Даведаліся, як у сталіцы адзначылі прафесійнае свята нафтавікоў

У першую нядзелю верасня наша краіна адзначыла Дзень работнікаў нафтавай, газавай і паліўнай прамысловасці. Прафесійнае свята — выдатная магчымасць падзякаваць. Ад працы спецыялістаў гэтай сферы залежыць якасць жыцця беларусаў. Ім мы абавязаны святлом і цяплом у дамах, палівам для аўтамабіляў. Беларускіх нафтавікоў і газавікоў павіншаваў Прэзідэнт, а таксама кіраўніцтва сталіцы.

Дзень нафтавіка, як яго скарочана называюць у народзе, вядзе сваю гісторыю з часоў СССР. І няхай у краіне няма маштабных залежаў «чорнага золата» і «блакітнага паліва», Беларусь займаецца перагонкай і перапрацоўкай сыравіны, выпрацоўваючы патрэбныя для яе эканомікі энерганосьбіты. З часоў Савецкага Саюза, на прасторах якога ў нафтавай, паліўнай і газавай сферах працавалі многія дзясяткі тысяч беларусаў, вядома: большасць радовішчаў знаходзіцца ў раёнах з цяжкімі кліматычнымі ўмовамі. І праца ў нафтагазавым комплексе прад’яўляе да чалавека павышаныя патрабаванні. Таму газавікі і нафтавікі традыцыйна карыстаюцца заслужанай павагай.

Па даных статыстыкі, больш за 70 працэнтаў нафтапрадуктаў, што выпускаюцца ў Беларусі, прама і апасродкавана экспартуецца ў 90 краін свету. Галіна забяспечвае 35 працэнтаў усёй прамысловай вытворчасці краіны і 35 працэнтаў экспарту. Больш за 25 працэнтаў паступленняў у бюджэт — адлічэнні прадпрыемстваў нафтаперапрацоўкі, нездарма яны называюцца залатой жылай краіны. Дарэчы, сёння ў газавай і паліўнай прамысловасці заняты каля 32 тысяч чалавек, яны забяспечваюць працай яшчэ больш за сотню тысяч няпрофільных прафесій па-за гэтым участкам эканомікі.

Збірацца дружнай кампаніяй у гонар прафесійнага свята стала добрай традыцыяй. У Палац Рэспублікі на мінулым тыдні прыйшлі найлепшыя з найлепшых. Для іх была арганізавана канцэртная праграма, прагучала шмат слоў падзякі за ўклад у агульную справу, за неацэнную працу, дзякуючы якой прадпрыемства «Беларуснафта-Мінскаўтазапраўка» з’яўляецца адным з лідзіруючых прадпрыемстваў у галіне. Дарэчы, прадпрыемства тройчы занесена на Рэспубліканскую дошку гонару — у 2020, 2021 і 2023 гадах.

Старшыня Мінскага гарадскога Савета дэпутатаў Арцём Цуран павіншаваў калектыў РУП «Беларуснафта-Мінскаўтазапраўка» ўручыў супрацоўнікам прадпрыемства падзякі і граматы Мінгарвыканкама, старшыні Мінгарвыканкама і Мінскага гарадскога Савета дэпутатаў.

Сёння ў Беларусі газам забяспечаны ўсе гарады, райцэнтры і большасць вёсак. Не кожная краіна можа пахваліцца такімі паказчыкамі!

Ёсць і альтэрнатыва газу — торф. Беларусь — у пяцёрцы сусветных лідараў па яго нарыхтоўцы. З торфу вырабляюць паліва і сельскагаспадарчую прадукцыю. Таксама наша краіна вырабляе якасны бензін, дызельнае паліва, мазут і іншыя прадукты з чорнага золата. Вядуцца і ўласныя распрацоўкі, з’яўляюцца новыя радовішчы.

Поспех прадпрыемства напрамую звязаны з прафесіяналізмам яго супрацоўнікаў, стараннем і добрасумленным стаўленнем да працы. Гэтыя важныя якасці заўсёды шануе і адзначае кіраўніцтва прадпрыемства. Па словах дырэктара рэспубліканскага даччынага ўнітарнага прадпрыемства «Беларуснафта-Мінскаўтазапраўка» Аляксандра Драгуна, у калектыве працуюць 1226 супрацоўнікаў, маецца 66 аўтазаправачных станцый, 26 газавых заправачных станцый, 58 гандлёвых залаў, 17 аўтамыек, пракат ровараў, прычэпаў і іншай тэхнікі.

Нафта і газ — ключавыя віды сыравіны для любой эканомікі, а іх здабыча і наступная перапрацоўка з’яўляецца стратэгічна важнай галіной. У газавай і паліўнай прамысловасці нашай краіны заняты тысячы чалавек. Прадпрыемствы галіны ажыццяўляюць работы па развіцці і эксплуатацыі размеркавальных газаправодаў, надзейным і бесперабойным забеспячэнні энергетычных, прамысловых, камунальна-бытавых спажыўцоў і насельніцтва прыродным і звадкаваным вуглевадароднымі газамі.

Данііл ХМЯЛЬНІЦКІ

Фота Лізаветы ГОЛАД