2 жніўня Прэзідэнт Беларусі Аляксандр Лукашэнка наведаў Мазырскі раён Гомельскай вобласці, дзе азнаёміўся з ходам работ па ўстараненні наступстваў стыхіі, ад якой у ліпені пацярпеў гэты і шэраг іншых рэгіёнаў краіны.
Кіраўніку дзяржавы далажылі аб устараненні ў Гомельскай вобласці і Мазырскім раёне наступстваў урагану, забеспячэнні электразабеспячэння ў пацярпелых рэгіёнах, устараненні наступстваў стыхіі лесагаспадарчымі ўстановамі.
Аляксандр Лукашэнка паставіў задачу правільна арганізаваць дапамогу насельніцтву ў пацярпелых ад стыхіі раёнах. «Трэба глядзець (сітуацыю на месцах. — Зв.). Людзей крыўдзіць не трэба. Калі ўжо так здарылася, трэба людзям дапамагчы як належыць», — падкрэсліў беларускі лідар.
Прэзідэнт даручыў дадаткова праверыць, ці няма бардаку з забяспечанасцю і выдзяленнем піламатэрыялаў, шыферу і ўсяго таго, што трэба для аднаўлення пабудоў. Наконт гэтага кіраўніку дзяржавы паступала некаторая інфармацыя. Аляксандр Лукашэнка падрабязна цікавіўся гэтым у адказных асоб.
Аляксандр Лукашэнка даручыў грунтоўна вывучыць сітуацыю ў кожным канкрэтным выпадку, забяспечыць неабходныя аб’ёмы будаўнічых матэрыялаў. «Мы павінны бачыць, што на складзе ёсць, туды падвозім (у месца правядзення работ. — Зв.) — брыгады працуюць. Не прастойваюць з-за дэфіцыту крокваў, лачання або шыферу», — сказаў ён.
Старшыня Гомельскага аблвыканкама Іван Крупко запэўніў, што не дапускаецца ніводнага дня прастою, работы вядуцца ў напружаным графіку.
«Удваіх (разам з Камітэтам дзяржкантролю. — Зв.) паглядзіце ад жыцця рэальна. Што за праблема — пагаварыць з людзьмі? Не проста паставіць птушачку, што не хапіла шыферу або лачання. Таму трэба разабрацца ад жыцця», — даручыў Прэзідэнт.
Рэагуючы на словы падзякі ад кіраўніка рэгіёну, Аляксандр Лукашэнка перапыніў яго наступнымі словамі: «Без падзяк. За што тут дзякаваць? Вось людзі дзякуй скажуць, гэта — галоўнае».
Кіраўніку дзяржавы далажылі аб ходзе аднаўленчых работ у вобласці, у тым ліку на сацыяльных аб’ектах. «Калі скончацца работы, усё пералічым. Спытаемся за тое, калі безгаспадарлівасць была ці няправільна лічылі, а ўсё, чым ім трэба дапамагчы, мы ім павінны аддаць. Але пасля пераўліку. Сёлета грошы павінны быць вернутыя ўсё на месца — тое, што трэба», — даручыў беларускі лідар.
«У тэрмін вы памрыце, але зрабіце. І майце на ўвазе — мы пераправерым. Хлусні быць не павінна. Крый вас божа, калі будзе нейкая хлусня. Спытаем больш жорстка», — папярэдзіў беларускі лідар.
Што датычыцца энергетыкі, Прэзідэнту далажылі, што ўсе населеныя пункты забяспечваюцца ўжо электраэнергіяй праз пастаянныя лініі электраперадач без выкарыстання электрагенератараў. «Калі ўсе вёскі і домаўладанні падключаны да электрычнасці — гэта добра. Таму што галоўнае цяпер — каб людзі не крыўдзіліся, што мы не можам даць электрычнасць», — адзначыў ён.
Аляксандр Лукашэнка таксама звярнуў увагу на неабходнасць паступовай замены старых ліній электраперадач. «Там, дзе паламаліся, дзе старызна гэта, — трэба ставіць новыя апоры», — сказаў кіраўнік дзяржавы.
Стыхія ў сярэдзіне ліпеня нанесла ўрон не толькі населеным пунктам і інфраструктуры, але і тэрыторыям з пахаваннямі. «Могілкі трэба прыводзіць у парадак», — даручыў Аляксандр Лукашэнка.
Канешне, задача не першачарговая, але і пра яе забываць нельга. Навядзенне парадку, уборка паваленых дрэў, аднаўленне помнікаў — усё гэта трэба вырашаць ва ўзаемадзеянні з насельніцтвам.
Адно з галоўных пытанняў — перапрацоўка пашкоджанага і паваленага лесу, а следам — даручэнне аператыўна заняцца лесааднаўленнем. Да гэтага трэба ў тым ліку прыцягнуць і насельніцтва, працоўныя калектывы, студэнтаў. «Мы павінны за будучы год усё гэта аднавіць. За зіму трэба спланаваць. Шулейка (віцэ-прэм’ер. — Зв.) мне ўчора дакладваў, што саджанцамі мы забяспечаны. Трэба парадак навесці. Толькі так мы можам выратаваць гэтыя пустыя кавалкі», — сказаў Аляксандр Лукашэнка.
