Вы тут

Якія спецыяльнасці цікавілі абітурыентаў і што з сёлетніх навацый захаваецца праз год?


Сёлетняя ўступная кампанія амаль завершана, больш за 50 тысяч абітурыентаў 1 верасня зойме месцы ў студэнцкіх аўдыторыях. Яшчэ амаль 40 тысяч выпускнікоў школ паступіла ў сярэднія спецыяльныя навучальныя ўстановы. Завяршаецца прыём дакументаў ва ўстановы прафтэхадукацыі, якія прапануюць больш за 250 прафесій. Пра асаблівасці сёлетняй уступнай кампаніі і яе вынікі расказаў начальнік галоўнага ўпраўлення прафесійнай адукацыі Міністэрства адукацыі Сяргей Пішчоў.

Рост цікавасці да педагагічнай прафесіі і традыцыйна высокі конкурс у медыцынскія ВНУ

Кіраўнік ведамства адзначыў, што прыёмная кампанія праводзілася з улікам пастаўленых кіраўніком дзяржавы задач па стварэнні справядлівых, роўных і празрыстых умоў для паступлення. Быў праведзены комплекс мерапрыемстваў, які дазволіў убачыць матываваных, адораных і таленавітых абітурыентаў і стварыць для іх шэраг умоў для паступлення на абраныя спецыяльнасці і спецыяльнасці, запатрабаваныя эканомікай.


Нагадаем, што агульны план прыёму сёлета складаў 52,2 тысячы выпускнікоў школ, у тым ліку 28,4 тысячы планавалася прыняць за кошт сродкаў бюджэту, а 23,8 тысячы — на платную форму навучання. У параўнанні з 2022 годам план прыёму сёлета на бюджэтную форму павялічаны на 600 месцаў, а вось на платную форму скараціўся на 1,5 тысячы.

Такім чынам, у 44 дзяржаўныя ВНУ залічана 27,1 тысяча абітурыентаў за кошт сродкаў рэспубліканскага бюджэту. Сярэдні конкурс па краіне склаў 1,4 чалавека на месца. Кантрольныя лічбы прыёму выкананыя на 98 %. Прыём на завочную форму за кошт сродкаў рэспубліканскага бюджэту будзе праведзены з 15 лістапада да 30 снежня. Плануецца прыняць каля 700 чалавек.

У параўнанні з мінулым годам выраслі прахадныя балы па большасці спецыяльнасцяў. Максімальныя прахадныя балы зафіксаваныя па такіх спецыяльнасцях, як «Міжнароднае права» ў БДУ (398), «Стаматалогія» ў БДМУ (395), «Праграмная інжынерыя» ў БНТУ і БДУІР (394), ІT-спецыяльнасці традыцыйна карысталіся вялікім попытам.

— Назіралася павышэнне цікавасці ў абітурыентаў да педагагічных спецыяльнасцяў, што пацвярджаецца павелічэннем конкурсу, прахадных балаў, ростам колькасці выпускнікоў педагагічных класаў, якія паступілі на гэтыя спецыяльнасці. Традыцыйна вялікая колькасць абітурыентаў падала дакументы ў медыцынскія ВНУ. У іх у сярэднім конкурс склаў больш за два чалавекі на месца, а па некаторых спецыяльнасцях дасягаў 12. Адзначана і павышэнне балаў, напрыклад, на «Стаматалогію» ў БДМУ парог склаў 395 балаў, — расказаў Сяргей Пішчоў.

У ВНУ — праз універсітэцкую алімпіяду

Сёлета былі пашыраны магчымасці для паступлення адораных і матываваных абітурыентаў, якія дасягнулі высокіх вынікаў у школе. Дарэчы, у ВНУ падало дакументы больш за 3,3 тысячы медалістаў. Сёлета таленавітыя выпускнікі маглі паўдзельнічаць і ва ўніверсітэцкіх алімпіядах, перамога ў якіх давала права на залічэнне ў ВНУ. Іх правялі 18 рэгіянальных ВНУ, а 369 пераможцаў сталі студэнтамі.

— Каля 30 % з такіх абітурыентаў паступіла на найбольш запатрабаваныя эканомікай спецыяльнасці, каля 50 % пераможцаў скончыла школы раённых цэнтраў і сельскай мясцовасці, 62 % маюць сярэдні бал атэстата вышэй за 9 і каля 75 % пераможцаў паступіла ў ВНУ свайго рэгіёна, — прывёў лічбы Сяргей Пішчоў. — Усё гэта сведчыць пра неабходнасць і ў будучым праводзіць універсітэцкія алімпіяды. Таксама разглядаецца магчымасць пашырэння пераліку спецыяльнасцяў для залічэння іх пераможцаў.

Адным з новаўвядзенняў сёлетняй прыёмнай кампаніі стаў новы фармат для паступлення мэтавікоў. Гэта і павелічэнне квот на вылучэнне мэтавых месцаў, і зняцце тэрытарыяльных абмежаванняў для арганізацый-заказчыкаў, і вынясенне тэрмінаў дадзенай кампаніі за рамкі асноўнага прыёму. Адпаведны прыём ажыццяўляўся з 1 да 16 чэрвеня ў 30 ВНУ. На ўмовах мэтавай падрыхтоўкі залічана каля 3,5 тысячы абітурыентаў пры плане прыёму 4,5 тысячы (план прыёму выкананы на 77 %).

Фота Лізаветы Голад.

