Замежныя лідары павіншавалі беларускі народ з Днём Перамогі

У адрас Прэзідэнта Беларусі Аляксандра Лукашэнкі і беларускага народа паступаюць шматлікія віншаванні з 79-й гадавінай Перамогі ў Вялікай Айчыннай вайне. Аб гэтым паведамілі ў прэс-службе кіраўніка дзяржавы.

Пажаданні міру, дабрабыту і росквіты беларускаму народу накіроўваюць замежныя лідары, кіраўнікі інтэграцыйных аб’яднанняў, вядомыя дзеячы розных сфер.

Прэзідэнт Расійскай Федэрацыі Уладзімір Пуцін у віншавальным пасланні адзначыў, што ў гэты сапраўды святы для расіян і беларусаў дзень народы аддаюць даніну падзякі і павагі слаўнаму пакаленню пераможцаў-франтавікоў, партызан, падпольшчыкаў і працаўнікоў тылу. «Памяць аб іх мужнасці, самаахвярнасці і, вядома, аб незлічоных ахвярах, якія прыйшлося прынесці дзеля Перамогі над нацыстамі, назаўжды застанецца ў нашых сэрцах, — падкрэсліў расійскі лідар. — На жаль, сёння ў свеце нямала тых, хто не толькі апраўдвае крывавыя злачынствы. гітлераўцаў і іх памагатых, але і мэтанакіравана песціць іх ідэйных спадчыннікаў, якія здзяйсняюць не меней цяжкія злачынствы».

Уладзімір Пуцін звярнуў увагу, што ў Расіі высока цэняць нязменную падтрымку з боку Беларусі і актыўны ўдзел Мінска ў умацаванні бяспекі Саюзнай дзяржавы: «Упэўнены, што, захоўваючы добрыя традыцыі брацкага сяброўства і ўзаемавыручкі, завешчаныя бацькамі і дзядамі, нашы народы змогуць з гонарам пераадолець любыя цяжкасці і выпрабаванні».

Прэзідэнт Расіі таксама папрасіў перадаць усім ветэранам Вялікай Айчыннай вайны, якія пражываюць у Беларусі, словы самай шчырай удзячнасці, а таксама пажаданні добрага здароўя, дабрабыту і доўгіх гадоў жыцця.

Прэзідэнт Азербайджана Ільхам Аліеў адзначыў, што свята 9 Мая назаўжды ўвайшло ў гісторыю як сімвал бяспрыкладнага гераізму, доблесці і самаадданасці франтавікоў і працаўнікоў тылу ў барацьбе з фашызмам, у барацьбе за свабоду і незалежнасць. «У гэты светлы дзень мы шануем і беражліва захоўваем памяць аб подзвігу нашых герояў, усіх тых, хто цаной свайго жыцця абараняў Радзіму, аддаём даніну павагі ўсім тым, хто пасля вайны ўздымаў з руін разбураныя гарады і вёскі», — падкрэсліў кіраўнік дзяржавы. Ён выказаў упэўненасць у тым, што сяброўства і непахіснае адзінства народаў, якія стаялі плячом да пляча на фронце і прайшлі найцяжэйшыя выпрабаванні ваенных гадоў, заўсёды будуць трывалай асновай для ўмацавання і далейшага развіцця міждзяржаўных адносін.

Ільхам Аліеў пажадаў Аляксандру Лукашэнку, усім ветэранам вайны і працаўнікам тылу, усяму дружалюбнаму народу Беларусі шчасця і дабрабыту.

Прэзідэнт Таджыкістана Эмамалі Рахмон падкрэсліў, што слаўная дата 9 Мая з’яўляецца сімвалам бяспрыкладнага подзвігу і доблесці народаў: «У гэты дзень мы нізка схіляем галовы перад светлай памяццю загінуўшых, з пачуццём гонару і падзякі ўспамінаем мужнасць, гераізм і самаахвярнасць нашых продкаў, якія плячом да пляча кавалі Вялікую Перамогу на палях бітваў і ў тыле». Кіраўнік дзяржавы выказаў упэўненасць у тым, што добрыя традыцыі дружбы, салідарнасці і ўзаемнай падтрымкі і ў будучым будуць служыць справе ўмацавання пазітыўнай дынамікі развіцця супрацоўніцтва паміж Таджыкістанам і Беларуссю ў рэчышчы стратэгічнага партнёрства.

Эмамалі Рахмон пажадаў Аляксандру Лукашэнку здароўя і поспехаў, а дружалюбнаму народу Беларусі — міру і дабрабыту.

Прэзідэнт Кыргызстана Садыр Жапараў у віншавальным пасланні выказаў упэўненасць, што гістарычная сувязь дружбы і ўзаемнай падтрымкі народаў дзвюх краін, якія прайшлі суровыя выпрабаванні Вялікай Айчыннай вайны, будуць і ў далейшым садзейнічаць развіццю плённага супрацоўніцтва паміж Кыргызстанам і Беларуссю.

Садыр Жапараў пажадаў Аляксандру Лукашэнку моцнага здароўя і дабрабыту, а дружалюбнаму беларускаму народу — міру і працвітання.

Прэзідэнт Узбекістана Шаўкат Мірзіёеў у віншавальным пасланні з Днём Перамогі, які паступіў ад яго, адзначыў, што памяць аб гэтым свяшчэнным дні захоўваецца ў сэрцах як сімвал бяспрыкладнага гераізму і адвагі, сапраўднага патрыятызму і мужнасці воінаў-пераможцаў. «Мы бясконца ўдзячны нашым франтавікам і працаўнікам тылу, якія прайшлі ўсе беды і нягоды вайны, вызвалілі свет ад фашысцкай пагрозы», — падкрэсліў Прэзідэнт Узбекістана. Ён выказаў упэўненасць у тым, што адносіны дружбы і ўзаемнай падтрымкі і ў далейшым будуць служыць трывалай асновай шматпланавага супрацоўніцтва паміж Узбекістанам і Беларуссю.

