Крупко павіншаваў вучняў Залескай школы з Днём ведаў

Кіраўнік рэгіёна павіншаваў з Днём ведаў вучняў і іх бацькоў, педагогаў Залескай сярэдняй школы Чачэрскага раёна. 

Сёлета сельская ўстанова адукацыі папоўнілася 14 першакласнікамі. Усяго ў школе ў гэтым навучальным годзе будуць навучацца 117 дзяцей. Залеская сярэдняя школа — знакаміта не толькі ў Чачэрскім раёне, але і вобласці развіццём розных кірункаў пазакласнай навучальнай дзейнасці. У ёй вучацца дзеці з васьмі населеных пунктаў. Пры цесным супрацоўніцтве з Чачэрскім спецлясгасам у школе развіваюць экалагічнае выхаванне вучняў. Функцыянуе вучэбна-кансультацыйны цэнтр па радыяцыйнай бяспецы з усім неабходным радыеметрычным абсталяваннем. На прылеглай тэрыторыі сіламі педагогаў і вучняў закладзены пладова-ягадны гадавальнік, які налічвае звыш васьмі тысяч саджанцаў пладовых дрэў. На гэтых летніх канікулах школа традыйцына далучылася да праекту другаснай занятасці навучэнцаў. Мясцовыя хлопцы і дзяўчаты атрымалі магчымасць зрабіць карысную справу для роднай школы і зарабіць свае першыя грошы: працавалі на прышкольным участку і ў цяпліцах, дапамагалі з праполкай і зборам ураджаю, добраўпарадкоўвалі прышкольную тэрыторыю. Гэтым летам школа пачала развіваць новы праект па мядовым турызме і апітэрапіі — лячэнні пчоламі. 

Старшыня аблвыканкама Іван Крупко азнаёміўся з арганізацыяй навучальнага працэсу ў школе, добраўпарадкаваннем прысядзібнай тэрыторыі. Як было адзначана, установа адукацыі значна пацярпела падчас летняга ўрагану. Дзякуючы падтрымцы органаў улады, педагогаў і сем’яў вучняў аднаўленчыя работы ўдалося завяршыць да пачатку навучальнага года.

Падчас урачыстай лінейкі з нагоды Дня ведаў старшыня аблвыканкама Іван Крупко заклікаў школьнікаў імкнуцца належна вучыцца, каб у будучым выбраць прафесію па душы і вярнуцца працаваць на малую радзіму.

— Гэта займальнае падарожжа ў свет ведаў і адкрыццяў, новы этап жыцця на шляху інтэлектуальнага, духоўнага і спартыўнага росту, — з пачаткам новага навучальнага года хлопчыкаў і дзяўчынак павіншаваў Іван Крупко. — Для мяне як для кіраўніка вобласці важна, каб усе дзеці вучыліся, выхоўваліся і развіваліся ў роўных умовах. Выпускнікі вашай школы гэтага года, якія ўсё паступілі ў прэстыжныя ВНУ краіны, яскравы прыклад таго, што гэта магчыма, — зазначыў старшыня аблвыканкама.

Кіраўнік рэгіёну ўручыў дырэктару Залескай сярэдняй школы Чачэрскага раёна Яўгену Цалка грашовы сертыфікат на дзесяць тысяч рублёў для далейшага ўмацавання матэрыяльна-тэхнічнай базы школы.

Наталля КАПРЫЛЕНКА

Фота ТК «Гомельшчына афіцыйна»