У Белдзяржфілармоніі адкрыюць новы арганны сезон

Народны артыст Расіі Уладзімір Хамякоў адкрые арганны сезон у Беларускай дзяржаўнай філармоніі, паведамляе БелТА.

Ён выступіць 20 верасня ў рамках легендарнага цыкла музыказнаўца Вольгі Савіцкай «Шэдэўры сусветнага арганнага мастацтва». Праграма канцэрта-адкрыцця арганнага сезона падабрана музыкам так, каб раскрыць унікальныя магчымасці аднаго з самых вялікіх канцэртных органаў на тэрыторыі СНД.

Першае аддзяленне будзе прысвечана творчасці Баха, а ў другім прагучаць творы Мадэста Мусоргскага.

Уладзімір Хамякоў удасканальваўся на майстар-класах вядучых замежных арганістаў і вывучаў мастацтва арганабудавання ў галоўнага арганнага майстра Домскай канцэртнай залы ў Рызе Гунара Далманіса. У 1987 годзе ён удзельнічаў у мантажы Чэлябінскага органа «Hermann Eule» і з гэтага ж года стаў салістам-арганістам і майстрам-захавальнікам органа Чэлябінскай філармоніі. Уладзімір Хамякоў выступаў з канцэртамі ў большасці арганных залаў былога Савецкага Саюза, а таксама Германіі, Швейцарыі, Галандыі, Італіі, Даніі, Швецыі, Фінляндыі, Ізраіля і ЗША.

Пачатак канцэрта ў 19.00.

Прэв’ю: БелТА