Міжнародны форум «Садружнасць моды» пройдзе ў Санкт-Пецярбургу 9 і 10 лістапада

Міжнародны форум «Садружнасць моды» краін СНД пройдзе 9-10 лістапада ў Таўрычаскім палацы Санкт-Пецярбурга. Пра гэта паведамілі БелТА ў Нацыянальным цэнтры мастацкай творчасці дзяцей і моладзі.

«Міжнародны форум «Садружнасць моды» краін СНД будзе праходзіць ужо другі раз. Ён збярэ прадстаўнікоў лёгкай прамысловасці і моднага бізнесу, профільных устаноў адукацыі, міністэрстваў і ведамстваў Садружнасці. У час форуму днём пройдуць круглыя сталы на тэму лёгкай прамысловасці і адукацыі, а вечарам — паказы, дзе кожную краіну прадставіць адзін удзельнік. Беларусь сёлета прадставіць пераможца фестывалю «Млын моды» Алена Пагірніцкая», — распавёў загадчык аддзела моды і дызайну Нацыянальнага цэнтра мастацкай творчасці дзяцей і моладзі Ігар Іваноў.

Алена Пагірніцкая адзначыла, што ў яе калекцыю «Магнатэрыя (Magnateria)» увайшлі вобразы з трох калекцый, прысвечаныя перыяду беларускага барока часоў кіравання князёў Радзівілаў у перыяд з XVI па XVIII стагоддзе. «Назва калекцыі ўтварылася ад слова «магнаты». У першай частцы калекцыі закранута тэма школы, бо Радзівілы вядомыя і тым, што прынялі ўдзел у адкрыцці розных навучальных устаноў. Другая частка звязана са слуцкімі паясамі, геральдыкай Радзівілаў і гісторыяй Барбары Радзівіл. Тэма барока раскрыта ў вобразах з дапамогай выкарыстання формаў гэтай эпохі, цяжкіх фактур, скуры, металізаванага лёну, буйной ношкі, а гістарычныя сілуэты перададзеныя ў аб’ёмах спадніц і рукавоў. Усё гэта дапаўняе жэмчуг, які так любіла Барбара Радзівіл», — распавяла Алена Пагірніцкая. Паводле яе слоў, падобныя форумы — гэта магчымасць у калекцыях паказаць культурны код сваёй краіны, падзяліцца творчасцю, набыць навыкі прасоўвання і кантакты для далейшага супрацоўніцтва.

Арганізатарамі форуму выступаюць Міжпарламенцкая асамблея дзяржаў-удзельніц СНД, Савет Федэрацыі Расійскай Федэрацыі, Міністэрства культуры Расійскай Федэрацыі і Еўразійскі жаночы форум.

Прэв’ю: БелТА