Сімвалам сёлетняга свята ў Александрыі стане купальскі вянок

Пра гэта паведамілі арганізатары на сённяшняй прэс-канферэнцыі, прысвечанай фестывалю «Купалле» (Александрыя збірае сяброў). Ён адбудзецца сёлета 6 ліпеня на традыцыйнай маляўнічай лугавіне каля Дняпра на ўскрайку агагарадка Александрыя.

— Асноўнымі напрамкамі 15-га па ліку фестывалю стане тэматыка Года якасці, а таксама 80-годдзя вызвалення Беларусі ад нямецка-фашысцкіх захопнікаў, — паведаміў намеснік старшыні Магілёўскага аблвыканкама Алег Стэльмашок. 

Удзел у фестывалі пацвердзілі ўжо болей чым 90 майстроў дэкаратыўна-прыкладнога мастацтва з 21 рэгіёну Расійскай Федэрацыі.

«Сёлета да нас упершыню прыедуць майстры па роспісу і ювеліры з Азербайджана і Узбекістана», — удакладніў дырэктар Магілёўскага абласнога метадцэнтра народнай творчасці і культурна-асветнай работы Алег Хмялькоў.

Летась удзельнікамі і гасцямі свята сталі каля 80 тысяч чалавек. Сёлета чакаецца не меней. Для іх арганізатары рыхтуюць тэматычныя купальскія пляцоўкі, гульнявыя праграмы, святы, конкурсы, у якіх бяруць удзел творчыя калектывы, народныя тэатры Магілёўскай вобласці, выступаюць лепшыя майстры мастацтваў з усёй Беларусі і рэгіёнаў Расійскай Федэрацыі. Традыцыйна на купальскай лугавіне будуць працаваць лакацыі «Зроблена ў Беларусi», «Александрыйская гасціна», «Гандлёвая суполка», «Магілёўшчына», «Кірмашовы завулак». Агульная даўжыня гандлёвых радоў складзе 1,8 кіламетра. У праграме свята адбудзецца ўзнагароджанне пераможцаў рэспубліканскага сельскагаспадарчага маладзёжнага праекта «Уладар вёскі».

Гала-канцэрт з удзелам расійскіх і беларускіх артыстаў эстрады будзе прасякнуты ідэяй адзінства народаў славянскай культуры. У ім будуць закранутая тэмы 80-годдзя вызвалення Беларусі ад фашысцкіх захопнікаў, 25-годдзя Саюзнай дзяржавы, Года якасці ў Беларусі і Года сям’і — у Расіі. 

Нэлі ЗІГУЛЯ

Фота з сайта mogomc.by