З навінкамі «Звязды» знаёмяцца ў Воранава

Сёння, 22 лістапада, у гарадскім пасёлку Воранава праходзяць сустрэчы з пісьменнікамі — аўтарамі кніг, якія пабачылі свет у Выдавецкім доме «Звязда». 

Для навучэнцаў чацвёртых і пятых класаў правядзе літаратурныя ўрокі Ірына Карнавухава. Паэт і празаік пазнаёміць і са сваімі новымі кнігамі «Байкальский солнцеворот» і «Дверной дом», а таксама раскажа пра новыя творчыя праекты, пра тое, рукапісы якіх кніг ужо падрыхтаваны да выдання. І з вучнямі чацвёртых класаў, і з пяцікласнікамі Ірына Карнавухава праводзіць сустрэчы на пляцоўках Воранаўскай цэнтральнай раённай бібліятэкі. 

А празаік Алеся Кузняцова пазнаёміць чытачоў Воранава — таксама ў раённай бібліятэцы — са сваім раманам «Когда трещит лёд». 

У Выдавецкага дома «Звязда» у апошні час складваюцца добрыя адносіны з рознымі бібліятэчнымі асяродкамі Гродзеншчыны. Супрацоўнікі выдавецтва арганізавалі сустрэчы з пісьменнікамі ў Гродна, Карэлічах, Шчучыне, Свіслачы, Мастах і іншых куточках вобласці. Спрыяе гэтаму і ўвага «Звязды» да тых творчых здзяйсненняў, аўтарамі якіх з’яўляюцца літаратары Гродзеншчыны. Нядаўна выдадзены кнігі Людмілы Кебіч, Вікторыі Карась, Святланы Кошур, Таццяны Яцук, калектыўны зборнік твораў гродзенскіх паэтаў — Міхася Васілька, Юркі Голуба, Мар’яна Дуксы. У хуткім часе пабачаць свет кнігі Аліны Сабуць, Дзмітрыя Радзівончыка. 

Раман СЭРВАЧ