Вы тут

На гэтым тыдні адзінаццацікласнікі здалі першыя два цэнтралізаваныя экзамены


На гэтым тыдні адзінаццацікласнікі здалі першыя два цэнтралізаваныя экзамены, якія адначасова сталі і пачаткам уступнай кампаніі. Таксама ў тыя ж дні — 27 і 30 мая — прайшло цэнтралізаванае тэсціраванне для тых, хто скончыў школу або сярэднія спецыяльныя навучальныя ўстановы раней. Наперадзе — яшчэ два экзамены.


Фота БелТА

Вядома, экзамен — сур’ёзная праверка не толькі ведаў, але і псіхалагічнай сталасці маладых людзей. Ды і для больш сталых тэсціраванне далёка не лёгкая прагулка. Не менш адказны гэты перыяд і для ўдзельнікаў камісій па іх арганізацыі і правядзенні. Надта важна забяспечыць не толькі аб’ектыўную ацэнку ведаў, але і стварыць максімальна зручныя, камфортныя ўмовы для выпускнікоў і абітурыентаў.

Сёлета, па даных Міністэрства адукацыі, на ЦЭ зарэгістраваліся 55,7 тысячы выпускнікоў, на ЦТ — 54,9 тысячы чалавек. У пунктах правядзення ЦЭ, а іх у краіне 144 (56 — ва ўстановах агульнай сярэдняй адукацыі), працуюць больш за 10 тысяч педагогаў і іншых спецыялістаў адукацыйных устаноў. Самы буйны па колькасці ўдзельнікаў пункт правядзення цэнтралізаваных экзаменаў — у БДУ. Аб некаторых падрабязнасцях працэсу «Звяздзе» расказаў намеснік адказнага сакратара арганізацыйнай камісіі па правядзенні ЦЭ і ЦТ у БДУ Вячаслаў Малафееў.

— Вячаслаў Міхайлавіч, колькі выпускнікоў зарэгістравалася для здачы іспытаў менавіта ў вашым пункце?

— Усяго на ЦЭ і на ЦТ зарэгістравалася 10 381 удзельнік: 5789 з іх — на экзамен і 4592 — на тэсціраванне. На 27 мая для праходжання ЦЭ і ЦТ па профільных прадметах зарэгістравалася 3285 удзельнікаў іспытаў (2896 — на экзамен і 389 — на тэсціраванне). 30 мая на праверку ведаў па рускай і беларускай мове — 3429 чалавек (2893 — на ЦЭ і 536 — на ЦТ). На 3 і 6 чэрвеня для праходжання цэнтралізаванага тэсціравання зарэгістравалася 3667 удзельнікаў.

— Якой фактычна была яўка?

— 27 мая на цэнтралізаваны экзамен вельмі добрая — 99,6 працэнта з зарэгістраваных. Ва ўсіх, хто не з’явіўся (усяго 10 чалавек), былі абгрунтаваныя ўважлівыя прычыны. Значна больш тых, хто не прыбыў на тэсціраванне, — 17% ад агульнай колькасці зарэгістраваных. Але і тут ёсць свае аб’ектыўныя фактары.

— І экзамен, і тэсціраванне праходзяць адначасова. Ці не ўзнікае ва ўдзельнікаў блытаніны?

— Вядома, не. Усё дакладна вызначана, ЦЭ і ЦТ разведзены па розных аўдыторыях. У нашым пункце на гэтыя мэты вызначана 67 аўдыторый. У кожнай з якіх працавалі два ці тры выкладчыкі БДУ (у залежнасці ад памераў залы) і адзін настаўнік устаноў сярэдняй адукацыі Фрунзенскага раёна Мінска. Таксама ў кожнай аўдыторыі абавязкова знаходзяцца прадстаўнікі дзяржаўнай камісіі па кантролі за ходам падрыхтоўкі і правядзення ўступнай кампаніі.

— Як вы ацэньваеце настрой дзяцей перад іспытам?

— Хутчэй больш хваляваліся мы, асабліва ў першы дзень, калі выпускнікі здавалі цэнтралізаваны экзамен па прадмеце па выбары. А ў школьнікаў, прынамсі на першы погляд, яўных прыкмет нервавання ці павышанай узбуджанасці не назіралася. Вядома, яны хваляваліся, але побач з імі былі іх настаўнікі, прысутнасць якіх дадавала ўпэўненасці і спакою. За гэта асобная падзяка кіраўніцтву, педагогам устаноў адукацыі Фрунзенскага раёна сталіцы за высокі арганізацыйны ўзровень і такую ж магутную маральную падтрымку дзяцей.

Адзначу і станоўчую ролю рэпетыцыйнага экзамену, які праводзіўся 27 студзеня. Гэты вопыт дазволіў пазбегнуць арганізацыйных праблем, а самі выпускнікі былі ўжо значна больш сабраныя, спакойныя і ўпэўненыя ў сабе.

— Форс-мажорныя сітуацыі ўзнікалі?

— На жаль, так. Прыйшлося зняць з экзамену двух школьнікаў па стане здароўя. Сітуацыі, калі выпускніку або абітурыенту можа стаць дрэнна, у нас прадугледжаны — арганізавана пастаяннае дзяжурства медыкаў, сёлета разгорнуты два медыцынскія пункты. Што да парушэнняў, то іх зафіксавана не было.

Чарговыя дні цэнтралізаванага тэсціравання — 3 і 6 чэрвеня.

Тыя, хто не змог прысутнічаць на ЦЭ і ЦТ у асноўныя дні, маюць магчымасць зарэгістравацца на іх праходжанне ў рэзервовыя дні. Гэтае права дадзена толькі тым, хто ўжо быў зарэгістраваны на асноўны дзень. Рэгістрацыя на ЦЭ і ЦТ у рэзервовыя дні адбудзецца з 10 да 14 чэрвеня.

Рэзервовымі днямі для здачы ЦЭ і ЦТ вызначаны 19, 21, 23 чэрвеня. ЦТ па ўсіх прадметах пройдзе 19 чэрвеня. 21 чэрвеня — ЦЭ і ЦТ па профільных прадметах. 23 чэрвеня адбудуцца ЦЭ і ЦТ па рускай або беларускай мовах.

19 і 21 жніўня іспыты будуць здаваць тыя, хто па ўважлівых прычынах не змог прысутнічаць папярэдні раз, у тым ліку ў рэзервовыя дні, а таксама парушальнікі правілаў паводзін у аўдыторыі.

Алена ВІНАГРАДАВА

Выбар рэдакцыі

Экалогія

Якія прагнозы на лета робяць метэаролагі?

Якія прагнозы на лета робяць метэаролагі?

Тры месяцы суцэльнай спякоты нам не абяцаюць

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.