Вы тут

Shappo 24 — новы выставачны праект у галерэі «Арт-Фабрыка»


У Беларусі апошнім часам не так часта арганізоўваюцца выставачныя праекты, канцэпцыя якіх выклікае непадробную цікавасць гледачоў з самымі рознымі поглядамі на выяўленчае мастацтва, асабліва калі гаворка ідзе пра мастацкія дынастыі ці творчыя і сямейныя тандэмы. Звычайная практыка — стварэнне зборных выставак, дзе ў залежнасці ад умоў і магчымасцей пляцоўкі кожны аўтар прэзентуе створанае ў апошнія гады альбо згодна з тэматыкай. 


«Любоў» (з серыі «Стихи и»)

Па некалькі работ ад удзельніка — вось і цэльная выстаўка, творчая справаздача, якая сведчыць пра арыгінальнасць і майстэрства яе стваральнікаў. 

Іншая справа — спроба разнастаіць мастацкі працэс. Гэтым заняліся галерэя «Арт-Фабрыка» і прадстаўнікі сям’і Шаппо, вядомыя ў Беларусі і за мяжой мастакі з адметным светапоглядам. Shappo 24 — так называецца выставачны праект, у рамках якога ў галерэі з лютага да лістапада праходзяць персанальныя выстаўкі Уладзіміра Шаппо і яго сыноў Аляксандра, Паўла і Антона. Першая з чатырох — экспазіцыя Паўла Шаппо Obsession № 9 — ужо завяршыла сваю работу. Фінальную, а гэта будзе агульны сямейны праект Anniversary, у якім паўдзельнічае і Ксенія Шаппо, скульптар, дачка Уладзіміра Дзмітрыевіча, абяцаюць адкрыць 18 кастрычніка. 

«Амаду» (з серыі «Five»)

Красавік — месяц Антона Шаппо. Нядаўна «Арт-Фабрыка» прэзентавала яго экспазіцыю April guardian. Жывапісец, скульптар, графік, дызайнер, майстар тату эксперыментуе з рознымі падыходамі і тэхнікамі ў выяўленчым мастацтве, знаходзіць адметныя рашэнні, увасабляючы іх у розных напрамках творчасці. У новай экспазіцыі прадстаўлены работы з розных вядомых цыклаў, а таксама творы з новых серый... На адкрыцці выстаўкі April guardian у атачэнні сям’і, сяброў, аднадумцаў і аматараў творчасці Антон Шаппо адзначыў: — Апроч іншага, гэтым разам я прадставіў тры новыя серыі. «Стихи и» — гэта скульптурныя рэльефы на тэму стыхій. Работы, аб’яднаныя назвай «Страшна прыгожа», прысвечаны Першай сусветнай вайне. Серыя Five знаёміць з любімымі пісьменнікамі, якія моцна на мяне паўплывалі. Вельмі рады прадставіць гэтыя творы гледачу. 

Антон Шаппо, тлумачальнік і каментатар розных культур свету ды іх адметнасцей, паўстае надзвычай яркім апавядальнікам. У яго работах, пабудаваных на кантрастах, нават самых лаканічных, прасочваецца гісторыя, непаўторная і адначасова пазнавальная, абагульненая, вечная. Як здзіўляешся майстэрству значных пісьменнікаў валодаць словам, так захапляешся ўменнем гэтага мастака расказаць уласны сюжэт, весці цікавае апавяданне, якое часам быццам працягваецца па-за межамі твора, самае простае — праз асаблівую стылізацыю рам. Хоць тых самых лексічных адзінак Антон Шаппо не цураецца. Так, работы серыі «Стихи и», пераклад назвы якой на беларускую мову страціць свой сэнс, змяшчаюць у сабе натхнёныя радкі на англійскай мове. Нібыта лейтматыў усёй выстаўкі: Let them write in blood, weave feuilltons of ridiculous truths — love will overcome everything, all material rules. 

— Антон Шаппо — унікальны творца, — адзначыла Дар’я Аўчыннікава, дырэктар галерэі «Арт-Фабрыка». — Раю гледачам не спяшацца і ўважліва разгледзець кожную работу. Гэта дазволіць адшукаць глыбінныя сэнсы, адчуць новыя эмоцыі, знайсці адказы на важныя пытанні. 

Яўгенія ШЫЦЬКА

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.