіка адлюстроўвае нацыянальны характар і імкненні беларускага народа. Канцэптуальнай асновай беларускай дзяржаўнасці выступаюць яе знакавыя структурныя элементы. Рэспандэнты вызначылі, што асноўнымі атрыбутамі беларускай дзяржаўнасці з'яўляюцца перш за ўсё герб (61 %), сцяг (57,8 %), Канстытуцыя (50,8 %) і гімн Беларусі (49 %).

Падчас даследавання рэспандэнтам было прапанавана адказаць на пытанне: «Што для вас азначае быць патрыётам Беларусі?». 35,7 % удзельнікаў апытання адзначылі неабходнасць «паважаць дзяржаўную сімволіку і гісторыю Беларусі».

Вераніка КАНЮТА