Выдавецтва «Беларусь» да канца года выпусціць падборку кніг для патрыятычнага выхавання дзяцей

Выдавецтва «Беларусь» да канца года плануе выпусціць падборку кніг для патрыятычнага выхавання дзяцей. Пра гэта распавяла журналістам загадчыца аддзела рэкламы выдавецтва «Беларусь» Анжэла Садоўская, паведамляе БелТА.

«Навучальны працэс непарыўна звязаны з выхаваўчай працай. Выдавецтва "Беларусь" падручнікі не выпускае, але ўся наша літаратура накіравана на выхаванне патрыятызму ў дзяцей. Самае галоўнае-навучыць дзяцей любіць Радзіму. І пачынаць прывіваць гэтую любоў можна з самага ранняга ўзросту», — сказала Анжэла Садоўская.

Навінкай, якая распавядае пра Беларусь і прывівае любоў да краіны, стала кніга «Усе дарогі вядуць да нас: Геаграфічнае становішча Беларусі». «Яна разлічана на дзяцей малодшага школьнага ўзросту. Але ўжо з 4-5 гадоў бацькі могуць чытаць дзецям гэтую кнігу. Яна ўнікальная маляўнічымі ілюстрацыямі і займальнай формай падачы інфармацыі. Па вопыце, дзеці ўвечары аддаюць перавагу гэтай кнізе больш, чым любыя казкі», — дадала загадчык аддзела.

Выдавецтва плануе да канца года выпусціць яшчэ некалькі падобных кніг. «Гэтая кніга знаёміць з геаграфічным становішчам, нашымі шасцю абласцямі, з якімі краінамі мы мяжуем. Усё пачынаецца з гімна, дзяржаўных і нацыянальных сімвалаў. Да канца года мы плануем яшчэ пяць кніг з гэтай серыі, якія будуць асобна прысвечаны архітэктуры, культуры, знакамітым землякам. Разлічваем, што гэтыя кнігі будуць добрымі памочнікамі і выхавальнікам у дзіцячых садках, і настаўнікам для пазакласных заняткаў», — адзначыла Анжэла Садоўская.

Працягнула Выдавецтва працу і над ужо традыцыйнымі серыямі: «Гісторыя для школьнікаў», якая расказвае пра герояў Вялікай Айчыннай вайны," Школьная бібліятэка", якая выпускаецца як для школьнікаў, так і аматараў класікі," Беларуская дзіцячая энцыклапедыя", прысвечаная гістарычным і знамянальным падзеям краіны.

Прэв’ю: БелТА