Качанава расказала аб добраўпарадкаванні Мінска

Добраўпарадкаванне павінна праводзіцца на сістэмнай аснове, заявіла старшыня Савета Рэспублікі, упаўнаважаны прадстаўнік кіраўніка дзяржавы ў г. Мінску Наталля Качанава падчас нарады з кіраўніцтвам сталіцы, паведамляе БелТА.

«Навядзенне парадку і добраўпарадкаванне ў летні перыяд працягваецца, але ўжо не за гарамі восень, калі трэба дзесьці будзе выканаць пасадкі. Але яшчэ ёсць магчымасць для завяршэння работ па капітальным рамонце, роўна так, як і незавершаныя будаўнічыя аб’екты», — сказала Наталля Качанава.

Спікер канстатавала: у Мінску ёсць вялікая колькасць зон адпачынку, паркаў, сквераў. Прычым, у кожным раёне. Але работы па стварэнні новых зон адпачынку працягваюцца. «І па выніках усіх гэтых мерапрыемстваў у горадзе будзе 80 новых зон адпачынку для насельніцтва. І гэта, вядома, добры прыклад для іншых рэгіёнаў нашай краіны, калі вы ўласнымі сіламі, сіламі прадпрыемстваў і арганізацый, жыхароў горада робіце такія зоны адпачынку. Гэта выдатна. Але нам трэба ўсё дашліфаваць, каб у нас нідзе не было такіх "мёртвых" зон, скажам так», — адзначыла старшыня Савета Рэспублікі.

Але парадак павінен быць усюды, падкрэсліла Наталля Качанава. «Мы кажам, што прадпрыемствы, арганізацыі, установы наводзяць парадак. Але жылыя дамы, дваровыя тэрыторыі... Часам едзеш: крок направа, крок налева — бачыш цокаль, зелянінай пакрыты, трава расце ўздоўж фасадаў. Так не павінна быць. Гэта не для горада Мінска. Усё павінна быць на сістэмнай аснове. Не можа быць у Мінску па-іншаму. Не толькі праспекты і цэнтральныя вуліцы, увесь горад Мінск, каб на ўскраінах было не горш, чым у цэнтры горада. Таму трэба глядзець увесь горад у комплексе», — дапоўніла спікер. 

У нарадзе прымаюць удзел старшыня Мінскага гарадскога выканаўчага камітэта Уладзімір Кухараў і яго намеснікі, памочнік Прэзідэнта — інспектар па г. Мінску Юрый Фралоў, а таксама кіраўнікі адміністрацый раёнаў горада.

Прэв’ю: БелТА