У выхадныя прыйдуць доўгачаканыя дажджы

У ноч на чацвер з тэрыторыі Польшчы да заходніх межаў нашай краіны наблізіўся атмасферны фронт, які цяпер працягвае перамяшчацца праз тэрыторыю Беларусі і праявіў сябе моцным парывістым ветрам і дажджамі рознай інтэнсіўнасці. У пятніцу надвор'е возьме невялікую перадышку, а ўжо ў суботу пра сябе заявіць чарговы атмасферны фронт, які акрамя дажджоў рознай працягласці і навальніц яшчэ і панізіць паказанні тэрмометраў, паведамілі спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

У пятніцу ноччу пераважна па ўсходняй палове краіны, а днём у паўднёва-заходніх раёнах пройдуць кароткачасовыя дажджы, месцамі навальніцы. Уначы па захадзе чакаецца слабы туман. Тэмпература паветра ўначы складзе плюс 11-17 градусаў, а па паўднёвым усходзе — 18—20 цяпла. Удзень слупок тэрмометра паднімецца да плюс 24—30 градусаў.

Яшчэ цёпла, але ўжо з ападкамі будзе ў суботу. У гэты дзень на большай частцы тэрыторыі краіны чакаюцца досыць сур'ёзныя дажджы. У асобных раёнах навальніцы. Тэмпература паветра ўначы будзе вагацца ад 11 градусаў па паўночным усходзе да 19 градусаў па паўднёвым захадзе, днём — ад 18 да 25 градусаў. Месцамі паветра прагрэецца да 27 цяпла.

З ападкамі будзе і ў нядзелю, калі на большай частцы тэрыторыі краіны пройдуць дажджы. У асобных раёнах прагрымяць навальніцы. Уначы прагназуецца 11—18 градусаў, удзень — 18—25 градусаў.

Паводле папярэдняй інфармацыі айчынных сіноптыкаў, у пачатку наступнага працоўнага тыдня атмасферныя франты пакінуць тэрыторыю нашай краіны. А дажджы будуць мець лакальны і кароткачасовы характар і размяркоўвацца па тэрыторыі краіны нераўнамерна. Ноччу і раніцай у асобных раёнах згусціцца слабы туман. Тэмпература паветра ўначы будзе вагацца ад 9 градусаў да 16 градусаў. Удзень тэмпература дасягне 18—25 градусаў, месцамі — 27 цяпла.

Сяргей КУРКАЧ