Міхаіл Орда: Санкцыі супраць працуючых Беларусі — злачынства

Міжнародная арганізацыя працы (МАП), разглядаючы сітуацыю ў Беларусі на сесіі Міжнароднай канферэнцыі працы МАП, якая зараз адбываецца ў Жэневе, фактычна прапануе членам-удзельнікам арганізацыі ўвесці чарговыя абмежавальныя меры да працуючых Беларусі, паведаміла прэс-служба Федэрацыі прафсаюзаў Беларусі. Гэта матывуецца тым, што людзі ў нашай краіне не маюць магчымасці аб’яднацца ў прафсаюзы і заключыць калектыўныя дагаворы. У Беларусі больш як 90 % работнікаў з’яўляюцца членамі прафесійных саюзаў, і ў краіне дзейнічае звыш 20 тысяч калектыўных дагавораў з дадатковымі гарантыямі для супрацоўнікаў, так што справа супраць Беларусі — маніпуляцыя і фальсіфікацыя, упэўнены Міхаіл ОРДА, старшыня ФПБ.

Міжнародная арганізацыя працы па сваёй сутнасці павінна абараняць занятасць і даходы людзей. Для гэтага яна створана гістарычна. Аднак сёння заходнікі намагаюцца працягнуць праз гэтую арганізацыю рашэнне, якое скіравана на тое, каб пакінуць людзей без работы і зарплаты, пракаменціраваў старшыня ФПБ:

— Яны практычна ўзурпіравалі ўладу на пляцоўцы МАП і не прыслухоўваюцца ні да чыёй іншай пазіцыі. Літаральна на днях прадстаўнік ААН выступіў супраць санкцый у дачыненні да Беларусі. Прафсаюзы больш як сотні краін, якія ўваходзяць у Сусветную федэрацыю прафсаюзаў, таксама калектыўна выступілі катэгарычна супраць прымянення якіх-небудзь абмежаванняў. Аднак гэтая пазіцыя хаваецца і замоўчваецца. Робіцца ўсё для таго, каб паказаць, што нібыта працоўныя ўсяго свету падтрымліваюць МАП у гэтым пытанні. Гэта абсалютна не так. Усё гэта яшчэ раз пацвярджае, што справа супраць Беларусі — гэта маніпуляцыя меркаваннем і фальсіфікацыя.

Любыя абмежавальныя меры, любыя санкцыі парушаюць кааперацыйныя сувязі і вытворчыя ланцужкі. Гэта негатыўна сказваецца на людзях ва ўсіх краінах, у тым ліку ў тых, якія ўводзяць гэтыя санкцыі. Калі Міжнародная арганізацыя працы прыме рашэнне супраць Беларусі, гэта будзе, па сутнасці, злачынства супраць усіх працоўных не толькі нашай краіны, але і іншых дзяржаў, падкрэсліў Міхаіл Орда.

Сесія Міжнароднай канферэнцыі працы МАП будзе адбывацца ў Жэневе да 16 чэрвеня ўключна. Прадстаўнікі работнікаў, працадаўцаў і ўрадаў са 187 дзяржаў-членаў МАП разглядаюць шырокі спектр пытанняў, якія найперш датычацца рэалізацыі асноўнага права кожнага чалавека ва ўсім свеце — права на працу. Акрамя таго, аналізуецца сітуацыя з умовамі працы, занятасцю, узроўнем сацыяльных гарантый кожнай з краін-удзельніц.

Ірына СІДАРОК

Прэв’ю: БелТА