Першы ў краіне Музей народнага адзінства створаны ў сярэдняй школе №1 Баранавічаў

Сярэдняя школа № 1 імя С. І. Грыцаўца самая новая ў Баранавічах. Яе гісторыя налічвае ўсяго тры гады. Столькі ж і Музею народнага адзінства, які адкрылі для наведвальнікаў 17 верасня 2021 года.​

Цікава, што ідэя стварыць музей нарадзілася незадоўга да адкрыцця школы. На рэалізацыю задуманага было не надта шмат часу. Канцэпцыю прыдумалі настаўнікі гісторыі на чале з намеснікам дырэктара школы Таццянай Маклюк. Можна сказаць, што з работай педагогі справіліся выдатна. Поспеху спрыяў яшчэ і той факт, што музей стваралі талакой. Школьнай грамадскасці дапамагалі 61-я авіяцыйная база, Міністэрства абароны, Галоўнае ўпраўленне па адукацыі Брэсцкага аблвыканкама, Баранавіцкі краязнаўчы музей. Гарвыканкам выдзеліў 10 тысяч рублёў, далучыўся і мясцовы бізнес.

— Наш музей выклікае цікавасць не толькі ў дзяцей, але і ў дарослых, — сказала дырэктар школы Марына Купцова. — Таму што народнае адзінства — гэта нашы культура, грамадзянскасць, гісторыя, рэлігія, гэта яшчэ спагада і шчырасць, дабрыня і цярпімасць. Значэнне і змест гэтых слоў мы і раскрываем у музейнай экспазіцыі. Упэўнена, што музей служыць справе выхавання вучняў у духу патрыятызму, прывівае любоў да Радзімы і да сваёй роднай мясціны, спрыяе павазе да людзей, якія здольныя ахвяраваць сабой дзеля жыцця іншых.

Наведвальнікаў, асабліва юных, у музеі прываблівае сучаснае афармленне і форма падачы матэрыялу. Выкарыстаны магнітныя панэлі, мабільныя стэнды, QR-коды, галаграфічны вентылятар, інфармацыйны барабан і іншыя дасягненні інфармацыйных тэхналогій. Усё гэта дазваляе не толькі слухаць экскурсавода, але і, напрыклад, быць актыўным віртуальным падарожнікам па рэгіёнах краіны.

Экспазіцыя складаецца з некалькіх раздзелаў. Першы называецца «У адзінстве наша сіла» і расказвае аб станаўленні беларускай дзяржаўнасці з полацкага перыяду да нашых часоў. Тут жа паказана гісторыя Баранавічаў. Цэнтральная частка музея прысвечана сучаснай Беларусі, раздзел так і называецца «Беларусь сучасная». Тут адлюстраваны дасягненні краіны, традыцыі і каштоўнасці беларускага народа, яе эканамічныя і культурныя асаблівасці. Гасцям даецца магчымасць пазнаёміцца са структурай органаў дзяржаўнай улады з дапамогай інтэрактыўнага стэнда, які круціцца, іначай яго называюць інфармацыйным «барабанам». У музеі таксама ўстаноўлены чатыры мабільныя падлогавыя стэнды, якія расказваюць аб традыцыях і дасягненнях беларускага народа. З культурнай спадчынай і карцінамі беларускіх мастакоў можна пазнаёміцца праз дэманстрацыю на каляровай мазаіцы і праекцыю на галаграфічным вентылятары.

Яшчэ адзін вялікі раздзел экспазіцыі пад назвай «Бессмяротны подзвіг „крылатых“ герояў» знаёміць наведвальнікаў з подзвігам лётчыкаў, лёс якіх звязаны з горадам Баранавічы. У іх ліку — праслаўлены ўраджэнец Баранавіцкага раёна двойчы Герой Савецкага Саюза Сяргей Грыцавец, першы Герой Беларусі Уладзімір Карват, авіятары Аляксандр Марфіцкі і Аляксандр Жураўлевіч, якія загінулі над польскім горадам Радам, а таксама Андрэй Нічыпорчык і Мікіта Куканенка, якія тры гады таму адвялі амаль няспраўны самалёт ад шчыльнай жылой забудовы і цаной свайго жыцця папярэдзілі яшчэ большую трагедыю.

Наведвальнікі музея могуць пасядзець у сапраўдным авіяцыйным трэнажоры, што з задавальненнем робяць школьнікі. Экскурсантам пакажуць гідрашлем і гідракасцюм лётчыкаў, іншыя экспанаты авіяцыйнай тэматыкі.

А два гады таму на другім паверсе школы была адкрыта вялікая зала музея, прысвечаная перыяду Вялікай Айчыннай вайны і генацыду беларускага народа.

І галоўнае, што музей жыве насычаным жыццём і актыўна развіваецца. Яго дырэктар Аляксандр Літвіновіч расказаў карэспандэнту газеты, што на базе музея працуе школьнае аматарскае аб’яднанне ваенна-істарычнага краязнаўства. Дзейнасць яго скіравана на вывучэнне гісторыі роднага краю, збор і апрацоўку інфармацыі пра ваеннае мінулае Баранавіцкага краю, правядзенне пошукавай работы. Юныя следапыты са сваім настаўнікам ужо аднавілі 36 імёнаў невядомых герояў вайны, а да гэтага невядомымі лічылася ўсяго 25 асоб. «Цяпер мы працуем над увекавечаннем іх памяці, — працягвае Аляксандр Уладзіміравіч. — Дакументы ў дзяржаўныя органы і ва ўсе зацікаўленыя ведамствы накіравалі. Працягваем пошук ужо па Баранавіцкім раёне».

Яшчэ Аляксандр Літвіновіч расказаў, што музей развіваецца ў розных кірунках. Рыхтуецца экспазіцыя старых падручнікаў: знайшлі кнігі, па якіх вучыліся равеснікі цяперашніх школьнікаў 150 гадоў таму. Адным словам, музей аб’ядноўвае дзяцей з самымі рознымі інтарэсамі і спрыяе развіццю ў іх навыкаў пошуку, аналізу інфармацыі, а значыць, пабуджае да чытання, вывучэння той ці іншай тэмы. Увесь час папаўняюцца матэрыялы існуючых раздзелаў. Напрыклад, знайшлі новыя цікавыя матэрыялы пра Сяргея Грыцаўца. А яшчэ экспазіцыя ўдасканальваецца ў плане дапоўненай рэальнасці. Цяпер з дапамогай смартфона карцінку можна ажывіць, і наведвальнік атрымае інфармацыю ў прывычнай для яго форме, што асабліва важна для юных.

За час існавання Музея народнага адзінства яго наведалі больш за 5 тысяч чалавек. Створаны YоuTubе-канал музея, з дапамогай якога можна здзейсніць віртуальныя экскурсіі.

Святлана ЯСКЕВІЧ

Фота БелТА