Вы тут

Ваўкавыск у наступным годзе адсвяткуе 1020-годдзе


Старшыня Ваўкавыскага райвыканкама Міхаіл Сіцько расказаў аб паездцы ў Калінінградскую вобласць і падрыхтоўцы да юбілейнай даты горада.


Старшыня Ваўкавыскага райвыканкама Міхаіл Сіцько

— Міхаіл Міхайлавіч, нядаўна ў складзе дэлегацыі Гродзеншчыны вы пабывалі ў бурштынавым краі — Калінінградскай вобласці. Была падпісана дамова аб намерах з расійскім раёнам. Што папярэднічала гэтаму?

— Беларусь і Расія паспяхова працуюць у рамках Саюзнай дзяржавы. Летась у Гродне з удзелам калінінградцаў прайшлі мерапрыемствы ў рамках праекта «Расія — Беларусь» — моцнае партнёрства» пры грантавай падтрымцы Фонду імя Гарчакова. І вось нядаўна адбыўся працяг праекта. У Калінінградскую вобласць прыбыла дэлегацыя Гродзенскай вобласці. Падпісаны шэраг пагадненняў з муніцыпальнымі раёнамі. Ваўкавыскі раён і Палеск таксама замацавалі свае намеры аб наладжванні двухбаковых сувязяў.

Трэба сказаць, што пабрацімскія сувязі ў нас наладжаны з горадам Гусеў Калінінградскай вобласці. Дэлегацыя на чале з кіраўніком адміністрацыі неаднаразова наведвала Ваўкавыск.

Цяпер мы вырашылі пашырыць рамкі супрацоўніцтва з расійскім рэгіёнам. Такім чынам, зацікавіліся Палескам, выйшлі на кіраўніцтва з прапановай супрацоўніцтва, атрымалі падтрымку. Мы расказалі аб сваім раёне, знакавых мясцінах. Нашы партнёры асабліва зацікавіліся турыстычнай сферай, у прыватнасці магчымасцямі беларускай санаторна-курортнай базы. Мы заўважылі, што гэты кірунак сёння вельмі папулярны ў расіян.

Паколькі Палескі раён па большасці аграрны, расійскія партнёры праявілі цікавасць да нашых тэхналогій па сельскай гаспадарцы. Таксама азнаёміліся з нашымі малочнымі і мяснымі прадпрыемствамі. Адчуваецца, што кіраўнік раёна, які, дарэчы, заняў гэту пасаду нядаўна, скіраваны на актыўнае супрацоўніцтва.

— Якім бачыце развіццё турызму з расійскімі партнёрамі?

— У Ваўкавыскім раёне дзейнічае два ведамасныя санаторыі — «Энергетык» і «Пралеска». Іх аздараўленчая база даўно асвоена расійскімі турыстамі, Думаю, санаторыі зацікавяць і нашых калінінградскіх сяброў. Акрамя гэтага, яны змогуць пазнаёміцца з рознымі турыстычнымі маршрутамі, убачыць нашы знакамітыя Мальдзівы — былыя кар’еры цэментнага завода. З другога боку, на Балтыку, у знакаміты бурштынавы край, змогуць паехаць і нашы групы.

— Вы таксама згадалі інтарэс да беларускіх сельскагаспадарчых тэхналогій. Што тут маецца на ўвазе?

— У Палеску пачынаецца будаўніцтва вялікага жывёлагадоўчага комплексу. А для таго, каб яго асвоіць, неабходна глыбока вывучыць тэхналогію малочнай вытворчасці — усе меры па ўтрыманні, даенні, кармленні, аднаўленні статка і гэтак далей. Мы можам падзяліцца вопытам. У сваю чаргу, нас зацікавіла іх работа па аднаўленні статка, там напрацавана даволі важкая база. Мы таксама бачым для сябе перспектыву ва ўдасканальванні галштынскай пароды. Яна даволі далікатная і патрабуе вельмі дакладнага маніторынгу на стадыі аднаўлення.

— Ці вялася гаворка пра сумесныя праекты? Ведаю, што раней такія трансгранічныя праекты падтрымліваў расійскі Фонд імя Гарчакова. Ці накіравана грантавая падтрымка на беларуска-расійскі вектар?

— Вядзецца работа па пераразмеркаванні сродкаў фонду. Магчыма, яны будуць накіраваны на сумесныя беларуска-расійскія праекты. Наш раён у гэтым таксама зацікаўлены, будзем прапаноўваць свае ідэі. Пачнём з культурных, адукацыйных, спартыўных, экалагічных тэм. Больш падрабязна зможам гэта абмеркаваць падчас іх візіту ў Гродзенскі рэгіён, які адбудзецца ў сярэдзіне мая. За гэты месяц падрыхтуем свой пакет прапаноў. Спадзяюся, што кіраўніцтва адміністрацыі Палеска наведае наш Ваўкавыск падчас прыезду Калінінградскай дэлегацыі.

