Відовішчным момантам праграмы мерапрыемстваў каля мемарыяльнага комплексу «Баграціён» у Светлагорскім раёне стала ваенна-гістарычная рэканструкцыя. У аднаўленні баёў Беларускай наступальнай аперацыі «Баграціён» прынялі ўдзел ваенна-гістарычныя клубы з розных гарадоў краіны.
Жыхары ўсіх раёнаў вобласці, прадстаўнікі працоўных калектываў, дэпутаты, маладзёжныя актывісты сталі ўдзельнікамі мітынгу-рэквіема ў гонар пачатку легендарнай наступальнай аперацыі «Баграціён».
— З нагоды 80-годдзя пачатку лёсавызначальнай аперацыі і дзясятай гадавіны адкрыцця на гэтым месцы памятнага знака мы распачынаем мерапрыемствы ў гонар юбілейнай даты вызвалення Беларусі, — звярнуўся да ўдзельнікаў мітынгу-рэквіема старшыня Гомельскага аблвыканкама Іван Крупко.
Кіраўнік рэгіёна нагадаў, што традыцыя народных патрыятычных праектаў — узвядзення манументаў усім светам была пакладзена менавіта ў Гомельскай вобласці, у Светлагорскім раёне.
— Сёння на Гомельшчыне практычна штогод аднаўляюцца важныя героіка-патрыятычныя манументы. Фінансавы ўдзел у іх абнаўленні і адраджэнні па поклічы сэрца бяруць жыхары не толькі нашага рэгіёна, але і ўсёй Беларусі. Лік людзей, якія прыязджаюць пакланіцца салдатам Перамогі і нявінным ахвярам вайны ў Алу, Партызанскую Крынічку, Азарычы ідзе ўжо на дзесяткі тысяч, а гэта значыць, што мы робім сапраўды добрую справу. Упэўнены, на гэтым важным гістарычным месцы кожнага з нас перапаўняе пачуццё гонару і глыбокай павагі да народа-пераможцы, — падкрэсліў Іван Крупко.
Губернатар адзначыў ініцыятараў рэспубліканскай інфармацыйна-асветніцкай акцыі з нагоды 80-годдзя вызвалення Беларусі ад нямецка-фашысцкіх захопнікаў «Дарогамі славы», якая стартавала на Гомельшчыне. Кіраўнік рэгіёна уручыў памятны знак «80 гадоў вызвалення Гомельскай вобласці ад нямецка-фашысцкіх захопнікаў» дэпутату Палаты прадстаўнікоў Нацыянальнага сходу Беларусі, гендырэктару Нацыянальнай бібліятэкі Вадзіму Гігіну, старшыні Беларускага грамадскага аб’яднання ветэранаў Івану Гардзейчыку, старшыні грамадскага аб’яднання «Белая Русь» і беларускай партыі «Белая Русь» Алегу Раманаву, старшыні грамадскага аб’яднання «Патрыёты Беларусі» Мікалаю Зарубіцкаму, старшыні грамадскага аб’яднання «Беларускі Саюз афіцэраў» Сяргею Бобрыкаву. У сваю чаргу Сяргей Бобрыкаў перадаў Гомельскай вобласці штандарт I Беларускага фронту.
— Калі знаходзішся на гэтай зямлі, пачуцці перапаўняюць, адчуваеш дакрананне да гісторыі, бо менавіта на гэтым месцы войскі 1-га Беларускага фронту роўна 80 гадоў таму прарвалі нямецкую абарону і пайшлі ў наступленне : пачалася самая грандыёзная аперацыя часу Вялікай Айчыннай вайны, увогуле адна з самых маштабных у сусветнай гісторыі — аперацыя «Баграціён». Гэта адбывалася на нашай зямлі. Вораг быў разбіты і ў лічаныя тыдні ўся тэрыторыя Беларусі была вызвалена. Мы – нашчадкі пакалення пераможцаў – павінны быць верныя гэтай памяці. Як заклікаў наш Прэзідэнт, давайце прыходзіць да помнікаў у святочныя і звычайныя дні. Прыходзіць і аддаваць даніну памяці. Тады мы будзем абароненыя нябесным воінствам пакалення пераможцаў, якія аддалі свае жыцці за свабоду нашай краіны, — падзяліўся ў размове з журналістамі дэпутат Палаты прадстаўнікоў Нацыянальнага сходу Беларусі, гендырэктар Нацыянальнай бібліятэкі Вадзім Гігін.
Наталля КАПРЫЛЕНКА
Фота ТК «Гомельшчына афіцыйна»
Наводзіць парадак — з розумам.
Міжнародная спецыялізіваная выстаўка жыллёва-камунальнай гаспадаркі пройдзе ў Мінску.
