Расіянін прыехаў на граніцу з ЕС у Беларусі за неіснуючым аўто, набытым у ілжэпрадаўцоў

Расіянін прыехаў на граніцу з ЕС у Беларусі за неіснуючым аўто, набытым у ілжэпрадаўцоў. Пра гэта паведамілі ва УУС Гродзенскага аблвыканкама. 

Па дапамогу ў пошуку махляроў і вяртанні грошай пацярпелы звярнуўся ў органы ўнутраных спраў Гродзенскай вобласці.

Грамадзянін Расіі на папулярнай гандлёвай інтэрнэт-пляцоўцы знайшоў аб’яву аб продажы аўтамабіля з Еўрасаюза. Мужчыну зацікавіў Toyota Land Cruiser 2014 года выпуску, які абышоўся б яму ў 2 млн расійскіх рублёў. Дыялог з прадаўцом вёўся праз WhatsApp. Праз мэсэнджар пакупніку адправілі неабходныя для заключэння дамовы дакументы. Была прызначаная перадаплата ў памеры 42 тыс. расійскіх рублёў. Асаблівасцю здзелкі было тое, што пакупнік павінен быў прыехаць у Беларусь у пункт пропуску ў Воранаўскім раёне і самастойна забраць аўтамабіль.

Прадавец быў вельмі пераканаўчы, так што ў грамадзяніна не ўзнікла ніякіх сумневаў. Мужчына паклаў на рахунак паказаную суму, а сам адправіўся на граніцу, дзе набытага аўтамабіля, аднак, не было, а прад’яўленыя расіянінам дакументы апынуліся несапраўднымі.

За махлярства ў буйным памеры Воранаўскім раённым аддзелам Следчага камітэта распачата крымінальная справа.

Прэв’ю: БелТА