Як пачынаўся творчы шлях гурта «Яркія»?

«Яркія» — гэта слова асацыюецца з летам, святам, шчасцем і... з аднайменным кавер-гуртом, які сваімі выступленнямі дорыць усё гэта гледачам. Мы сустрэліся з удзельнікамі калектыву і даведаліся, з чаго пачынаўся іх творчы шлях, якія каверы з’яўляюцца любімымі  ў публікі і як музыка дапамагла знайсці каханне.

— З большасцю ўдзельнікаў, якія сёння ў калектыве, мы знаёмыя з 2020 года. На той момант мы працавалі ў кавер-групе «Бязмежжа». Але неўзабаве вырашылі падкрэсліць нашу індывідуальнасць і сталі кавер-гуртом «Яркія», — распавядае Юліяна Грышановіч. — Чаму такая назва? 

Тут усё проста, бо менавіта гэтым словам можна ахарактарыхаваць кожнага з нашай групы. Усяго ў склад уваходзіць шэсць музыкаў (адзін вакаліст і пяць інструменталістаў): барабаншчык, бас-гітарыст, электрагітарыст, тамбаніст і саксафаніст. Усе мы — прафесійныя музыканты з вышэйшай адукацыяй — скончылі ўніверсітэт альбо кансерваторыю.

— Менавіта назва «Яркія» цалкам падкрэслівае фармат і настрой нашай працы на сцэне, а таксама індывідуальнасць кожнага з нас. І яна лёгка запамінаецца і пакідае пазітыўныя эмоцыі, пра што заўсёды сведчыць зваротная сувязь ад заказчыкаў і арганізатараў, — дадае Міхаіл Парфяновіч.

Першае выступленне, якое адбылося ў клубе ў Смаргоні, гурт помніць да сёння. Тады яны хваляваліся і не ведалі, як прыме іх публіка.

— Акцэнт зрабілі на інтэрактыўную праграму і поўнае ўцягванне гледачоў у працэс выступлення з выкарыстоўваннем душэўнага і фізічнага кантакту. Вядома, цяпер у нас практычна няма невырашальных сітуацый, а вось падчас першага выступу пад маніторамі знаходзіліся лісты фармату А4 з пазнакамі тэкстаў песень і падводкамі паміж імі. Але, нягледзячы на нашы перажыванні і хваляванні, людзі ўключыліся, і заказчык застаўся задаволены, — згадвае Уладзімір Кавалеўскі.

— Кожны наш глядач, слухач важны і блізкі нам. На нашых выступленнях збіраюцца людзі самага рознага ўзросту, і нам удаецца разварушыць нават самых уседлівых. Пад нашы песні танчаць дзеці, моладзь, і нават людзі сталага ўзросту не застаюцца абыякавымі. А ў гэтым і ёсць галоўны кайф артыста — бачыць аддачу сваёй аўдыторыі, — далучаецца да размовы Міхаіл Парфяновіч.

Як і ў любым калектыве, у «Яркіх» ёсць лідар, але разам з тым за кожным замацаваныя пэўныя абавязкі, адзначае Іван Боеў: «Напрыклад, хтосьці займаецца менеджарскімі пытаннямі, іншы адказвае за вядзенне інстаграма, ёсць яшчэ адказны за тэхнічную частку». А вось рэпетыцыі залежаць ад сезона выступленняў. Як распавёў Ігар Дзіўкоў, «у летні і зімовы перыяд колькасць работ не дазваляе рэпеціраваць часта. Але гэтага і не патрабуецца, бо ў міжсезонне мы збіраемся па тры разы на тыдзень, каб падрыхтаваць паўнавартасную музычную і інтэрактыўную праграмы».

— А як падбіраеце рэпертуар для сваіх выступленняў?

— Песня павінна быць на слыху і пэўным хітом, каб захапіць публіку. 

Ну, і, вядома, пры выбары ўлічваем і ўзроставы дыяпазон гледачоў, заяўлены заказчыкам. Пэўнымі любімчыкамі публікі з’яўляюцца трэкі «Белыя ружы» і «Сёмы пялёстак». А што да нашых фаварытаў, то гэта трэкі гурта «Брава», Рыкі Марціна, Нірваны. Увогуле, нам падабаюцца ўсе песні з нашага рэпертуару, — кажа Міхаіл Парфяновіч.

Што да стылю касцюмаў і вобразаў, то тут сама назва калектыву дае ім поўную прастору для творчасці. Як распавёў Герман Біткоў, усе касцюмы падбіраюць яны самастойна:

— У кожнага з нас ёсць свая ідэя, і мы ўлічваем гэта пры выбары вобразаў. На дадзены момант маем два вобразы: адзін з іх вулічны, маладзёжны, у прамым сэнсе яркі, а другі вобраз спалучае ў сабе стрыманасць і стыль, ён набліжаны да класікі. Але і тут нам падабаецца вылучацца. Увогуле, прыходзьце на нашы выступленні, і самі ўсё ўбачыце!

Што да планаў змяніць фармат кавер-гурта і перайсці да песень уласнага складання, то гэта таксама ёсць у планах «Яркіх». Бо, як адзначае Юліяна Грышановіч, як кавер-гурт яны ўжо дасягнулі пэўнай пазнавальнасці, навучыліся працаваць з публікай і цяпер самы час заняцца прасоўваннем уласнага музычнага матэрыялу калектыву: «Хочацца дастукацца праз музыку да сэрцаў кожнага нашага слухача, таму мы не спяшаемся, а якасна і прадукцыйна працуем над гэтым пытаннем».

— Ці часта гастраліруеце і якія цікавыя выпадкі здараюцца ў такіх паездках?

— Так, гастраліруем мы даволі часта, у тым ліку і за межамі нашай краіны. Здараецца рознае, але ў большасці штосьці пазітыўнае. З прыемнага — дораць падарункі, а таксама трое з нашага кавер-бэнду знайшлі свае другія палавінкі дзякуючы выступленням, — дзеліцца Уладзімір Кавалеўскі.

— Ці ёсць у вас прафесійная мара?

— Было б выдатна стаяць на адной сцэне з заслужанымі артыстамі нашай краіны, гэта быў бы цікавы і карысны досвед для нас. Калі казаць больш шырока, то, як і любому творчаму калектыву, нам важныя прызнанне і любоў публікі. Таму плануем пашыраць маштаб мерапрыемстваў, хочацца пакінуць яскравы след у жыцці кожнага нашага слухача. Ды і ў цэлым, выступаць для нашай публікі — вялізная каштоўнасць для нас, таму мы сочым за тымі, хто скарае вышыні беларускіх сцэн, і імкнёмся да гэтага таксама.

Ангеліна НОВІКАВА

Фота з архіва кавер-гурта «Яркія»