Вы тут

Як выбарчая кампанія паспрыяла дыялогу паміж моладдзю і ўладай


Чаму важна ісці на выбары? Якая роля мясцовых Саветаў у рэалізацыі дзяржаўнай палітыкі? Хто адказвае за бяспеку падчас выбарчай кампаніі? Які працэнт моладзі павінен быць у парламенце? На гэтыя і іншыя пытанні студэнты ГрДУ імя Я. Купалы атрымалі адказ ад першых асоб вобласці, парламентарыяў і дэпутатаў падчас дыялогавай пляцоўкі «Моладзь і выбары — формула адказнасці».


Выбарчая кампанія ў краіне стартавала. У Гродзенскай вобласці праведзена значная арганізацыйная работа. Створана 60 акруг па выбарах дэпутатаў у абласны Савет дэпутатаў 29 склікання. Сфарміраваны выбарчыя камісіі і пачаўся этап вылучэння кандыдатур. Як вядома, сёлетняя кампанія прадугледжвае выбары дэпутатаў усіх узроўняў — ад сельскіх Саветаў да Палаты прадстаўнікоў Нацыянальнага сходу Беларусі. Моладзь таксама не застаецца ў баку ад грамадска-палітычнага жыцця краіны.

— Абласныя ўлады падтрымалі ініцыятыву дэпутатаў абласнога маладзёжнага Савета аб правядзенні такой сустрэчы, дзе можна атрымаць кампетэнтныя адказы на хвалюючыя пытанні, — зазначыла старшыня Гродзенскага абласнога Савета дэпутатаў Алена Пасюта. — Вырасла новае пакаленне маладых людзей, якія ідуць на змену сваім бацькам. Улада павінна быць побач з моладдзю, каб дапамагчы фарміраваць адказнасць за сучаснасць і будучыню Беларусі.

Выбары — неад’емны працэс развіцця кожнай дэмакратычнай дзяржавы, адна з формаў удзелу грамадзян у яе ўпраўленні. Гэта магчымасць прыняць удзел у абранні тых, каму выбаршчыкі давяраюць далейшае развіццё краіны. Па словах рэктара ГрДУ імя Я. Купалы Ірыны Кітурка, звыш 6 тысяч студэнтаў ВНУ прымуць удзел у электаральнай кампаніі, з іх 3 тысячы чалавек ажыццявяць гэта права ўпершыню.

На думку старшыні абласнога выканаўчага камітэта Уладзіміра Караніка, задача спікераў сустрэчы — не навязаць свой пункт гледжання, а аргументавана дапамагчы знайсці адказ на пытанне «Чаму важна ісці на выбары?». Між тым змены ў Канстытуцыі, якія былі прыняты ў мінулым годзе, даюць больш шырокія магчымасці для рэалізацыі палітычных амбіцый моладзі. Гэта ўдзел у партыйным будаўніцтве, рабоце мясцовых Саветаў, грамадскіх арганізацый. Прадстаўнікі моладзі могуць стаць дэлегатамі УНС.

— Будучыня любой краіны вызначаецца ў кабінках для галасавання, а не на плошчах. І калі мы не скарыстаемся сваім правам вызначаць сваю будучыню, у кагосьці можа з’явіцца спакуса вызначаць гэту будучыню за нас менавіта праз вулічныя акцыі. Але ні адна краіна, дзе змена ўлады адбылася праз плошчы, не змагла забяспечыць устойлівае развіццё і шчасце сваім грамадзянам. А мы хочам, каб будучыня нашай краіны была звязана з развіццём, бяспекай, каб мы не толькі захавалі тое, што маем, але і прымножылі здабыткі. Тады і наступныя пакаленні будуць жыць у камфортнай краіне і ганарыцца тым, што яны грамадзяне Беларусі. Таму мы гатовы сустракацца на такіх пляцоўках, дыскутаваць, — адзначыў Уладзімір Каранік.

Падчас сустрэчы маладыя ўдзельнікі даведаліся, як працуе беларускі парламент і колькі маладых прадстаўнікоў у заканадаўчым органе. Як расказала член Савета Рэспублікі Эльвіра Сарока, падчас работы парламента сёмага склікання было разгледжана звыш 320 законапраектаў, больш за 200 законаў прынята. У іх ліку тыя, што завяршаюць канстытуцыйнае будаўніцтва. Гэта законы аб Прэзідэнце, аб палітычных партыях, аб Усебеларускім народным сходзе. Будучая электаральная кампанія завершыць працэс маштабных палітычных пераўтварэнняў краіны.

