Вы тут

Гнуткі графік, дадатковыя гарантыі: прафсаюзы Беларусі і Расіі абмяркуюць удасканаленне сямейнай палітыкі


Супрацоўніцтва прафсаюзаў Беларусі і Расіі можа садзейнічаць удасканаленню сямейнай палітыкі дзвюх краін, паведамілі БелТА ў прэс-службе Федэрацыі прафсаюзаў Беларусі.


Сумяшчэнне бацькоўства і працоўных абавязкаў, гнуткі графік, дадатковыя гарантыі, эфектыўнасць работы камісій сярод жанчын, заканадаўчыя напрацоўкі, рэалізацыя праграм па падтрымцы сем’яў — гэтыя і іншыя пытанні ў гэтыя дні абмяркоўваюць прадстаўнікі Белпрафмаша, Белхімпрафсаюза і Горна-металургічнага прафсаюза Расіі.

Мерапрыемства праходзіць у рамках міжнароднага жаночага семінара, які прадоўжыцца да канца тыдня. Сустрэча роднасных прафсаюзаў накіравана ў першую чаргу на ўдасканаленне сацыяльна значнай практыкі стварэння спрыяльных рабочых месцаў і ўмоў працы для тых работнікаў, якія выхоўваюць дзяцей.

«У Беларусі ўдзяляецца асаблівая ўвага сем’ям з дзецьмі, створаны ўсе ўмовы для таго, каб у сем’ях нараджаліся і выхоўваліся дзеці. Безумоўна, гэта матэрыяльная і сацыяльная падтрымка, гэта магчымасць атрымліваць бясплатную адукацыю і медыцынскую дапамогу, шырокі спектр магчымасцей для развіцця дзяцей. Гарантыі для работнікаў з дзецьмі замацоўвае і Працоўны кодэкс, удзел у распрацоўцы якога прымалі ў тым ліку і прафсаюзы. Дакументам прадугледжаны шэраг палажэнняў, якія пашыраюць магчымасці для сумяшчэння работы і бацькоўства. Напрыклад, гэта ўмовы работы дыстанцыйна, развіццё больш гнуткіх форм занятасці. Ёсць і нормы, якія не дазваляюць наймальнікам, напрыклад, звольніць работніка, які знаходзіцца ў водпуску па доглядзе дзіцяці, забараняецца адмаўляць жанчынам у заключэнні працоўнага дагавора, зніжаць ім зарплату па матывах цяжарнасці або наяўнасці маленькіх дзяцей, — расказалі ў прэс-службе Федэрацыі прафсаюзаў. — Падобныя падыходы прымяняюцца і ў Расіі. І размова не толькі пра Працоўны кодэкс. Як і ў Беларусі, ёсць мноства дакументаў, праграм, накіраваных на абарону і падтрымку работнікаў з дзецьмі. І сёння важна паглядзець, якія ёсць напрацоўкі ў кожнай з дзвюх краін, якія з іх эфектыўныя, а дзе неабходна дапрацаваць. Кожны з бакоў дамовіўся перагледзець заканадаўчую базу і пры неабходнасці ўнесці свае прапановы па дапрацоўцы таго ці іншага дакумента».

 У планах ва ўдзельнікаў семінара: знаёмства з умовамі працы, арганізацыяй вытворчага працэсу, стварэннем спрыяльнага асяроддзя для работнікаў, якія выхоўваюць дзяцей, а таксама наведванне буйных прадпрыемстваў нашай краіны.

«Мы прыехалі за вопытам беларускіх калег, а таксама падзяліцца сваім вопытам у галіне аховы і аплаты працы, тых сацыяльных ільгот і гарантый, якія прапісаны ў калектыўных дагаворах прадпрыемстваў, — адзначыла намеснік старшыні Горна-металургічнага прафсаюза Расіі Святлана Боева. — У Расіі распрацавана нацыянальная стратэгія дзеянняў у інтарэсах жанчын на 2020-2030 гады, галоўная мэта якой — забеспячэнне роўных магчымасцей мужчын і жанчын удзельнічаць ва ўсіх сферах жыцця грамадства. Даныя Мінпрацы Расіі сведчаць пра тое, што розніца ў заработнай плаце мужчын і жанчын цяпер складае 28 працэнтаў».

У Беларусі, паводле даных Белхімпрафсаюза, разрыў паміж аплатай працы жанчын і мужчын складае каля 33 працэнтаў. «Калі раней у Беларусі было каля 180 прафесій, па якіх жанчын апрыёры нельга было прымаць на работу, то цяпер гэты спіс істотна скараціўся — засталося крыху больш за 80 прафесій, — адзначае старшыня Белхімпрафсаюза Святлана Клачок. — Гэта сведчыць пра тое, што па гэтых прафесіях палепшаны ўмовы працы, што дае магчымасць жанчынам рабіць больш шырокі прафесійны выбар».

Прафсаюзы ўдзяляюць асаблівую ўвагу пытанням матэрыяльнага і маральнага стымулявання сем’яў да нараджэння дзяцей, падтрымцы работнікаў, якія выхоўваюць дзяцей. Работа, накіраваная на пашырэнне пераліку гарантый для работнікаў-бацькоў, вядзецца ў тым ліку шляхам уключэння ў калектыўныя дагаворы арганізацый палажэнняў, якія павышаюць узровень сацыяльнай абароненасці работнікаў у параўнанні з дзеючым заканадаўствам. Напрыклад, на многіх прадпрыемствах краіны шматдзетныя маці маюць права на дадатковыя выхадныя дні з захаваннем сярэдняй заработнай платы, 1 верасня бацькі атрымліваюць аплатны выхадны дзень, каб адвесці сваіх дзяцей-першакласнікаў у школу. Матэрыяльная падтрымка, дапамога ў адпачынку і аздараўленні — і гэта толькі частка тых гарантый, якія ўжо замацаваны.

Прэв’ю: БелТА

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».