Такі самы падыход па навядзенні парадку Прэзідэнт патрабуе забяспечыць і ў сельскай гаспадарцы. Ён у прыватнасці ўказаў на сур’ёзныя недахопы ў пытаннях узворвання палёў у рэгіёне, што добра відаць з борта верталёта.
Прэзідэнт на адным з участкаў азнаёміўся з работамі па ачыстцы ветравальна-бураломных лесасек. Як аказалася, у гэтым месцы паваліла ўжо саспелы лес узростам да 100 гадоў. «Даўно трэба было гэты лес прыбраць. Гэта ж дзелавая драўніна. 80-100 гадоў. Ты не прыбраў. Вось табе бог дапамог — паваліў усё. Цяпер будзем у аўральным рэжыме гэта ўсё збіраць», — заўважыў беларускі лідар.
Кіраўнік дзяржавы звярнуў увагу, што на сусветным рынку зараз аднавіўся попыт на лесаматэрыялы, і айчынная прадукцыя будзе запатрабавана.
Асобную ўвагу Аляксандр Лукашэнка звярнуў на неабходнасць аптымальнага вырашэння пытанняў па дадатковай перакідцы сіл і тэхнікі. Каб не было сітуацыі, калі недзе харвестары прастойваюць у той час, як яны запатрабаваны ў пацярпелых ад стыхіі раёнах.
Пасля дакладаў чыноўнікаў і азнаямлення з ходам работ Прэзідэнт у Мазырскім раёне цёпла паразмаўляў з жыхарамі аграгарадка Прудок.
«Якія ў вас катастрафічныя пытанні да мяне?» — спытаў Прэзідэнт.
Людзі адказалі, што такіх няма, і ўсе асноўныя пытанні аператыўна вырашаюцца.
«Нам трэба Гомельскую вобласць у парадак прыводзіць. Цэлага міністра вам накіравалі (старшыня Гомельскага аблвыканкама Іван Крупко да гэтага ўзначальваў Мінсельгасхарч. — Зв.). Гэта ўжо сорамна будзе, калі вы не адродзіце Гомельскую вобласць. Але ў яго заўсёды праблемы: у мінулыя гады ён мне ўсё скардзіўся, што высахла ўсё, сёлета, гаворыць, заліло».
Кіраўнік дзяржавы нагадаў: вясной многія меркавалі, што летам надвор’е будзе засушлівым і ўвесь ураджай можа загінуць. Аднак выйшла наадварот.
«Я вас папярэдзіў, што будзе перыядамі: будуць ісці дажджы і будзе суха. Гэта добра, асабліва для Гомельскай вобласці. Вы ж не Гродзенская вобласць і не Украіна, дзе чарназём: у нас жа пясочку тут хапае. Але, шчыра кажучы, гамяльчане аказаліся. не гатовыя да гэтай сітуацыі, таму рабіце высновы, што апрацоўваць будзем. Гомельскую вобласць трэба прыводзіць у парадак. Вельмі дрэнна працуюць аграрыі нашы, недапахваем палі: палову ўзаралі, палову кінулі. Таму мы тут з Іванам Іванавічам за зіму падумаем, як. Але і людзям трэба дысцыпліну падцягваць. Спадзявацца на тое, што да нас нехта прыйдзе, зробіць — чаго спадзявацца», — падкрэсліў Аляксандр Лукашэнка.
«Вы ў добры дзень прыехалі: сёння свята Ілья (Ільін дзень. — Зв.)», — адзначылі жыхары аграгарадка.
Кіраўнік дзяржавы пацікавіўся, што яшчэ не зроблена пасля ўрагану, які прайшоў у ліпені, ці дапамаглі мясцовыя ўлады з аднаўленнем пабудоў і рамонтам дамоў.
«Усе зрабілі!» — адгукнуліся грамадзяне.
«Я хачу праверыць начальнікаў, ці паспяваюць яны зрабіць тое, аб чым дамаўляліся», — растлумачыў Прэзідэнт.
«Паспяваюць!» — заявілі мясцовыя жыхары.
«Дах, каму сарвала, зрабілі? Я маю на ўвазе дахі дамоў. Усё трэба аднавіць, як было. кроквы, лачанне, шыфер — усё гэта зрабілі, так? Добра. Электрычнасць падалі, падвялі да кожнай хаты? Гэта таксама добра. Тое. ёсць жыццё адноўлена», — адзначыў Аляксандр Лукашэнка.
Як расказалі кіраўніку дзяржавы, у выніку непагадзі было пашкоджана шмат гаспадарчых аб’ектаў, адміністрацыйных будынкаў і жылых памяшканняў. «Але ўсё было адноўлена ў першыя дні», — заявілі жыхары.
