Гомель і Сургут падпісалі пагадненне аб устанаўленні пабрацімскіх адносін

Гомель і Сургут (Расія) падпісалі пагадненне аб устанаўленні пабрацімскіх адносін, перадае БелТА.

Подпісы пад дакументам паставілі старшыня Гомельскага гарвыканкама Уладзімір Прывалаў і кіраўнік Сургута Максім Слепаў падчас урачыстага прыёму афіцыйных дэлегацый гарадоў-пабрацімаў і гарадоў — партнёраў Гомеля з нагоды 882-годдзя горада над Сожам.

Як было адзначана, падпісанне прымеркавана да 20-годдзя супрацоўніцтва паміж двума гарадамі. Яно стане новым вітком у гісторыі дружбы Гомеля і Сургута, а таксама будзе спрыяць таму, што ўжо існуючыя сувязі будуць мацнець і развівацца.

«Горад уражвае, горад зачароўвае. Горад парадаваў сваім надвор’ем, сваёй прыгажосцю і чысцінёй і, вядома, ветлівасцю гамяльчан», — падзяліўся ў гутарцы з журналістамі Максім Слепаў.

«Пунктаў судакранання з Гомелем у Сургута вельмі шмат ужо на працягу 20 гадоў. Мы даўно абменьваемся дзелавымі сувязямі, культурнымі, сацыяльнымі. І кожны раз адкрываем адзін аднаго зноўку», — падкрэсліў мэр расійскага горада.

У крамах Сургута прадстаўлены вялікі асартымент беларускіх тавараў, уключаючы і Гомельскую вытворчасць. Кіраўнік перакананы, што сённяшняе падпісанне дакумента яшчэ больш паскорыць рух гарадоў насустрач адзін аднаму.

На ўрачыстым прыёме былі падпісаны двухбаковыя дакументы і з іншымі гарадамі — Азербайджана, Беларусі, Расіі. «Мы дэталізавалі і зафіксавалі ў дакументах канкрэтныя планы, канкрэтныя мерапрыемствы, канкрэтныя дзеянні, нацэленыя на канкрэтны вынік. Будзем планава ісці па гэтых напрамках», — удакладніў Уладзімір Прывалаў.

«Сёння ёсць зацікаўленасць гарадоў-пабрацімаў і ў інтэграцыі ў эканоміцы, і ў сацыяльнай сферы, і ў спорце, і ў сферы адукацыі. І кожнае прадпрыемства, кожная школа, кожны спартыўны аб’ект павінны разумець сваю ролю і значнасць у гэтых двухбаковых адносінах. Гэта прынясе станоўчы эфект», — падсумаваў старшыня Гомельскага гарвыканкама.

Прэв’ю: БелТА