Вы тут

Бокс тайскі — медалі беларускія


Героі тыдня. Беларускія спартсмены выступілі на чэмпіянаце свету па тайскім боксе. Дадому яны прывезлі сем медалёў. Чэмпіёнам свету ў катэгорыі U23 стаў Яўген Федарынчык, які спаборнічае ў катэгорыі да 71 кг. Сярэбраныя медалі заваявалі Іван Шангін, які выступае ў катэгорыі да 60 кг сярод моладзі, Мікіта Кокаш (U23 86 кг). Бронзавымі прызёрам сталі Валянцін Капытаў (да 91 кг), Данііл Дзедавец (да 63,5 кг), Арцём Варывацкі (U23, да 57 кг) і Паліна Ламінская (U23, да 71 кг).


Аб’ява тыдня. Стаў вядомы расклад трох першых матчаў мінскага «Дынама» ў сезоне-2024/25 Кантынентальнай хакейнай лігі, паведамілі ў прэс-службе сталічнага клуба. Першым сапернікам падапечных Дзмітрыя Квартальнава ў новым сезоне будзе хабараўскі «Амур». Сустрэча пройдзе ў «Мінск-Арэне» ў чацвер, 5 верасня. У мінулым розыгрышы КХЛ абедзве каманды занялі восьмыя месцы ў сваіх канферэнцыях і завяршылі барацьбу за Кубак Гагарына ў першым раўндзе плэй-оф. Абедзве вочныя сустрэчы засталіся за хабараўчанамі. Пасля хатняга паядынку «зуброў» чакаюць два выязныя матчы — з маскоўскім «Спартаком» 9 верасня і супраць падмаскоўнага «Віцязя» 11 верасня. Новы сезон Кантынентальнай хакейнай лігі стартуе ў Магнітагорску 3 верасня з гульні за Кубак Адкрыцця паміж дзейным чэмпіёнам «Металургам» і яраслаўскім «Лакаматывам».

Турнір тыдня. У Алімпійскім комплексе «Лужнікі» ў Маскве ў рамках «Тыдня лёгкай атлетыкі» прайшлі Усерасійскія спаборніцтвы «Мемарыял братоў Знаменскіх». У турніры выступілі 15 беларускіх лёгкаатлетаў, васьмёра сталі медалістамі. Пераможцамі мемарыялу Знаменскіх у штурханні ядра сталі Алена Дубіцкая (18,13 м) і Алег Тамашэвіч (21,08 м), у сектары для трайнога скачка роўных не было Віялеце Скварцовай (14,39 м), а ў жаночым бар’ерным бегу на 100 м найлепшы вынік паказала Эльвіра Грабарэнка (12,86 сек). Услед за сяброўкай па камандзе фінішавала Святлана Парахонька. Трэцяе месца ў сваіх дысцыплінах занялі Карына Дзямідзік (скачкі ў вышыню), Яніна Луцэнка (100 м) і Віталь Парахонька (110 м з бар’ерамі). Завяршальным стартам «Тыдня лёгкай атлетыкі» ў Маскве стаў «Дзень скачкоў». Другое месца ў сектары для скачкоў з шастом заняў Мацвей Воўкаў, Карына Дзямідзік у спаборніцтвах па скачках у вышыню стала трэцяй.

Паражэнне тыдня. Арына Сабаленка не здолела прабіцца ў паўфінал адкрытага чэмпіянату Францыі. У апошнім чвэрцьфінальным паядынку яна саступіла 17-гадовай расіянцы Міры Андрэевай, якая займае 38-е месца ў рэйтынгу WTA, — 7:6 (7:5), 4:6, 4:6. Па выніках Адкрытага чэмпіянату Францыі Арына Сабаленка страціла другую пазіцыю ў рэйтынгу Жаночай тэніснай асацыяцыі. Цяпер яна займае трэці радок.

Лічба тыдня. Сем медалёў заваявалі беларускія спартсмены падчас другога этапу міжнароднай серыі Гран-пры па веласпорце на трэку, які прайшоў у Санкт-Пецярбургу. Караліна Бірук перамагла ў омніуме і заняла другое месца ў гонцы праследавання, дзе найлепшы вынік паказала Анастасія Кіпцікава. Яшчэ адна беларуска Аліна Кароткіна стала ў омніуме трэцяй. У мужчынскім кейрыне сярэбраны медаль заваяваў Арцём Зайцаў. Гэта ўзнагарода стала для беларускага веласіпедыста трэцяй на турніры. Раней Зайцаў перамог у індывідуальным спрынце, а таксама разам з прадстаўнікамі Тульскай вобласці першынстваваў у камандным спрынце.

Поспех тыдня. Беларускія барцы вольнага стылю выступілі на рэйтынгавым турніры «Мемарыял Імрэ Паяка і Янаша Варгі» ў Будапешце. Беларускую мужчынскую каманду па вольнай барацьбе на спаборніцтвах прадставілі Арыян Цютрын, Аляксандр Гуштын і Дзяніс Храмянкоў. Медалістам турніру стаў толькі Арыян Цютрын, які заваяваў бронзавы медаль у катэгорыі да 57 кг.

Валерыя СЦЯЦКО

Фота з адкрытых крыніц

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.