Крупко даручыў разгледзець магчымасць растэрміноўкі пры рамонце пацярпелых ад стыхіі 14 ліпеня дамоў

Разгледзець пытанне растэрміноўкі пры правядзенні рамонтных работ у дамах, якія пацярпелі ад штармавога ветру 14 ліпеня. Такое даручэнне даў старшыня Гомельскага аблвыканкама Іван Крупко адпаведным службам у рамках пасяджэння аператыўнага штаба, паведамілі БелТА ў аблвыканкаме.

Іван Крупко падкрэсліў: калі канчаткова вырашыцца пытанне з энергазабеспячэннем у штатным рэжыме і ўсе населеныя пункты будуць пераведзены на пастаянную схему, у рэгіёне актывізуюцца тэмпы рамонтных работ. «Пры аказанні паслуг насельніцтву неабходна зрабіць ацэнку выкананых работ з мінімальнымі надбаўкамі для людзей і разгледзець пытанне прадастаўлення растэрміноўкі да аднаго года», — акцэнтаваў старшыня аблвыканкама.

Адносна алгарытмаў рамонтнай кампаніі, губернатар адзначыў, што грамадзяне могуць самастойна набыць неабходныя матэрыялы, а падраздзяленні ЖКГ дапамогуць з бягучым рамонтам домаўладанняў.

Тэма ліквідацыі наступстваў стыхіі 14 ліпеня ў раёнах Гомельскай вобласці застаецца на пастаянным кантролі Прэзідэнта Аляксандра Лукашэнкі. «Падтрымка нашай вобласці аказана каласальная. Прэзідэнт запатрабаваў максімальнай канцэнтрацыі ўсіх рэсурсаў. У тым ліку на аб’ектах, дзе неабходна ў найкарацейшыя тэрміны правесці работы па рамонце дахаў», — нагадаў Іван Крупко.

У пасяджэнні штаба прыняў удзел міністр энергетыкі Віктар Каранкевіч. «Мы дакладна разумеем, дзе і якія брыгады павінны працаваць. Усяго на дзень задзейнічана 148 аварыйна-рамонтных брыгад. Задача на сёння — закрыць усе заяўкі, якія ёсць ад насельніцтва. Дынаміка станоўчая, прымаем усе меры, каб як мага хутчэй выканаць запланаваныя работы», — запэўніў ён.

На раніцу 21 ліпеня напружаная сітуацыя з падачай энергазабеспячэння ў асобныя домаўладання заставалася ў Жлобінскім і Рэчыцкім раёнах. Энергетыкі арыентаваны зняць пытанні па гэтых напрамках на працягу дня.