Магчымасці штучнага інтэлекту абмеркавалі на лекцыі ў Мінску

У цэнтры сталіцы прайшла бясплатная лекцыя «Нейрамастацтва: як рэалізаваць свой творчы патэнцыял з дапамогай штучнага інтэлекту». На ёй эксперт па лічбавай трансфармацыі і штучнаму інтэлекту Андрэй Цыган пагрузіў слухачоў у свет нейрасетак, падзяліўся лайфхакамі па іх выкарыстанні, а таксама распавёў, ці змогуць разумныя алгарытмы цалкам замяніць чалавека.

У якія сферы прыйдуць нейрасеткі і якія прафесіі могуць знікнуць? Штучны інтэлект ужо даўно перастаў быць даступны толькі вучоным, інжынерам і вузкім спецыялістам. А дзякуючы нейрасеткам перавагамі штучанага інтэлекту можа скарыстацца сёння любы ахвотны.

«Гісторыя паказала, што прагрэс не толькі забірае працоўныя месцы, але з часам стварае і шмат новых. Таму ўсім нам неабходна навучыцца правільна выкарыстоўваць тыя магчымасці, якія ствараюць нейрасеткі», — адзначыў Андрэй Цыган. Ён расказаў, якога прагрэсу дасягнулі сёння нейрасеткі ў самых розных сферах. Нейрасеткі могуць пісаць матывацыйны прамовы, маляваць карціны, распрацоўваць дызайн інтэр’еру, генерыраваць відэа, агучыць тэкст і скласці музыку.

«У кожнага з вас, напэўна, ёсць цікавая задумка, але ў вас няма пэўных кампетэнцый. А нейрасеткі могуць дапамагчы ўвасобіць вашы ідэі на годным узроўні. Нават дзіця гадоў 10-12 можа цалкам асвоіць гэты інструмент і рэалізоўваць сябе, ствараючы нешта цудоўнае», — дадаў эксперт.

Лекцыя праходзіла на тэрыторыі папулярнай лакацыі Lidbeer Dvor. Наведаць яе мог любы ахвотны. Акрамя лекцыі госці пляцоўкі прымалі ўдзел у майстар-класе па стварэнні дызайнерскіх аксесуараў з дапамогай 3D-ручкі, правяралі свае веды на тэму тэхналогій у анлайн-віктарыне, шукалі кропку раўнавагі на баланс-бордзе, спаборнічалі ў кіданні кольцаў, збіралі джэнгу і рабілі здымкі на памяць у яркай фотазоне.

Адбыўся таксама танцавальны батл, найлепшыя ўдзельнікі якога атрымалі памятныя сувеніры. А завяршыў вечар запальны сэт ад DJ Lady Marris.

Мерапрыемства стала завяршэннем праекта «Быць лепей кожны дзень», які на працягу ўсяго лета радаваў наведвальнікаў пазнавальнымі лекцыямі, майстар-класамі, віктарынамі і забаўляльнымі актыўнасцямі.

Надзея НІКАЛАЕВА