Вы тут

Надвор'е: Зноў да 28 цяпла і навальніцы


Улетку ў нас амаль заўсёды так: спачатку хмары і навальніцы, але ўжо праз дзень-другі зноў спякота. І гэтым разам перадышка са свежым паветрам была нядоўгай, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.


Фота з адкрытых крыніц

У пятніцу ўмовы надвор’я ў Беларусі будзе вызначаць вобласць павышанага атмасфернага ціску. Без ападкаў. Ноччу і раніцай месцамі слабы туман. Вецер заходні ўмераны. Тэмпература паветра ўначы будзе вагацца ад 8 градусаў да 14 цяпла, а максімальная днём складзе ад 21 да 27 градусаў. Атмасферны ціск ноччу істотна не зменіцца, днём будзе слаба падаць.

У суботу днём з паўднёвага захаду Еўропы чакаецца перамяшчэнне франтальных раздзелаў. Пераменная воблачнасць. Ноччу пераважна без ападкаў, днём на большай частцы тэрыторыі краіны пройдуць кароткачасовыя дажджы, месцамі навальніцы. Ноччу і раніцай у асобных раёнах слабы туман. Вецер пераменных напрамкаў умераны, пры навальніцах парывісты. Тэмпература паветра пачне павышацца і ўначы будзе дасягаць ужо плюс 9 — плюс 16 градусаў. Пацяплее і днём, калі максімальная тэмпература стане дабягаць да 21–28 цяпла.

Дажджлівае надвор’е захаваецца і ў нядзелю, калі франтальныя раздзелы пачнуць перамяшчацца на тэрыторыю Расіі. У нас жа днём умовы надвор’я ў асноўным будуць фарміраваць няўстойлівыя паветраныя масы, якія паступаюць з боку поўдня Балтыкі. Воблачна з праясненнямі. Ноччу — на большай частцы тэрыторыі краіны, днём — месцамі пройдуць кароткачасовыя дажджы. У асобных раёнах прагрымяць навальніцы. Ноччу і раніцай месцамі слабы туман. Вецер заходняй чвэрці парывісты. Тэмпература паветра ўначы будзе набліжацца да максімальнай — 11–18 цяпла. А днём спякота пачне спадаць да 18–24 цяпла, па поўдні Беларусі да 26 градусаў.

Згодна з папярэднімі прагнозамі айчынных сіноптыкаў, няўстойлівае з дажджамі надвор’е захаваецца і ў панядзелак. На большай частцы тэрыторыі краіны пройдуць кароткачасовыя дажджы, днём магчымы навальніцы. У начныя і ранішнія гадзіны ў асобных раёнах згусціцца слабы туман. Уначы слупкі тэрмометраў пакажуць плюс 9–16 градусаў, а ўдзень — 18–25 градусаў.

Пачынаючы з аўторка надвор’е палепшыцца. У гэты дзень, 25 чэрвеня, будзе пераважна без ападкаў, толькі ў асобных раёнах па ўсходзе краіны магчымыя кароткачасовыя дажджы. Ноччу і раніцай месцамі слабы туман. Тэмпература паветра ўначы будзе вагацца ад плюс 7 да плюс 14 градусаў, а ўдзень — ад плюс 20 да плюс 27 градусаў. У сераду надвор’е прагназуецца без ападкаў. У начныя і ранішнія гадзіны месцамі слабы туман. Уначы сіноптыкі абяцаюць плюс 7–14 градусаў, а ўдзень — плюс 22–28 градусаў.

А як у суседзяў?

У гэты час Еўропа пакутуе ад экстрэмальных умоў надвор’я з рэкордна высокімі тэмпературамі і моцнымі штормамі.

У Румыніі жыхары Бухарэста змагаюцца з хваляй спёкі з 19 чэрвеня, калі тэмпература ў паўднёвай частцы краіны паднялася прыкладна да 40-41 градуса з плюсам. У Германіі 18 чэрвеня навальніцы абрынуліся на некаторыя раёны Саксоніі. Суровае надвор’е нанесла значны ўрон, разбурыўшы шматлікія лініі электраперадачы і пашкодзіўшы дахі. Агенцтва ЕС па маніторынгу клімату «Copernіcus» паведамляла ў пачатку месяца, што май у гэтым годзе быў самы цёплы за ўсю гісторыю назіранняў. Па іх даных, гэта быў дванаццаты месяц запар, калі сярэдняя глабальная тэмпература дасягае рэкорднага значэння.

Сяргей КУРКАЧ

Выбар рэдакцыі

Культура

Сусвет пад крыламі наміткі

Сусвет пад крыламі наміткі

Гутарка з мастацтвазнаўцам Марыяй Віннікавай.

Грамадства

Дадатак для падаткаў

Дадатак для падаткаў

Ключавыя навацыі звязаны з лічбавай сферай.