Вы тут

Чым здзівіць «БЕЛАГРА-2024»?


34-я Міжнародная спецыялізаваная выстава «БЕЛАГРА-2024» адбудзецца ў рамках Беларускага аграпрамысловага тыдня, які адкрыецца 4 чэрвеня і працягнецца да 9 чэрвеня. У гэтым форуме прымуць удзел 490 кампаній з 11 краін, адзначыў намеснік міністра сельскай гаспадаркі і харчавання Уладзімір Гракун.


Асноўныя экспазіцыі будуць ад Беларусі і Расіі, а таксама ад Казахстана, Кыргызстана, Манголіі, Германіі, Кітая, Пакістана, Турцыі, В’етнама і Палесціны. Акрамя таго, на выставу спецыяльна прыедуць 29 афіцыйных дэлегацый з Азербайджана, Таджыкістана, Венесуэлы, Егіпта, Зімбабвэ, Ірака, Экватарыяльнай Гвінеі ды іншых краін. Беларускі бок разлічвае заключыць з імі шэраг кантрактаў, якія прадугледжваюць пастаўку нашай тэхнікі, насення, угнаенняў і прадуктаў харчавання.

Плошча адпавядае маштабу

Экспазіцыі выставы зоймуць 32,2 тысячы квадратных метраў, у тым ліку 7,2 тысячы «квадратаў» — у закрытых павільёнах. З кожным годам выстава «БЕЛАГРА» становіцца ўсё больш запатрабаванай. На гэты раз у ёй удзельнічаюць 40 новых прадпрыемстваў, у тым ліку 24 — беларускіх. Новымі краінамі-ўдзельніцамі сёлета стануць Казахстан, Кыргызстан і Манголія. Расійская Федэрацыя будзе прадстаўлена на стэндах Міністэрства сельскай гаспадаркі і 13 рэгіёнамі: Бранскай, Растоўскай, Пензенскай, Варонежскай, Валгаградскай, Саратаўскай, Смаленскай, Ульянаўскай абласцямі, Рэспублікай Адыгея, Кабардзіна-Балкарыяй, Мардовіяй, Татарстанам і Краснадарскім краем.

Нацыянальная акадэмія навук Беларусі прадставіць апошнія распрацоўкі ў галіне жывёлагадоўлі, раслінаводства і перапрацоўкі, а Міністэрства прамысловасці — новыя ўзоры сельскагаспадарчай тэхнікі. У прыватнасці, у выставе будуць удзельнічаць такія буйныя прадпрыемствы галіны, як Мінскі трактарны завод, Мінскі маторны завод, «МАЗ — кіруючая кампанія холдынга «БелаўтаМАЗ», «Гомсельмаш», «Амкадор», «Бабруйскаграмаш» і іншыя.

У рамках дзелавой праграмы выставы пройдзе каля 20 тэматычных семінараў і канферэнцый, на якіх будуць абмяркоўвацца забеспячэнне канкурэнтаздольнай прадукцыяй, племянная жывёлагадоўля, раслінаводства, машынабудаванне, аграрная адукацыя, перспектывы супрацоўніцтва з краінамі блізкага і далёкага замежжа, удакладніў намеснік міністра.

Гандлёвыя пляцоўкі і конкурсы

На выставе будуць працаваць кірмашы-продажы, розныя гандлёвыя пляцоўкі. Пройдуць конкурсы на найлепшую племянную малочную карову, «Найлепшы араты», «Чэмпіён смаку», дэманстрацыйныя паказы племянных жывёл і сельскагаспадарчай тэхнікі. Традыцыйна на галоўнай сцэне адбудуцца выступленні творчых калектываў. Таксама гледачоў чакае праграма, падрыхтаваная Рэспубліканскім цэнтрам алімпійскай падрыхтоўкі коннага спорту і конегадоўлі, на асобнай пляцоўцы кожны ахвотны зможа кіраваць тэхнікай МТЗ.

«Навінкай выставы стане „Партызанская паляна“, арганізаваная Міністэрствам абароны. Думаю, што кожны наведвальнік знойдзе для сябе нешта цікавае», — адзначыў Уладзімір Гракун. Намеснік міністра падкрэсліў, што «БЕЛАГРА» стане карыснай і для тых, хто вядзе прысядзібную гаспадарку. На выставе будзе прадстаўлены шырокі спектр насення, парод хатніх жывёл, тэхналогіі апрацоўкі глебы і многае іншае, здольнае выклікаць цікавасць у сельскіх жыхароў.

Баклажан не будзе рэдкасцю

Спікер адзначыў, што беларускія цяплічныя прадпрыемствы будуць развіваць вытворчасць грунтавой гародніны. Экспазіцыя плодаагародніннай прадукцыі на выставе «БЕЛАГРА-2024» будзе прадстаўлена 12 прадпрыемствамі. Яны прадставяць сваю прадукцыю, вырашчаную ў ахаваным грунце.

«Гэта сёння новы напрамак. Мы поўнасцю забяспечылі наша насельніцтва агуркамі. Наступная задача — забяспечыць таматамі, а ў далейшым — баклажанамі, перцам і зялёнымі культурамі. У экспазіцыі можна будзе азнаёміцца з работай цяплічных камбінатаў, ацаніць і набыць іх прадукцыю», — адзначыў намеснік міністра. Уладзімір Гракун удакладніў, што ва ўсе дні дзейнасці выставы «БЕЛАГРА-2024» будзе арганізаваны кірмаш-продаж прадуктаў харчавання па даступных цэнах.

Нагадаем, што выстава «БЕЛАГРА-2024» пройдзе ў выставачным цэнтры Кітайска-Беларускага індустрыяльнага парка «Вялікі Камень». Уваход бясплатны. У дні выставы ў Мінску са станцыі «Партызанская» будзе курсіраваць спецыяльны транспарт.

Сяргей КУРКАЧ

Выбар рэдакцыі

Культура

Чым сёлета будзе адметны фестываль песні і паэзіі ў Маладзечне?

Чым сёлета будзе адметны фестываль песні і паэзіі ў Маладзечне?

Арганізатары і ўдзельнікі свята запэўніваюць — знайсці сабе адпачынак па душы зможа кожны.

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў. 

Грамадства

Ірына Даўгала: Сям’я для беларусаў застаецца найвышэйшай каштоўнасцю

Ірына Даўгала: Сям’я для беларусаў застаецца найвышэйшай каштоўнасцю

«Сям’я закладвае ў чалавеку мараль, здольнасць спраўляцца з выпрабаваннямі, патэнцыял для развіцця, яна навучае любові, самаахвярнасці, культуры».