Вы тут

Прыбаўка да зарплат бюджэтнікаў і рост працоўных пенсій. Што зменіцца з 1 верасня


З першага верасня павялічваецца базавая стаўка і многія могуць разлічваць на павышэнне заработнай платы. У тым ліку настаўнікі, для якіх перагледжаны памер надбавак. Таксама з гэтага часу вырастуць працоўныя пенсіі. Расказваем, хто можа разлічваць на прыбаўку зарплат і пенсій.


Фота: БелТА.

Вырастуць зарплаты ў бюджэтнікаў

З верасня да 235 рублёў павысіцца памер базавай стаўкі. Цяпер яна складае 228 рублёў.

— Базавая стаўка — галоўны элемент у заработнай плаце ў бюджэтнай галіне. Павышаецца базавая стаўка — растуць кампенсацыйныя і стымулюючыя выплаты. Мы ацэньваем, што па выніках года з улікам росту базавай стаўкі і стымулюючых выплат заработная плата ў бюджэтнай сферы вырасце дзесьці на 15 %, — расказала ў інтэрв'ю тэлеканалу «Беларусь 1» міністр працы і сацыяльнай абароны Ірына Касцевіч.

Сёння ў Беларусі ў бюджэтнай сферы занята больш за 800 тысяч чалавек. Нагадаем, што базавая стаўка сёлета павышаецца ўжо другі раз. Першы раз яна павысілася з 1 студзеня на 7,5 % і склала 228 рублёў. З 1 верасня тэмп росту складзе 3 %.

Пры гэтым сёлета быў прыняты Указ № 3 «Аб мерах па забеспячэнні своечасовай выплаты заработнай платы».

— Цяпер работніку не трэба хадзіць па калідорах судовых органаў. Калі наймальнік не можа забяспечыць выкананне сваіх абавязацельстваў, уступае ў работу патрабаванне з боку дэпартамента Дзяржаўнай інспекцыі працы. Калі наймальнік іх не выконвае, уключаюцца органы прымусовага выканання, — растлумачыла механізм дзеяння Ірына Касцевіч.

Такім чынам, з красавіка бягучага года па 3,5 тысячы чалавек, якім не была выплачана заработная плата, наймальнікі атрымалі дзвесце патрабаванняў амаль на сем мільёнаў рублёў.

— За кароткі перыяд амаль кожны трэці работнік атрымаў заработную плату. Вядома, гэта не ўсе, і нам хацелася б максімальна хутка ісці па дадзеным працэсе, але мы напрацоўваем практыку і ёсць станоўчыя вынікі. А самае галоўнае, што мы ўбачылі: калі людзі сутыкаюцца з такімі праблемамі, яны прыходзяць да нас, і мы дапамагаем іх вырашаць, — падзялілася міністр.

У настаўнікаў павысяцца надбаўкі

Міністэрства адукацыі ўнесла змяненні ў пастанову № 71 «Аб аплаце працы работнікаў адукацыі ад 3 чэрвеня 2019 года».

Змяненні прадугледжваюць перагляд надбавак з 1 верасня. На 15 % (з 6 % да 21 %) павялічана надбаўка для настаўнікаў за работу ў галіне. Таксама ўстаноўлена надбаўка куратарам вучэбных груп ВНУ на дзённай форме атрымання адукацыі (за выключэннем выпускнога курса) у памеры 100 %
базавай стаўкі, выпускнога курса — 50 % базавай стаўкі.

Пры гэтым напярэдадні Дня ведаў адрасную дапамогу ад дзяржавы атрымалі тыя катэгорыі грамадзян, якія маюць у ёй патрэбу. Пераважна гэта шматдзетныя сем'і, дзе трое і больш дзяцей. 30 % бюджэту пражытковага мінімуму, а гэта 109 рублёў, атрымалі такія сем'і на кожнага школьніка. На выплаты выдаткавана больш чым 23 мільёны рублёў. У выніку дапамогу атрымаў кожны пяты школьнік.

Але падтрымку аказала не толькі дзяржава.

