— Актыўная грамадзянская пазіцыя — тое, без чаго няма цяпер паўнавартаснага жыцця, у тым ліку і для жанчыны. Быць наперадзе, калі трэба — у тыле, і рабіць сваю справу адказна і з любоўю для таго, каб жыццё навокал рабілася ярчэйшым і лепшым, — лічыць начальнік упраўлення па адукацыі адміністрацыі Ленінскага раёна сталіцы, старшыня аб’яднанай арганізацыі Беларускага саюза жанчын гэтага ж раёна Наталля Кучынская. З ёй, пераможцай рэспубліканскага конкурсу «Жанчына года — 2023» у намінацыі «Актыўная грамадзянская пазіцыя», пагутарылі пра прафесійны шлях, мэты і асабістыя якасці жанчыны-лідара.
Народная артыстка Беларусі Наталля Гайда стала сімвалам айчыннай аперэты, яе легендай. На яе і сёння ідзе глядач і дзівіцца зайздроснай творчай форме Наталлі Віктараўны, якая адзначыла сёлета сваё 85-годдзе, 65-годдзе творчасці і 55-годдзе служэння сцэне Беларускага дзяржаўнага акадэмічнага музычнага тэатра. У чым сакрэт яе творчага даўгалецця? Ці лёгка быць Наталляй Гайдай на сцэне і за кулісамі? Гэта «Алеся» і высвятляла ў размове з вядомай артысткай.
Зоя Касмадзям’янская — адна з самых вядомых гераінь Вялікай Айчыннай вайны. Пра яе подзвіг напісаны кнігі, зняты фільмы. Мноства вуліц у розных гарадах носяць імя гераічнай разведчыцы. Ёсць такая вуліца і ў Мінску.
У рубрыцы «Іх імёнамі названыя» вы прачытаеце пра Зою Касмадзям’янскую, першую жанчыну, якой было прысвоена званне Героя Савецкага Саюза (пасмяротна) у час Вялікай Айчыннай вайны.
У традыцыйнай рубрыцы «Алесі — 100: жанчыны, гісторыі, вокладкі» распавядаем пра настаўніцу рускай мовы і літаратуры гімназіі № 1 Слуцка Юлію Савановіч. На яе ўроках вучні малююць, здымаюць відэа, робяць плакаты і ставяць невялічкія сцэнкі ў класе. Так Юлія Анатольеўна стараецца прывіць дзецям любоў да слова і чытання. А яшчэ да кожнага вучня знаходзіць індывідуальны падыход:
— Мне самой прыемна і радасна, калі я раблю штосьці цікавае да ўрока, прыдумваю свой, унікальны падыход. Гэтыя ўражанні кампенсуюць усе затраты на падрыхтоўку такога матэрыялу, — прызнаецца Юлія Савановіч.
Галоўны доктар Гомельскай цэнтральнай гарадской дзіцячай клінічнай паліклінікі Таццяна Салодкая мае самае непасрэднае дачыненне да адкрыцця шэрагу паліклінік у Гомелі. Вось ужо 8 гадоў Таццяна Іванаўна ўзначальвае педыятрычную службу Гомеля і Гомельскага раёна, кіруе калектывам у больш чым 1300 чалавек, нясе адказнасць за 110 тысяч дзяцей.
Як Таццяне Салодкай удаецца знаходзіць аднадумцаў для рэалізацыі сваіх ідэй і пераадольваць цяжкасці? Чаму здароўе сучасных дзяцей выклікае клопат? Пра што павінны памятаць бацькі, калі жадаюць дабра сваім дзецям? Адказы знойдзеце ў інтэрв’ю з галоўным пазаштатным педыятрам Гомеля Таццянай Салодкай.
Намеснік дырэктара Рэспубліканскага інстытута кітаязнаўства імя Канфуцыя БДУ Лю Сулін лічыць важным развіваць міжлітаратурныя сувязі Беларусі і Кітая. Яна падзялілася з чытачамі «Алесі» сваімі ўражаннямі аб нашай краіне, расказала пра цікавасць беларусаў да кітайскай мовы і да паэзіі Паднябеснай, а таксама пра старажытныя кітайскія традыцыі і свае любімыя стравы.
Што трэба ведаць кожнай жанчыне пра сябе, каб быць паспяховай і шчаслівай? Як правільна мужчынам ставіцца да дзівосных жаночых асаблівасцяў? Нейрахірург, навуковы супрацоўнік аддзялення пухлін галаўнога мозгу РНПЦ анкалогіі і медыцынскай радыялогіі імя М. М.Аляксандрава, выкладчык кафедры неўралогіі і нейрахірургіі Інстытута павышэння кваліфікацыі і перападрыхтоўкі кадраў аховы здароўя Беларускага дзяржаўнага медыцынскага ўніверсітэта Гумен Гарбаніджад тлумачыць добра вядомыя жаночыя асаблівасці на падставе навуковых ведаў.
Прыгожыя, бліскучыя, густыя валасы — прадмет гонару любой жанчыны. Непрыемнасці з імі для многіх — сапраўдная драма. Ці можна вярнуць валасы, калі яны пачалі выпадаць? Як пазбавіцца ад перхаці назаўжды? Да якіх працэдур з валасамі варта звяртацца з аглядкай?
Пра гэта і не толькі распавяла доктар-дэрматавенеролаг, трыхолаг Кацярына Ерыгіна.
У вераснёўскім нумары вы прачытаеце таксама пра асаблівасці турэцкай кухні, карысныя якасці кабачкоў і пра асноўныя тэндэнцыі ў модзе гэтай восені. Бонус для чытачоў «Алесі» — апавяданне Валянціны Быстрымовіч «Смех за дзвярыма».
Вольга ПАКЛОНСКАЯ
Супрацоўнікі Мінпрыроды расказалі, якая карысць ад дрэў у горадзе.
Восень для спецыялістаў аграрнай галіны — час падводзіць вынікі, і сёлета яны годныя.
У поўным аб’ёме задаволена патрэба краіны ў калійных і каменных солях, торфе, сапрапелі, будаўнічым камені, падземных водах.
