У дождж неабходна быць асабліва ўважлівымі на дарозе

У дождж вадзіцелям неабходна быць асабліва ўважлівымі на дарозе. Пра гэта паведамілі ў МУС.

Сёння на большай частцы тэрыторыі краіны прагназуюцца кароткачасовыя дажджы, у асобных раёнах прагрымяць навальніцы. У складаных умовах надвор’я неабходна выбіраць бяспечную для канкрэтнай дарожнай сітуацыі хуткасць і не здзяйсняць неабдуманых манеўраў. Пры пагаршэнні бачнасці варта ўключаць блізкае святло фар, вытрымліваць бяспечную дыстанцыю і бакавы інтэрвал, пазбягаць рэзкіх тармажэнняў і рухаў рулём.

Падчас дажджу значна змяншаецца каэфіцыент счаплення колаў з дарогай, што можа прывесці да павелічэння тармазнога шляху і страце кіравальнасці. У пазбяганне ўзнікнення аквапланавання трэба праязджаць лужыны на мінімальна магчымай хуткасці, трымаючы руль прама.

Калі з-за інтэнсіўнасці ападкаў працягваць рух немагчыма, варта спыніцца за межамі праезнай часткі з уключанай аварыйнай сігналізацыяй, вонкавымі светлавымі прыборамі і перачакаць лівень. Трэба паспрабаваць не паркавацца пад дрэвамі, зблізку канструкцый з высокай ветразнасцю і слаба замацаваных.

Вадзіцель і пасажыры павінны быць прышпілены рамянямі бяспекі, а дзеці да 12 гадоў — перавозіцца ў спецыяльных прыладах.

Пешаходам трэба пачынаць пераход дарогі толькі пераканаўшыся, што вадзіцелі іх заўважылі і прапускаюць. Ім таксама неабходна пазначыць сябе адзеннем павышанай бачнасці, а ў цёмны час сутак пры руху ўздоўж праезнай часткі — святлоадбіўнымі элементамі. У непагадзь трэба адмовіцца ад перамяшчэння на сродках персанальнай мабільнасці і веласіпедах.

Супрацоўнікі ДАІ арыентаваны на аказанне дапамогі ўдзельнікам дарожнага руху і забеспячэнне бяспечных умоў руху.