Аб удзеле маладых парламентарыяў у заканадаўчай дзейнасці расказала дэпутат Палаты прадстаўнікоў Нацыянальнага сходу Беларусі Алена Патапава. Яна прывяла такую статыстыку. 

У ніжняй палаце парламента моладзь складае 10% агульнай колькасці дэпутатаў. Гэта людзі, чый узрост на момант абрання не перавышаў 35 гадоў. Дарэчы, сёння ў парламенце працуе і самы малады дэпутат за ўсю гісторыю беларускага парламентарызму. Пачынаецца новая электаральная кампанія, і маладыя людзі, якія дасягнулі 21 года, могуць паспрабаваць ступіць на палітычны шлях.

Удзельнікаў сустрэчы цікавілі і тэхнічныя пытанні будучых выбараў. Напрыклад, якія меры бяспекі будуць прыняты, а таксама ці не плануецца зрабіць бюлетэні рознага колеру, каб выбаршчыкі не блыталіся падчас галасавання. Што датычыцца мер бяспекі, яны, па словах памочніка Прэзідэнта — інспектара па Гродзенскай вобласці Юрыя Караева, будуць беспрэцэдэнтнымі. Усе моманты адпрацаваны, усе нестандартныя сітуацыі ўлічаны. Ніякіх інцыдэнтаў, у тым ліку нападзенняў на членаў камісіі альбо прадстаўнікоў аховы парадку, дапушчана не будзе. Кожны з выбаршчыкаў можа быць упэўнены ў бяспецы.

А вось на пытанне, ці будуць адрознівацца бюлетэні пры галасаванні, пакуль канкрэтнага адказу няма, хоць пытанне такое разглядаецца. Сапраўды, чалавек атрымае на рукі чатыры, у іншым выпадку тры бюлетэні і можа заблытацца. 

З боку гродзенцаў паступіць такая прапанова ў Цэнтральную выбарчую камісію. Магчыма, бюлетэні будуць адрознівацца па колеры ці неяк інакш. Ва ўсялякім выпадку дапамогу падчас выбараў будуць аказваць валанцёры.

У іх ліку і ўдзельніца сустрэчы, студэнтка 3 курса факультэта гісторыі, камунікацыі і турызму Мілана Шаргаева. Яна заўважыла, што падчас дыялогавай пляцоўкі даведалася шмат карыснага. Студэнтка ўпэўнена, што гэты вопыт дапаможа ёй у будучай дзейнасці, грамадскім жыцці.

На думку студэнткі 2 курса філалагічнага факультэта Уладзіславы Мотыль, адкрыты дыялог дапамог ёй больш поўна ўвайсці ў выбарчую сістэму, зразумець механізм яе дзейнасці, а галоўнае — зразумець важнасць удзелу ў выбарчай кампаніі. Яна, як і іншыя студэнты, прынялі да ведама прапанову губернатара зняць невялікі ролік, у якім яны раскажуць, чаму вырашылі ісці галасаваць на выбарах.

Маргарыта УШКЕВІЧ

Фота аўтара

Выбар рэдакцыі

Сям'я і дэмаграфія

Святлана Клачкова: Чым больш дзяцей, тым больш любові

Святлана Клачкова: Чым больш дзяцей, тым больш любові

Як жа шматдзетная сям’я спраўляецца з хатнімі клопатамі? 

Культура

Сёлета музей Янкі Купалы адзначае юбілей

Сёлета музей Янкі Купалы адзначае юбілей

«Пласт роднай зямлі — п’едэстал для паэта...» 

Грамадства

Ці забяспечваецца ахова грамадскага парадку на Мінскім моры?

Ці забяспечваецца ахова грамадскага парадку на Мінскім моры?

Пра гэта даведаліся карэспандэнты «Звязды».

Гандаль

Кандытарскія вырабы — брэнд беларускай харчовай прамысловасці

Кандытарскія вырабы — брэнд беларускай харчовай прамысловасці

Напярэдадні Міжнароднага сімпозіума кандытараў эксперты расказалі аб планах і перспектывах кандытарскай галіны.