«Калі будзем працаваць і не будзе ў нас адно да аднаго пытанняў, паверце, вайны не будзе. Гэта ўсё залежыць толькі ад вас, не ад мяне. Вы бачыце, што мы стараемся ўсялякімі шляхамі, каб гэта зараза сюды не прыйшла, — падкрэсліў Прэзідэнт. — Натапырыліся яны дзесьці там — мы ім у лоб выстраілі сваю армію. Яны адвялі войскі — мы адвялі. Мы не ваюем і не хочам ваяваць».
Разам з тым Аляксандр Лукашэнка папярэдзіў, што Беларусь гатова за сябе пастаяць у выпадку неабходнасці, аднак вайна — гэта заўсёды дрэнна. «Гэта загінуць з усіх бакоў людзі. Тысячы, тысячы людзей гінуць на вайне. Таму нам вайна не патрэбна. Гэта маё пытанне. Калі будуць праблемы, я да вас звярнуся, мы возьмем зброю і будзем абараняць зямлю. Але лепш не ваяваць, і мы гэтай вайны не хочам», — заявіў беларускі лідар.
«Мы заўсёды побач!» — падтрымалі Прэзідэнта жыхары аграгарадка.
Кіраўнік дзяржавы расказаў, як ішлі перагаворы аб абмене зняволенымі паміж Расіяй і Захадам.
«Вы бачылі рабят павыцягвалі. Нас папрасілі — мы падключыліся да гэтага, дапамаглі чым маглі. Людзей вызвалілі, якіх на Захадзе пажыццёва зняволілі. Праўда, на гэтым нехта тыпу прэзідэнта ЗША аўтарытэт свой набівае, хоць ён да гэтага не меў ніякага дачынення. «Спецслужбы вялі гэтыя перагаворы, нават дыпламатаў не падключалі. Мы дамовіліся, што ціха будзем рабіць — пачалі гарлапаніць на ўвесь свет. Гэта робіцца ціха, гэта ж жыцці людзей», — сказаў Аляксандр Лукашэнка.
Ураджэнец Германіі Рыка Крыегер, у дачыненні да якога Прэзідэнт Беларусі прыняў рашэнне аб памілаванні, быў прызнаны вінаватым па шасці артыкулах Крымінальнага кодэкса і прыгавораны судом да выключнай меры пакарання за ўчыненне тэракта. «А калі б, крый божа, загінулі людзі? Гэта добра, што абышлося, — адзначыў кіраўнік дзяржавы. — Людзьмі мы не гандлюем. Аддалі немца, каб дапамагчы людзям забраць гэтых небаракаў. Што ў гэтым дрэннага? І немец гэты жывы, і гэтага хлопца выратавалі».
Аляксандр Лукашэнка заявіў, што ўлады ў такіх сітуацыях будуць рабіць мудра, так, як выгадна для краіны і людзей. «Таму ад вас толькі адно, я вас вельмі прашу: трэба сваёй справай займацца, трэба ўсё рабіць», — падкрэсліў ён.
Размаўляючы з жыхарамі аграгарадка Прудок, кіраўнік дзяржавы пракаментаваў чуткі аб сваім здароўі.
«Нашы збеглыя ж да прэзідэнцкіх выбараў таксама рыхтуюцца. Выпрацавалі праграму: перш за ўсё трэба паказаць, што Прэзідэнт абакраў усіх. Я проста аб гэтым кажу: калі ласка, забярыце! Забярыце мае грошы. Кажуць, у Эміратах — едзьце, забярыце. Цяпер грошы схаваць немагчыма, — падкрэсліў Аляксандр Лукашэнка. — Бачаць, не праходзіць: браць няма чаго. Майце на ўвазе: прынцыпова для мяне: не чапай чужое, мяне маці заўсёды вучыла».
Прэзідэнт адзначыў, што некаторыя людзі прывыклі разважаць так: калі чалавек ва ўладзе, то ён абавязкова недзе нешта крадзе. «Факты на стол. Калі вы мяне ў нечым абвінавачваеце або я вас, дык вы дакажыце гэта, — сказаў кіраўнік дзяржавы. — Другую тэму ўзялі: раз „злодзей“ не праходзіць, значыць, здароўе — памірае. Мяне хаваюць ужо гадоў 25 дакладна. Ды я не збіраюся. Я ў бога прашу толькі аднаго: каб і далей так было са здароўем».
«Прыемна было з вамі сустрэцца! Я часта гавару: калі вельмі дрэнна (або настрой дрэнны, або здароўе нейкі), да людзей трэба ехаць. У глыбінку! Хаця вы не глыбінка, але дзякуй вам», — падсумаваў беларускі лідар.
Паводле прэс-службы Прэзідэнта
Фота: БелТА
У Гродзенскай вобласці турыстычны прадукт становіцца ўсё больш разнастайным.
Галоўны ўрач санаторыя «Беларусачка» у наступным годзе адзначыць паўвекавы юбілей сямейнага жыцця.
Цэны на ліквіднае жыллё ў сталіцы выраслі на 5 працэнтаў.
