Вы тут

На Мазыршчыне дадзены старт ваенна-патрыятычнай гульні «Зарніца»


Адкрыццё абласнога этапу адбылося на базе дзіцячага рэабілітацыйна-аздараўленчага цэнтра «Сідзельнікі». Тут за званне лепшага паспрачаюцца 100 удзельнікаў з розных раёнаў Гомельскай вобласці. Карэспандэнты «Звязды» наведалі дзіцячы цэнтр «Сідзельнікі», азнаёміліся з побытам юных патрыётаў. 


Аздараўленне ў «Сідзельніках»

Здаровае дзіця — шчасце для сям’і і грамадства. Яно вясёлае і актыўнае, паспявае і ў вучобе, і ў спорце. Менавіта такому маленькаму чалавеку належыць будучыня. Заклад моцнага здароўя дзіцяці — пастаянны кантроль за яго станам, своечасовае лячэнне, штогадовае аздараўленне. Важную ролю ў аздараўленні малых Гомельшчыны адыгрывае дзіцячы рэабілітацыйна-аздараўленчы цэнтр «Сідзельнікі». Ён вядзе адлік сваёй гісторыі з 1996 года. Тут шмат увагі надаецца аздараўленню дзяцей з раёнаў, якія пацярпелі ад Чарнобыльскай катастрофы. 

«Дзіцячы рэабілітацыйна-аздараўленчы цэнтр „Сідзельнікі“ працуе круглы год, — адзначыла дырэктар КУП ДРАЦ «Сідзельнікі» Наталля Грышко. — У летні перыяд праводзім аздараўленчыя змены. Сёлета запланавана пяць такіх змен па 18 дзён. Дзеці атрымаюць комплекс санаторна-медыцынскіх працэдур. Для іх забяспечваецца правядзенне вольнага часу, арганізуецца шасціразовае збалансаванае харчаванне і, канечне, пражыванне».

Па словах Наталлі Грышко, вольны час прадумваецца да пачатку змены. У яго ўваходзяць культурна-масавыя мерапрыемствы, спартыўныя конкурсы і спаборніцтвы. Кожны дзень працуе басейн. З улікам узросту дзяцей арганізуецца работа аб’яднанняў па інтарэсах. Іх наведваюць як дашкольнікі, так і школьнікі сярэдняга і старэйшага ўзросту. 

Харчаванню ў дзіцячым рэабілітацыйна-аздараўленчым цэнтры надаецца асаблівая ўвага. Яно займае ільвіную долю ў арганізацыі аздараўлення дзяцей. У меню ўключана 20 фірмовых страў уласнай вытворчасці. Харчаванне дзяцей узгадняецца з Цэнтрам гігіены і эпідэміялогіі.

«Штодня на сталах у рабят маецца свежая выпечка,садавіна, гародніна і складаныя салаты. Мы прывучаем дзяцей да культуры харчавання. Дзіця, якое прыязджае на аздараўленне, у адпаведнасці са станам здароўя атрымлівае ад пяці да сямі працэдур. Гэта магніталячэнне, электралячэнне, водалячэнне, масаж, акварэлакс, рэабокс, інфрачырвоная саўна. Працэдуры тут праводзяцца кожны дзень», — дадала Наталля Грышко. 

Усяго за лета ў «Сідзельніках» аздаровіцца больш за 1300 дзяцей. У жніўні сюды прыедуць спартсмены з Масквы. На базе дзіцячага рэабілітацыйна-аздараўленчага цэнтра маецца фізкультурна-аздараўленчы комплекс, у які ўваходзіць спартыўная зала, тэнісная зала, зала для дашкольнікаў і стадыён. 

«Зарніца» на беразе Прыпяці 

«Сёлета на базе дзіцячага рэабілітацыйна-аздараўленчага цэнтра „Сідзельнікі“ праводзіцца абласны этап рэспубліканскай гульні „Зарніца“. З дзецьмі праводзяцца розныя конкурсныя мерапрыемствы. Малыя пражываюць у палатачным гарадку, які размешчаны на беразе Прыпяць. У „Зарніцы“ прымаюць удзел 10 каманд з усёй Гомельскай вобласці. Лепшая каманда вобласці прадставіць Гомельшчыну на рэспубліканскім этапе», — падагульніла Наталля Грышко. 

