Вы тут

Ідэі гармоніі — ў выстаўцы Ігара Кашкурэвіча «З Вечнасці ў Вечнасць»


Да 25 мая ў чатырох залах Нацыянальнага цэнтра сучасных мастацтваў на Някрасава працуе выстаўка Ігара Кашкурэвіча «З Вечнасці ў Вечнасць». Аўтар прапануе некалькі мастацка-філасофскіх канцэпцый, якія адлюстроўваюць погляды на розныя часовыя калізіі ўласнай творчасці. Як адзначаюць арганізатары, асаблівае месца ў экспазіцыі займае інсталяцыя-прысвячэнне бацьку мастака Арлену Кашкурэвічу і творцам, якія адыгралі важную ролю ў станаўленні яго асобы. 


Мастак-канцэптуаліст Ігар Кашкурэвіч нарадзіўся ў 1957 годзе ў Мінску. Вучыўся ў Мінскім мастацкім вучылішчы імя А. К. Глебава (1972–1976), Беларускім дзяржаўным тэатральна-мастацкім інстытуце (1976–1982). Яго выкладчыкамі былі Васіль Шаранговіч, Павел Любамудраў, Уладзімір Савіч, Людміла Кальмаева... Ігар Кашкурэвіч — член Беларускага саюза мастакоў, у мастацкіх выстаўках удзельнічае з 1978 года. Графік, жывапісец, скульптар стала працуе ў жанрах перфомансу і інсталяцыі. 

Так, яшчэ ў пачатку 1980-х ён пачаў выступаць як мастак канцэптуальнай хвалі. У свой час у Віцебску разам з Людмілай Русавай зладзіў перфоманс «Супрэматычнае ўваскрашэнне». А ў 1996 годзе мастак стаў удзельнікам нямецка-беларускага тэматычнага выставачнага праекта «Тэксты» — у яго межах стварыў інсталяцыю «Тут знаходзіцца ўльтрагігіенічны пункт...». 

Выстаўка «З Вечнасці ў Вечнасць» складаецца з некалькіх асобных інсталяцый. Напрыклад, гэта ўжо згаданая жывапісна-графічная інсталяцыя «Амажы — прысвячэнні Янку Купалу, Фёдару Дастаеўскаму, Арлену Кашкурэвічу, Васілю Быкаву, Альгерду Малішэўскаму, Уладзіміру Стальмашонку, Васілю Шаранговічу, Алегу Сурскаму, Анатолю Анікейчыку і Міхаілу Савіцкаму», што адлюстроўвае фрагменты розных перыядаў творчасці мастака, яго зацікаўленні і перавагі. 

Яшчэ адзін складнік выстаўкі — скульптурна-графічная інсталяцыя «Час — Творца», у якую ўвайшлі скульптуры, што фарміруюць у выставачнай зале каменны круг — сімвал працэсу творчасці ў часе, і малюнкі — выявы гэтых жа скульптур. Ігар Кашкурэвіч падкрэслівае, што камень мае велічны дух і валодае цікавай мовай. Скульптар выяўляе гэтыя асаблівасці, дарэчы, без выкарыстання механічных ці электрычных прылад — гэта ручная праца. Стварэнню твора дапамагаюць адпаведныя інструменты: малаток і разец з пабядзітавым наканечнікам. Кожнаму каменю мастак надае чалавечы твар, надзяляе яго пэўнымі знакамі. Такім чынам з адной вечнасці камень пераходзіць у іншую. 

Жывапісная інсталяцыя «Паверхні» прысвечана ідэі гармоніі. Асабліва цікавая яна будзе тым, хто вывучае тэорыі колеру. Як колер уплывае на чалавека? Што пры знаёмстве з творам падказваюць логіка ды інтуіцыя? Ці здольна святло, што сыходзіць ад карціны, крануць назіральніка? Ігар Кашкурэвіч не дае адказы, а толькі прапаноўвае паглыбіцца ў дагэтуль цалкам не разгаданы свет. 

Яшчэ бліжэй пазнаёміць з аўтарам інсталяцыя «Рукапісы гараць», якая прэзентуе аўтапартрэты. Тут змешчаны разважанні аб тым, што такое натхненне, калі пачынаецца сапраўдная творчасць, у чым выяўляецца станаўленне асобы ў мастацтве. Нават прадстаўлены малюнак, створаны Ігарам Кашкурэвічам ва ўзросце трох з паловай гадоў. 

Работы, праекты, інсталяцыі Ігара Кашкурэвіча арыгінальныя і вельмі розныя, таму кожны глядач можа знайсці штосьці, што адгукнецца. Напрыклад, дырэктар НЦСМ Сяргей Крыштаповіч адзначыў, што большасць твораў мастака даўно ведае і любіць, але ўсё ж вылучае скульптуры. 

Яўгенія ШЫЦЬКА

Фота аўтара

Выбар рэдакцыі

Жыллё

Аднапакаёвыя кватэры імкліва даражэюць

Аднапакаёвыя кватэры імкліва даражэюць

Прычына — даступныя крэдыты і ажыятажны попыт.

Культура

Чым сёлета будзе адметны фестываль песні і паэзіі ў Маладзечне?

Чым сёлета будзе адметны фестываль песні і паэзіі ў Маладзечне?

Арганізатары і ўдзельнікі свята запэўніваюць — знайсці сабе адпачынак па душы зможа кожны.

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.