Шаўкат Мірзіёеў пажадаў Аляксандру Лукашэнку добрага здароўя, дабрабыту і поспехаў у дзяржаўнай дзейнасці, а дружалюбнаму беларускаму народу — міру і працвітання.

Віншаванне паступіла ад Прэзідэнта Туркменістана Сердара Бердымухамедава: «У гэты дзень мы аддаём даніну памяці тым, хто атрымаў перамогу на палях бітваў і на працоўным фронце. Гэты вялікі Дзень Перамогі назаўжды застанецца сімвалам гераічнага духу і адзінства нашых народаў, якія плячом да пляча абаранілі светлую будучыню для наступных пакаленняў. Перакананы, што сяброўства і брацкія адносіны, праяўленыя ў гады вайны, будуць і надалей служыць трывалай асновай для ўмацавання нашых двухбаковых адносін».

Сердар Бердымухамедаў пажадаў моцнага здароўя, шчасця і невычэрпнай энергіі Аляксандру Лукашэнку і ветэранам Вялікай Айчыннай вайны, а дружалюбнаму народу Беларусі — міру, дабрабыту і працвітання.

Прэзідэнт Пакістана Асіф Алі Зардары адрасаваў кіраўніку беларускай дзяржавы і беларускаму народу сардэчныя віншаванні з нагоды Дня Перамогі — важнага свята, прысвечанага ахвярам і доблесці беларусаў, якія адважна змагаліся і аддалі сваё жыццё за свабоду. «Улічваючы складаную геапалітычную сітуацыю, Пакістан і Беларусь павінны разам працаваць над падтрыманнем міру, стабільнасці і эканамічнага развіцця, грунтуючыся на прынцыпах міжнароднага права», — падкрэсліў ён.

Асіф Алі Зардары пажадаў Аляксандру Лукашэнку моцнага здароўя і шчасця, а таксама далейшага поспеху і працвітання дружалюбнаму народу Беларусі.

Прэзідэнт Венесуэлы Нікалас Мадура ў віншавальным пасланні падкрэсліў, што ў яго краіне ўслаўляюць гераічную барацьбу адважных войскаў, якія разграмілі нацызм. «Самаахвяраванне вашага народа пакінула незгладжальны след у гісторыі», — адзначыў ён. Нікалас Мадура звярнуўся да кіраўніка беларускай дзяржавы: «Спадар Прэзідэнт, перад новымі выклікамі, у барацьбе з неакаланіялізмам шэрагу краін мы павінны супрацьпаставіць нашы каштоўнасці міру і дыялогу ўсяму таму, што ўяўляе пагрозу для чалавецтва. Будзьце ўпэўненыя, што можаце разлічваць на разуменне, абавязацельствы і адвагу венесуэльскага народа, які, зыходзячы з прынцыпаў Баліварыянскай дыпламатыі свету, пастаянна вядзе барацьбу за правую справу, супрацьстаіць любым праявам фашызму і выступае за пабудову справядлівага шматпалярнага свету без вайны». Беларускаму народу Прэзідэнт Венесуэлы пажадаў шчасця і дабрабыту.

Віншаванне паступіла і ад генеральнага сакратара СНД Сяргея Лебедзева. «Гэтае вялікае свята з’яўляецца сімвалам нязломнай волі, доблесці і адвагі нашых бацькоў і дзядоў, якія плячом да пляча паўсталі на абарону Радзімы перад тварам фашысцкай пагрозы. У гэты дзень з пачуццём бязмежнай удзячнасці мы шануем загінуўшых герояў, успамінаем франтавікоў і працаўнікоў тылу, якія сваім подзвігам і бяспрыкладнай мужнасцю абаранілі мір і свабоду для будучых пакаленняў», — гаворыцца ў віншаванні.

З Днём Перамогі Прэзідэнта Беларусі, які таксама з’яўляецца старшынёй Вышэйшага дзяржаўнага савета Саюзнай дзяржавы, павіншаваў дзяржаўны сакратар Саюзнай дзяржавы Дзмітрый Мезенцаў. Ён адзначыў, што гэтае свята для кожнага беларуса і расіяніна, для ўсіх сумленных грамадзян планеты — сімвал духоўнай велічы, гераічнасці шматнацыянальнага савецкага народа. У Беларусі і Расіі памятаюць, якім коштам далася Перамога, шануюць ратны і працоўны подзвіг, веліч духу бацькоў і дзядоў, якія разбурылі нацызм, дадаў Дзмітрый Мезенцаў. «Беларусы і расіяне, прытрымліваючыся традыцый абароны гістарычнай праўды, развіваюць прынцыпы непарушнага дружбы, яднання, брацкай узаемадапамогі», — падкрэсліў ён.

Віншавальнае пасланне беларускаму лідару накіраваў таксама генеральны сакратар Арганізацыі Дагавора аб калектыўнай бяспецы Імангалі Тасмагамбетаў: «Гістарычныя традыцыі дружбы, брацтва, згуртаванасці і ўзаемнай падтрымкі, якія ўмацаваліся ў гады вайны, служаць надзейнай асновай для паглыблення саюзніцкіх адносін дзяржаў — членаў АДКБ, умацавання бяспекі і стабільнасці на еўразійскай прасторы.».