У дзяцей сапраўды насычаныя дні. Кожная раніца пачынаецца з зарадкі, завяршаецца дзень дыскатэкай каля вогнішча. 12 чэрвеня адбудзецца ўрачыстае закрыццё «Зарніцы», будуць падведзены вынікі дзевяці конкурсных дзён. 

«У першы ж дзень расстаўлялі палаткі. І хоць нам крыху дапамагалі, у асноўным справіліся самі, — распавяла ўдзельніца рэспубліканскай ваенна-патрыятычнай гульні „Зарніца“ Анастасія Федзіна. — Пасля з рабятамі арганізавалі турыстычную ваенную выставу. З намі праводзяць шмат заняткаў па страявой падрыхтоўцы. У вольны час разводзім вогнішчы, спяваем песні. Мне тут вельмі падабаецца, эмоцыі суперскія, вялікі дзякуй настаўнікам, дырэктару, завучам за ўсё тое, што яны робяць для нас». 

«„Зарніца“ ў фармаце дзевяцідзённага палатачнага лагера існуе ў Гомельскай вобласці з 2010 года. Ужо 14 гадоў запар сюды прыязджаюць дзеці і спаборнічаюць паміж сабой, — адзначыў начальнік лагера Дзмітрый Стагначоў. — Спачатку праводзілі папярэдні завочны адбор. Рабяты дасылалі відэа, дзе яны маршыруюць, спяваюць песні. На падставе гэтых відэа мы адабралі дзесяць каманд, якія і прыехалі на вочны этап гульні».

Па словах начальніка лагера, «Зарніца» — гэта заўсёды дзевяць дзён. Першы дзень — заезд, другі — урачыстае адкрыццё. Далей па праграме ідуць розныя мерапрыемствы. Кожны дзень падзелены на дзве паловы. У першую палову мерапрыемствы больш актыўныя, у другую — спакойныя, тэарэтычныя. Кульмінацыяй гульні стане вялікая ваенізаваная гульня на мясцовасці. Асаблівасці яе, план і канкрэтныя этапы трымаюцца ў сакрэце да самага апошняга моманту, дзеці і педагогі даведаюцца аб ёй толькі ў дзень правядзення. 

«Прыемна бачыць, што ў гэтым годзе прадстаўлены маленькія раёны. Сярод іх — Жыткавіцкі, Чачэрскі, Добрушскі і іншыя. У цэлым, сюды прыязджаюць дзеці з усёй Гомельскай вобласці. Мазыршчыну сёлета прадстаўляе Сярэдняя школа № 14», — дадаў Дзмітрый Стагначоў.

Бацькі малых могуць не перажываць. Лагер абсталяваны непрамакальнымі палаткамі. Дзецям камфортна, ва ўсіх ёсць спальныя мяшкі. Для рабят арганізавана харчаванне ў сталовай «Сідзельнікаў». Санаторый таксама прадастаўляе і душавыя пакоі. 

«Дзеці прыязджаюць з вялікай цікавасцю і неведаннем таго, што чакае іх наперадзе. Пачуццё невядомага знікае на працягу першых дзён. У канцы яны не хочуць з’язджаць, абменьваюцца адзін з адным нумарамі тэлефонаў, абдымаюцца і гуртуюцца», — падагульніў начальнік лагера. 

Ваенна-патрыятычная гульня «Зарніца» нязменна карыстаецца папулярнасцю сярод моладзі. Тэма патрыятычнага выхавання мае тут далёка не апошняе значэнне. 

Данііл ХМЯЛЬНІЦКІ

Фота Лізаветы ГОЛАД

г. Мазыр

Выбар рэдакцыі

Культура

Сусвет пад крыламі наміткі

Сусвет пад крыламі наміткі

Гутарка з мастацтвазнаўцам Марыяй Віннікавай.

Грамадства

Стыхія нарабіла бяды

Стыхія нарабіла бяды

Энергетыкі працягваюць аднаўленчыя работы пасля разгулу стыхіі ў 1,2 тысячы населеных пунктаў.

Адукацыя

Прыёмная кампанія: фініш блізка

Прыёмная кампанія: фініш блізка

17 ліпеня — апошні дзень, калі ў абітурыентаў прымаюць дакументы на бюджэтную форму навучання.  

Тэатр

Барыс Цяцёркін: Я аднолькава ўлюбёны і ў тэатр, і ў кіно

Барыс Цяцёркін: Я аднолькава ўлюбёны і ў тэатр, і ў кіно

Артыст Купалаўскага тэатра —  пра дзяцінства, шлях да сцэны і вывучэнне беларускай мовы.