— Выходзіце на знешнія сувязі з іншымі краінамі?

— Спадзяёмся, што ў хуткім часе пачне рэалізоўвацца праект з Кітаем па выпуску піратэхнічных сродкаў, феерверкаў. Дэлегацыя з КНР павінна да нас прыехаць у красавіку і нарэшце вызначыцца з далейшай рэалізацыяй праекта. Гэта справа ў Беларусі новая, але ў нас ёсць неабходныя ўмовы. У якасці складоў плануем задзейнічаць памяшканні былога ваеннага гарадка. Там будзе арганізавана і сама вытворчасць.

Раней феерверкі завозіліся з Еўропы, пазней іх стаў пастаўляць Кітай. Магчыма, у нас будзе створана сумеснае прадпрыемства. Тэма запатрабаваная, на гэту прадукцыю ёсць попыт.

— Што сёння актуальна для саміх жыхароў Ваўкавыска?

— Вырашаем пытанні аховы здароўя. Ідзе аднаўленне медыцынскай базы, яна пастаянна ўдасканальваецца. Многае зрабілі ў гэтым кірунку летась. Адрамантавалі ФАПы, купілі перасовачны ФАП, што павышае якасць абслугоўвання. Там на месцы чалавек зможа атрымаць пры неабходнасці накіраванне на дадатковае абследаванне ў раённай клініцы. Рыхтуем устаноўку ангіёграфа, які даследуе хваробы сасудаў. Аб’яўлены тэндар на мантаж абсталявання. Плануем да 1 мая здаць апарат у эксплуатацыю.

— Ваўкавыск — горад прывабны для жыцця. Тут знаходзіцца шэраг буйных прамысловых аб’ектаў. А як ідзе будаўніцтва жылля?

— Летась здалі два шматпавярховікі, сёлета таксама будзем здаваць шматкватэрны дом. Будаўніцтва вядзе самая буйная арганізацыя рэгіёна «Гроднажылбуд». Сустракаемся з людзьмі, прапануем ім варыянты, каб яны своечасова падрыхтавалі дакументы для атрымання кватэр. Таксама выдзяляецца жыллё для ваеннаслужачых і шматдзетных сем’яў.

— Калі падвесці вынікі мінулага года, на чым бы вы акцэнтавалі ўвагу? Якія самыя значныя здабыткі?

— Лічу, што мінулы год можна назваць прарыўным для Ваўкавыскага раёна. Мы паспяхова справіліся з вызначанымі планамі. Пачалі рэалізацыю вельмі істотнага інвестпраекта па перапрацоўцы цвёрдых бытавых адходаў з вытворчасцю РДФ-паліва. Праект плануецца рэалізаваць у рамках дзяржаўнай праграмы «Камфортнае жыллё і спрыяльнае асяроддзе». Рэалізацыя праекта дазволіць мінімізіраваць шкоднае ўздзеянне на навакольнае асяроддзе, атрымаць альтэрнатыўнае паліва і стварыць новыя працоўныя месцы. Атрыманае такім чынам паліва будзе выкарыстоўвацца для вытворчасці цэменту на прадпрыемстве «Краснасельскбудматэрыялы».

— У будучым годзе Ваўкавыск адзначыць 1020-годдзе. Пачалі падрыхтоўку да адметнай даты?

— Нядаўна ў нас адбылася сустрэча з губернатарам. Агучылі гэту тэму і выказалі прапанову правесці ў Ваўкавыску абласны фестываль «Дажынкі» ў наступным годзе. Такім чынам, мяркуем сумясціць два важныя мерапрыемствы і зладзіць глабальнае свята. Гэта было б самым маштабным падарункам як для нашых гараджан, так і для гасцей горада.

Гутарыла Маргарыта УШКЕВІЧ

Фота Лізаветы ГОЛАД, Віктара ІВАНЧЫКАВА і Алены ДАЎЖАНОК

Загаловак у газеце: Бурштынавы вектар і прарыўны праект

Выбар рэдакцыі

Рэгіёны

Што абмяркоўвалі на нарадзе органаў мясцовага самакіравання Брэстчыны ў Пінскім раёне?

Што абмяркоўвалі на нарадзе органаў мясцовага самакіравання Брэстчыны ў Пінскім раёне?

Добраўпарадкаванне населеных пунктаў і навядзенне парадку на зямлі.

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.