Семінар старшынь раённых і сельскіх Саветаў Брэстчыны прайшоў у Целяханах

Семінар старшынь раённых і сельскіх Саветаў Брэстчыны прайшоў у Целяханах. У ім узялі ўдзел прадстаўнікі Івацэвіцкага, Бярозаўскага, Баранавіцкага, Ганцавіцкага, Ляхавіцкага раёнаў. Раней такія семінары прайшлі ў Іванаве і Каменцы. У цэнтры ўвагі былі пытанні жыццезабеспячэння насельніцтва, павышэння якасці жыцця, прафілактыкі правапарушэнняў, навядзення парадку на тэрыторыях.

Першае пытанне разгледзелі на прыкладзе Івацэвіцкага раёна. Летась тут прайшлі абласныя «Дажынкі». У абнаўленне пасёлка Целяханы былі ўкладзены сродкі з бюджэту, прыведзены ў парадак шэраг сацыяльных аб'ектаў, але ж многае зроблена з дапамогай мясцовага самакіравання, з актыўным удзелам грамады. Людзі прыводзілі ў парадак уласныя падворкі, тэрыторыю за агароджай, выходзілі на сумесныя працоўныя акцыі. Пра гэта расказаў прысутным старшыня Івацэвіцкага райсавета дэпутатаў Аляксандр Сарока.

У Цэнтры культуры і адпачынку гарадскога пасёлка Целяханы адбылася цырымонія ўзнагароджання пераможцаў конкурсу сярод сельскіх, гарадскіх Саветаў дэпутатаў, органаў тэрытарыяльнага грамадскага самакіравання вобласці па вырашэнні пытанняў жыццезабеспячэння насельніцтва.

Сярод сельскіх Саветаў найлепшымі сталі: Маўчадскі сельскі Савет Баранавіцкага раёна — першае месца; Люсінскі Ганцавіцкага і Ружанскі Пружанскага раёнаў — другое месца; Бярозаўскі Бярозаўскага і Вялікамалешаўскі Столінскага раёнаў — трэцяе месца.

У ліку калегіяльных органаў грамадскага самакіравання адзначаны: першым месцам — камітэт тэрытарыяльнага самакіравання пры ЖЭС № 2 Пінска, другім — дамавыя камітэты дамоў № 38 па вуліцы 700-годдзя Кобрына (Кобрын) і № 12 па вуліцы Леніна (Высокае Камянецкага раёна), трэцім — дамавы камітэт дома № 163 па вуліцы Даменікана (Баранавічы) і ЖСК № 54 па вуліцы Дуброўская, 19 (Брэст).

Ужо некалькі гадоў у названым конкурсе вызначаюцца пераможцы з ліку старастаў вёсак. На гэты раз першае месца ў Любові Гутнік, старасты вёскі Клепачы Мокраўскага сельсавета Пружанскага раёна. Другое месца занялі Надзея Капуза з вёскі Пескі Клейнікаўскага сельсавета Брэсцкага раёна і Таццяна Брыштэн, стараста вёскі Павіцце Кобрынскага раёна. На трэцім месцы — Галіна Сянюта з вёскі Вартыцк Іванаўскага раёна, Мікалай Ляўчук з вёскі Брадзяцін Гвозніцкага сельсавета Маларыцкага раёна. Усе пераможцы ўзнагароджаны дыпломамі і грашовымі прэміямі.

— Сёння немагчыма вырашаць пытанні навядзення парадку без шырокага прыцягнення грамадзян, — сказаў пры ўручэнні ўзнагарод старшыня Брэсцкага абласнога Савета дэпутатаў Юрый Наркевіч. — Мы бачым гэтыя прыклады — неабыякавасці, актыўнасці, руплівасці на месцах. І мы рады падзякаваць публічна гэтым людзям, асабліва старастам, паставіць іх у прыклад іншым.

Святлана ЯСКЕВІЧ