Барацьбу за медалі пачынаюць лёгкаатлеты

Сорак дзевяць камплектаў узнагарод у сямі відах спорту будуць разыграны ў трэці спаборніцкі дзень Спартыўных гульняў краін БРІКС у Казані, паведамляе БелТА.

Пасля двух дзён форуму ў актыве беларускай дэлегацыі 37 медалёў (8-13-16). На суботу арганізатары Гульняў прызапасілі старт спаборніцтваў па лёгкай атлетыцы — на дарожкі і ў сектары сёння выйдуць больш за 50 нашых спартсменаў. Змагацца за прызы будуць бягуны Максім Грабарэнка і Яніна Луцэнка, скакухі Віялета Скварцова і Ірына Жук, штурхальнік ядра Алег Тамашэвіч, кідальніца дзіды Таццяна Халадовіч і многія іншыя.

Патрапіць у лік прызёраў фіналаў асобных відаў паспрабуюць нашы гімнасты Ягор Шарамкоў, Яраслаў Крутаў, Кіра Магарэвіч і Алена Цітавец, на рахунку якіх ужо ёсць узнагароды турніру. Выступленні ў сталіцы Татарстана завершаць прадстаўніцы сінхроннага плавання, апошнім відам тут стане адвольная праграма ў групавічак.

Таксама сёння заключны дзень спаборніцтваў у каратыстаў, узысці на пастамент у гэтым відзе спорту паспрабуюць дзевяць беларускіх атлетаў. На вяслярным канале адбудуцца фінальныя заезды ў двоек парных і чацвёрак двухлопасцевых, у склад аднаго з экіпажаў увойдзе чэмпіёнка Гульняў БРІКС Алена Фурман. У цяжкай атлетыцы за медалі паспрачаюцца Сяргей Шаранкоў (да 102 кг) і Роберт Куроўскі (звыш 102 кг).

Акрамя таго, у суботу баі адной другой фіналу правядуць нашы прадстаўнікі ушу Марыя Кручонак (да 65 кг), Анастасія Шутава (да 70 кг) і Аляксей Шыла (да 85 кг). Таксама 15 чэрвеня адбудуцца матчы плей-оф у адзіночных разрадах у бадмінтоне і настольным тэнісе і гульні папярэдняга раунда ў тэнісістаў. Першы паядынак групавой стадыі правядзе зборная Беларусі па фіджытал-баскетболе, у саперніках — каманда Арменіі.