— Мы звярнуліся да нашых сацыяльных партнёраў — гэта прадпрыемствы, прафсаюзы, грамадскія арганізацыі, такія як Беларускі саюз жанчын, «Белая Русь», БРСМ, і яны запусцілі свае праекты «Сабраць партфель у школу». Гэта сапраўдная кансалідацыя грамадства, якая прызваная дапамагчы тым людзям, што маюць патрэбу, і самае галоўнае — стварыць свята дзецям, — падкрэсліла Ірына Касцевіч.

Павялічацца пенсіі

З 1 верасня вырастуць працоўныя пенсіі. Адпаведны ўказ быў падпісаны Прэзідэнтам краіны і прадугледжвае іх павышэнне ў сярэднім на 5 %.

Паводле папярэдняй ацэнкі, сярэдні памер пенсіі па ўзросце непрацуючага пенсіянера ў верасні складзе 737 рублёў. У параўнанні з вераснем мінулага года гэта 15-працэнтны рост. Памер павелічэння пенсіі ў кожнага пенсіянера будзе свой у залежнасці ад працягласці стажу і велічыні заробку, а таксама ўстаноўленых даплат да асноўнай пенсіі.

— Сёння ў краіне 2,3 мільёна чалавек атрымлівае працоўную пенсію. Такое павышэнне на 5 % для дзяржавы складзе 72 мільёны рублёў, якія будуць дадаткова накіраваны на выплату пенсій. А ўвогуле вераснёўскія расходы на выплату пенсій — 1,7 мільярда рублёў. Гэта важкія расходы, якія нясе дзяржава, каб забяспечыць свае абавязацельствы перад пенсіянерамі. На выплату пенсій ідзе 9 % ВУП. А гэта сумарныя расходы на адукацыю і ахову здароўя ў нашай дзяржаве, — адзначыла Ірына Касцевіч.

Нагадаем, раней працоўныя пенсіі павялічваліся з 1 мая, прыбаўка ў асноўным склала таксама 5 %. Да гэтага іх павышалі ў снежні 2022-га.

Ірына Касцевіч адзначыла, што ў Беларусі працуе 418 тысяч пенсіянераў.

— У асноўным гэта нашы маладыя пенсіянеры, якія нядаўна пачалі атрымліваць пенсію. Ёсць унікальная норма — адкладзеная пенсія, калі пенсіянер працягвае працаваць, дзякуй богу, што здароўе дазваляе і ён цікавы наймальніку, бо валодае вялікім досведам і ведамі, пры гэтым ён можа не атрымліваць пенсію падчас работы, а, напрыклад, праз пяць гадоў, калі пакіне работу, пенсія можа быць такім чынам значна павялічана, — нагадала міністр.

Эксперымент па аплаце транспарту

Ён стартуе ў Мінску таксама з 1 верасня. У яго рамках плануецца арганізаваць улік усіх катэгорый перавезеных пасажыраў, у тым ліку льготнай (прадстаўнікі якой ездзяць бясплатна), і пралічыць усе расходы, звязаныя з работай транспарту.

З 1 верасня навучэнцам дзвюх сталічных каледжаў і чатырох школ будуць выдадзены бескантактныя смарт-карткі, аналагічныя праязному білету. Далей, з 1 кастрычніка, у рамках эксперыменту карткі будуць выдадзеныя льготнай катэгорыі грамадзян — інвалідам, ветэранам ВАВ. А з 1 студзеня 2024 года ў планах забяспечыць выдачай картак усіх грамадзян ільготных катэгорый.

— Гэта будзе зручна і самім пасажырам, у нас жа будзе магчымасць удасканальваць парадак кампенсацыі расходаў з бюджэту за выкананую транспартную работу, — адзначылі ў камітэце эканомікі Мінгарвыканкама.

Алена КРАВЕЦ

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.

Гандаль

Кандытарскія вырабы — брэнд беларускай харчовай прамысловасці

Кандытарскія вырабы — брэнд беларускай харчовай прамысловасці

Напярэдадні Міжнароднага сімпозіума кандытараў эксперты расказалі аб планах і перспектывах кандытарскай галіны.

Сям'я і дэмаграфія

Святлана Клачкова: Чым больш дзяцей, тым больш любові

Святлана Клачкова: Чым больш дзяцей, тым больш любові

Як жа шматдзетная сям’я спраўляецца з хатнімі клопатамі?