Вы тут

У Віцебскім раёне з'явіўся новы стацыянарны сацыяльны пункт для дапамогі інвалідам і пажылым грамадзянам


Сёлета Тэрытарыяльны цэнтр сацыяльнага абслугоўвання насельніцтва Віцебскага раёна адкрыў новы стацыянарны сацыяльны пункт для дапамогі інвалідам і пажылым грамадзянам, які стаў 256-м аб’ектам на карце вобласці. Увядзенне важнага аб’екта прымеркавана да Года якасці.


Новы кабінет цяпер размяшчаецца ў будынку УП «Элект» Віцебскай абласной арганізацыі грамадскага аб’яднання «Беларускае таварыства інвалідаў па зроку», памяшканне пад які прадпрыемства прадаставіла бясплатна. Значную дапамогу ў набыцці абсталявання аказалі спонсары. Раней такі кабінет, толькі меншы па памерах, знаходзіўся ў будынку адміністрацыі ТЦСАН, а зараз ён размяшчаецца на вуліцы Карла Маркса 9а, у новым пункце з’явілася больш прасторы для фізічнай актыўнасці. Набылі і новыя сэнсарныя сцежкі, падвясны кокан-гамак, абсталявалі куток для заняткаў творчасцю.

Больш, чым год назад, Тэрытарыяльны цэнтр сацыяльнага абслугоўвання насельніцтва Віцебскага раёна пачаў аказваць новую паслугу — аздараўленне па методыцы слыхавой трэніроўкі Тамаціс. Па-іншаму такі спосаб рэабілітацыі называюць педагогікай слухання. Тамаціс рэкамендуецца дзецям ва ўзросце ад двух гадоў, якія маюць праблемы з затрымкай моўнага і псіхамоўнага развіцця, гіперактыўнасцю і дэфіцытам увагі, аўтызмам, эмацыйным і афектыўнымі парушэннямі. Сэнс методыкі заключаецца ў наступным: у залежнасці ад дыягназу (і толькі па накіраванні ад урача) кожнаму пацыенту падбіраецца музычная кампазіцыя, якая пабудана на гуках высокіх і нізкіх частот.

Дзякуючы рэзкім пераходам стымулюецца кара галаўнога мозга, узнікаюць новыя клеткі нейроны і сувязі паміж імі. Акрамя таго, што гук перадаецца па паветры праз вуха, адначасова ад навушнікаў ідзе вібрацыя па косці, што ўзмацняе эфект успрымання. Але для Тамаціса ёсць і свае перасцярогі — пухліны і кісты мозга і эпілепсія.

Каб дасягнуць станоўчага эфекту, неабходна прайсці некалькі курсаў. Адзін курс уключае ў сябе 14 заняткаў працягласцю ад 40 да 80 хвілін. Зручна, што падчас слухання музычных кампазіцый дзеці могуць маляваць, складваць пазлы, займацца фізічнай актыўнасцю або проста ляжаць — Тамаціс працуе сам. У 80 працэнтаў маленькіх пацыентаў, якія ўжо прайшлі некалькі курсаў у ТЦСАН,
адзначаецца змена почырку, павышэнне канцэнтрацыі ўвагі, запуск моўных працэсаў. А гэта значыць, што мозг пачынае працаваць актыўна, і ўжо на гэтай падрыхтаванай глебе можна займацца з лагапедам і інш.

За мінулы год некалькі курсаў педагогікі слухання прайшлі 23 дзіця, псіхолаг аддзялення комплекснай падтрымкі ў крызісных сітуацыях ТЦСАН Віцебскага раёна Таццяна Кірылава правяла летась 305 індывідуальных заняткаў і гэта — далёка не мяжа. З кожным днём папулярнасць сацыяльнай паслугі расце, цяпер на заняткі ў стацыянарны сацыяльны пункт прыязджаюць не толькі жыхары Віцебска і раёна, але і Оршы, Гарадка, Шуміліна. Па словах дырэктара Кацярыны Лазоўскай, у паўночным рэгіёне толькі адзін тэрытарыяльны цэнтр Віцебскага раёна аказвае такую паслугу, таму яна і карыстаецца высокай папулярнасцю сярод бацькоў, якія выхоўваюць дзетак з асаблівасцямі здароўя. «Яшчэ па методыцы Тамаціс аздараўляюць у рэабілітацыйным цэнтры для дзяцей з ДЦП у Паставах. Паслугу яшчэ прапаноўваюць у Мінску, аднак гэта патрабуе значных фінансавых укладанняў. Наш цэнтр прапануе сацыяльна-нізкія тарыфы», —
адзначае Кацярына Сяргееўна.

І не дзіўна, што зараз чарга жадаючых поўнасцю распісана на красавік і май. Дарэчы, паслухаць карысную музыку могуць і дарослыя людзі. У першую чаргу Тамаціс рэкамендуецца людзям пасля інсульту, тым, у каго парушаны сон, прафесійнае выгаранне і дэпрэсія. У прыватным парадку накіраванне ад спецыяліста непатрэбна, важна проста не мець супрацьпаказанняў. За мяжой практыкуюць вопыт выкарыстання Тамаціса пры хваробах Паркінсана і Альцгеймера. Цяпер скарыстацца такой магчымасцю можна таксама ў новым пункце, акрамя гэтага, тут будуць займацца і пажылыя людзі. Таксама ТЦСАН плануе асвоіць новую форму абслугоўвання людзей «залатога ўзросту» ў фармаце анлайн. Як расказала Кацярына Лазоўская, наведвальнікі цэнтра ў адным чаце змогуць знаёміцца, даведваецца пра конкурсы і новаўвядзенні ў сферы заканадаўства, наведваць музеі. У будучым  кіраўніцтва плануе закупіць абсталяванне для развіцця мелкай маторыкі рук і ўсталяваць праектар. А ў пачатку лета будзе канчаткова рэалізаваны яшчэ адзін буйны праект ТЦСАН — «Даступны пляж» на возеры Доўжа для інвалідаў-калясачнікаў.

У паўночным рэгіёне працуюць 256 стацыянарных і перасоўных сацыяльных пунктаў. Такая форма абслугоўвання насельніцтва карыстаецца попытам і паказвае эфектыўнасць сярод жыхароў аддаленых населеных пунктаў. У бягучым годзе плануецца адкрыць яшчэ 18 аб’ектаў.

Аляксандра Гвоздзева.
Фота «Витьбичи».

Выбар рэдакцыі

Рэлігія

200 гадоў пад заступніцтвам Пятра і Паўла

200 гадоў пад заступніцтвам Пятра і Паўла

Гомельскі кафедральны Свята-Петра-Паўласкі сабор — адзін з самых велічных праваслаўных храмаў Беларусі, адзін з нямногіх помнікаў архітэктуры зрэлага класіцызму, які захаваўся да нашых дзён.

Здароўе

Як мыць садавіну, гародніну і зеляніну, каб не атруціцца?

Як мыць садавіну, гародніну і зеляніну, каб не атруціцца?

«Апрацоўваць гародніну і садавіну сродкам для мыцця посуду нельга».

Спорт

Які наш спорт сёння?

Які наш спорт сёння?

«З кожным днём сітуацыя ў свеце мяняецца так, што ў вялікай ступені гэта закранае і спорт».