У Магілёве адкрыўся ліцэй МУС — другі ў сістэме гэтага ведамства пасля Мінску

Удзел ва ўрачыстасцях прынялі старшыня Магілёўскага аблвыканкама Анатоль Ісачанка, першы намеснік кіраўніка Адміністрацыі Прэзідэнта Наталля Пяткевіч, міністр унутраных спраў, генерал-лейтэнант міліцыі Іван Кубракоў.

Комплекс будынкаў па вуліцы Бялінскага, якія былі перададзены Беларускай жалезнай дарогай пад ліцэй МУС, пераўтварыліся да непазнавальнасці. У спальным корпусе — 50 пакояў, разлічаныя на чатыры чалавекі. Усе яны абсталяваныя камфортнай мэбляй, ёсць тэлевізар і інтэрнэт, для зручнасці прадугледжаны трансформеры-перагародкі. Да паслуг ліцэістаў сучасная актавая зала 250 месцаў і бібліятэка, бытавыя і вучэбныя памяшканні з інтэрактыўнымі дошкамі, зручныя санвузлы і прасторная сталовая. На прылеглай да ліцэя тэрыторыі размешчаны спартыўныя пляцоўкі для гульні ў міні-футбол, валейбол і баскетбол. Ёсць барцоўская і трэнажорная залы, інтэрактыўны цір і клас харэаграфіі. Маці ліцэістаў, якіх запрасілі на экскурсію па навучальнай ўстанове засталіся задаволенымі. У Год якасці ліцэй стаў цудоўным падарункам гораду і наогул краіне. Ён адчыніў свае дзверы для 154 навучэнцаў з розных рэгіёнаў, яны залічаны ў 7-10 класы. Наогул конкурс быў амаль 5 чалавек на месца. 

Міністр унутраных спраў, генерал-лейтэнант міліцыі Іван Кубракоў нагадаў, што пачаткам адкрыцця ведамаснага ліцэя ў Магілёве стала яго размова з Прэзідэнтам. 

— Летась, калі я дакладваў кіраўніку дзяржавы аб рабоце органаў унутраных спраў і праблемных пытаннях, я закрануў тэму будаўніцтва спецыялізаваных міліцэйскіх устаноў адукацыі ў рэгіёнах, — удакладніў ён. — Высветлілася, што шмат жадаючых паступіць у іх. І Прэзідэнт сказаў, што трэба ім такую магчымасць дасць. 

У сціслыя тэрміны была зроблена праектна-каштарысная дакументацыя і літаральна за 7 месяцаў пабудаваны практычна новы будынак. Каб здаць аб’ект да пачатка вучэбнага года, будаўнікі працавалі ў тры змены. Міністр МУС папярэдзіў, што ў бліжэйшы час адбудзецца таксама глабальная рэканструкцыя аднаго са спартыўных аб’ектаў Магілёва, з якога зробяць цалкам новы спартыўны комплекс. Гэта будзе яшчэ адзін падарунак не толькі сілавому блоку Магілёўшчыны, а і ўсёй Магілёўскай вобласці.

— У ліцэі для рабят створаны выключныя ўмовы, — падкрэсліў Іван Кубракоў. — Яны будуць на поўным дзяржаўным забеспячэнні, адной толькі формы адзення ў іх будзе чатыры, у тым ліку і спартыўная. Мы таксама набылі аўтатранспарт, каб рабяты змаглі ўбачыць Брэсцкую крэпасць, Лінію Сталіна — усе знакавыя аб’екты нашай краіны. Мы будзем выхоўваць сапраўдных патрыётаў нашай радзімы.

Для ліцэістаў першы вучэбны дзень пачаўся з урачыстай прысягі. Было бачна, як яны адначасова хвалююцца і ганарацца. Маладыя людзі чыталі словы клятвы на вернасць Радзіме і беларускаму народу, звонка чаканілі. «Служу Рэспубліцы Беларусь». Міністр МУС павіншаваў ліцэістаў з важнай ў іх жыцці падзеяй, з уступленнем у так званае ганаровае брацтва. А самаму юнаму ліцэісту па традыцыі ўручыў свой наручны гадзіннік. 

Для прысутных прагучала некалькі музычных нумароў, напрыканцы самыя юныя навучэнцы запусцілі ў неба белых галубоў. 

Першы намеснік кіраўніка Адміністрацыі Прэзідэнта Наталля Пяткевіч адзначыла, што вельмі прыемна бачыць маладое пакаленне, якое асэнсавана выбірае свой шлях і паступае вось у такія спецыялізаваныя ўстановы, каб звязаць сваё жыццё з аховай правапарадку.

— Цудоўна, што з ранніх гадоў падлеткі маюць магчымасць вызначыцца і прыняць усвядомленае рашэнне, — рэзюмавала яна. — Асабліва важна, што так шмат рабят жадае служыць сваёй Айчыне прафесійна. І тое, што іх у гэтым падтрымліваюць бацькі. 

Старшыня Магілёўскага аблвыканкама Анатоль Ісачанка падкрэсліў, што ліцэй МУС стане тым самым месцам, дзе малады чалавек зможа навучыцца быць сапраўдным мужчынам і абаронцам сваёй краіны. 

— Такія ліцэі дысцыплінуюць, даюць разуменне свайго месца ў жыцці, паняцця, што значыць быць сапраўдным патрыётам, — падкрэсліў губернатар. — Вельмі прыемна, што сёлета, у Год якасці, у Магілёве адкрылася адначасова два важных і сучасных аб’екта. Акрамя ліцэя, гэта яшчэ і доўгачаканая школа на 1020 месцаў. У жыцці вельмі важна, каб чалавек мог не толькі атрымаць веды, але і стаў годным грамадзянінам сваёй краіны. І выхаваць яго такім — галоўная задача і для бацькоў, і для настаўнікаў.

Нэлі ЗІГУЛЯ
Фота аўтара