Адметна, што педагагічныя, медыцынскія, а таксама ВНУ, якія рыхтуюць спецыялістаў у галіне культуры, спорту і фізічнай культуры, выканалі мэтавы прыём на
90—100 %. У крыху меншых аб'ёмах справіліся сельскагаспадарчыя і транспартныя ВНУ.

— Мы бачым прамую залежнасць матывацыі абітурыента ад ўзроўню прафарыентацыйнай работы заказчыкаў кадраў. Такую работу неабходна развіваць і налета, — дадаў прадстаўнік Міністэрства адукацыі.

Стаматалогія і праграмаванне — самыя запатрабаваныя ў платнікаў

На платную форму навучання сёлета прымала абітурыентаў 49 ВНУ. Планавалася залічыць 23,8 тысячы чалавек, аднак фактычна прынялі крыху менш — план выкананы на 93,5 %. Пры гэтым некаторыя ВНУ правялі залічэнне і звыш кантрольных лічбаў прыёму. Максімальныя прахадныя балы на платную форму зафіксаваныя на спецыяльнасць «Стаматалогія» БДМУ (381), «Праграмная інжынерыя» ў БДУІР (361), «Міжнародныя адносіны» ў БДУ (357). На платнай форме навучання сёлета таксама адзначаўся рост конкурсу і прахадных балаў.

Максімальныя балы — у юрыдычным каледжы

Для атрымання сярэдняй спецыяльнай адукацыі сёлета можна было абраць 156 навучальных устаноў сярэдняй спецыяльнай адукацыі і 37 іншых навучальных устаноў, якія працуюць па такіх праграмах. Залічэнне адбывалася на аснове сярэдняга бала атэстата. Планавалася прыняць 39,6 тысячы чалавек, у тым ліку 27,4 тысячы — за кошт бюджэту, 12,2 тысячы — на платнай аснове, што складае каля 92 % ад плана прыёму мінулага года. Максімальныя конкурсы зафіксаваныя на спецыяльнасцях «Архітэктурны дызайн гарадскога асяроддзя» і «Дызайн» (больш за 4 чалавекі на месца), «Архітэктурнае праектаванне» (больш за 2,5 чалавека на месца).

А вось максімальныя прахадныя балы склаліся ў юрыдычным каледжы БДУ на спецыяльнасць «Правазнаўства» (ад 9,8 да 10 балаў) і філіяле БДУІР па спецыяльнасці «Распрацоўка і суправаджэнне праграмнага забеспячэння інфармацыйных сістэм» Мінскага радыётэхнічнага каледжа (каля 10 балаў).

Найбольшая ж колькасць бюджэтных месцаў запланавана па такіх профілях, як інжынерная, апрацоўчая, будаўнічая галіны, ахова здароўя, сацыяльная абарона, сельская, лясная, рыбная гаспадаркі, ветэрынарыя, педагогіка. Гэтыя спецыяльнасці найбольш запатрабаваныя ў заказчыкаў кадраў.

Асаблівасцю бягучага года стаў і прыём на дыстанцыйную форму навучання.

У навучальныя ўстановы, якія рэалізоўваюць праграмы прафтэхадукацыі, прыём сёлета вядуць 159 устаноў адукацыі, у тым ліку 154 каледжы, чатыры ВНУ і Рэспубліканскі інстытут прафесійнай адукацыі. Ажыццяўляецца прыём дакументаў на атрыманне адукацыі па больш чым 250 прафесіях. Найбольшая колькасць месцаў вылучана па такіх профілях, як інжынерная, апрацоўчая, будаўнічая галіны, сельская, лясная і рыбная гаспадаркі, ветэрынарыя. Спецыяльнасці рэальнага сектара эканомікі ў структуры прыёму складаюць каля 75 %.

— Міністэрства адукацыі сумесна з зацікаўленымі рэалізавала комплекс мерапрыемстваў, які дазволіў убачыць абітурыентаў, што маюць матывацыю, адораныя і добра падрыхтаваныя. Прапанаваныя навацыі дазволілі вырашыць задачу па прыцягненні абітурыентаў у ВНУ з улікам іх пераваг, а таксама па патрэбах арганізацый — заказчыкаў кадраў. Праводзяцца сустрэчы па абмеркаванні вынікаў уступнай кампаніі, праведзены круглыя сталы і дыялогавыя пляцоўкі з прадстаўнікамі ВНУ, сярэдніх спецыяльных навучальных устаноў, арганізавана анкетаванне абітурыентаў, бацькоў, педагогаў, каб выпрацаваць рэкамендацыі па ўдасканаленні прыёмнай кампаніі наступнага года, — рэзюмаваў Сяргей Пішчоў.

Алена КРАВЕЦ

Выбар рэдакцыі

Грамадства

Сёння распачынае работу УНС у новым статусе

Сёння распачынае работу УНС у новым статусе

Амаль тысяча дзвесце чалавек збяруцца, каб вырашаць найважнейшыя пытанні развіцця краіны. 

Навука

Наколькі эфектыўна працуе сістэма інтэлектуальнай уласнасці?

Наколькі эфектыўна працуе сістэма інтэлектуальнай уласнасці?

Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.

Здароўе

У Нацыянальны каляндар плануюць уключыць новыя прышчэпкі

У Нацыянальны каляндар плануюць уключыць новыя прышчэпкі

Як вакцыны выратоўваюць жыцці і чаго можа каштаваць іх ігнараванне?

Грамадства

Курс маладога байца для дэпутата

Курс маладога байца для дэпутата

Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.