Вы тут

Надвор'е: паліто пакуль не хаваем


На тое ён і красавік, калі ад спёкі да холаду — усяго пару крокаў. Вось і цяпер на змену рэкорднаму цяплу да нас прыйдзе вясновая прахалода, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.


Фота БелТА

У эпоху глабальнага змянення клімату ў нашых шыротах працягваюцца тэмпературныя «арэлі». Надвор'е другога тыдня красавіка як быццам жартам паўтарае сцэнарый першага — і летняе цяпло, і вясновая прахалода. Пасля ўмерана цёплага пачатку ў аўторак і сераду ва ўмовах малавоблачнага і сухога надвор'я тэмпература паветра перавысіла кліматычную норму на 9—16 градусаў. Паказанні на тэрмометрах апоўдні па краіне падымаліся да плюс 23—28 градусаў, апярэджваючы каляндар прыкладна на месяц. А вось у другой палове дня серады да заходніх раёнаў наблізіўся халодны атмасферны фронт, які нетаропка пачаў выцясняць за межы краіны цёплае паветра.

У пятніцу ў сувязі з тым, што фон атмасфернага ціску па-ранейшаму будзе павышаны, істотных ападкаў па краіне не чакаецца, толькі ў начныя гадзіны па поўначы краіны, дзе адаб'ецца ўплыў малаактыўнага франтальнага раздзелу, месцамі пройдуць невялікія кароткачасовыя дажджы. Раніцай і днём месцамі прагназуецца ўзмацненне ветру парывамі да 15—18 м/с. Тэмпература паветра ўначы складзе 4—10 цяпла, удзень — 14—20 градусаў.

А ў суботу (пацвярджаючы, што 13 — не самы ўдалы лік), надвор'е памяняе свой «імідж». У гэтыя выхадныя чакаецца непагадзь з дажджамі і парывістым ветрам, у дзённыя гадзіны месцамі прагрымяць навальніцы. У суботу на большай частцы тэрыторыі краіны пройдуць кароткачасовыя дажджы. Удзень у асобных раёнах магчымыя навальніцы. Ноччу і раніцай месцамі чакаецца слабы туман.

Тэмпература паветра ўначы складзе 4—11 градусаў. Удзень 11—18 цяпла, у паўднёва-заходніх раёнах краіны — да плюс 20 градусаў.
І ў нядзелю яшчэ будзе адносна цёпла. У гэтыя суткі ноччу месцамі па паўночным усходзе пройдзе невялікі дождж, днём на большай частцы тэрыторыі краіны кароткачасовыя дажджы. Днём у многіх раёнах прагназуецца ўзмацненне ветру парывамі 15—20 м/с, месцамі навальніцы. Тэмпература паветра ўначы складзе 5—11 цяпла, удзень будзе ад плюс 13 на поўначы да плюс 23 градусаў на поўдні краіны.

Згодна з папярэднім прагнозам, з пачаткам новага працоўнага тыдня ў сінаптычных працэсах па-ранейшаму будзе захоўвацца вясновая няўстойлівасць. У большасці раёнаў будуць ісці кароткачасовыя дажджы, тым самым папаўняючы скарбонку красавіцкіх ападкаў. У панядзелак дыскамфорту будзе дадаваць моцны парывісты вецер. Пры гэтым тэмпературны фон яшчэ панізіцца.

У панядзелак ноччу на большай частцы тэрыторыі, днём месцамі па Беларусі пройдуць кароткачасовыя дажджы. У начныя гадзіны ў многіх раёнах, удзень месцамі прагназуецца ўзмацненне ветру парывамі 15—20 м/с. Тэмпература паветра ўначы складзе 3—9 цяпла, удзень — 9—16 градусаў.

У аўторак і сераду на глебе магчымыя «нулявыя» замаразкі. У гэтыя дні на большай частцы тэрыторыі краіны пройдуць кароткачасовыя ападкі, у асноўным дождж. Ноччу і раніцай у асобных раёнах магчымы слабы туман. Тэмпература паветра ўначы складзе ад нуля да плюс 7 градусаў. Днём будзе 7—13 цяпла, 16 красавіка па паўднёвым усходзе — да плюс 15 градусаў.

Сяргей КУРКАЧ

 

Выбар рэдакцыі

Рэгіёны

Што абмяркоўвалі на нарадзе органаў мясцовага самакіравання Брэстчыны ў Пінскім раёне?

Што абмяркоўвалі на нарадзе органаў мясцовага самакіравання Брэстчыны ў Пінскім раёне?

Добраўпарадкаванне населеных пунктаў і навядзенне парадку на зямлі.

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.