Качанава: Беларусь і Расію падзяліць немагчыма

Беларусь і Расію падзяліць немагчыма, заявіла старшыня Савета Рэспублікі Нацыянальнага сходу Рэспублікі Беларусь Наталля Качанава падчас сустрэчы са старшынёй Савета Федэрацыі Федэральнага Сходу Расійскай Федэрацыі Валянцінай Матвіенка. Сустрэча адбылася на палях IV Еўразійскага жаночага форума, перадае БелТА.

«Мы рады быць сёння тут, у Санкт-Пецярбургу. Я ўбачыла, наколькі гэта ўнікальнае мерапрыемства, якое аб’ядноўвае жанчын розных краін у імкненні палепшыць гэты свет», — сказала Наталля Качанава.

«Вельмі важна, што ў такі няпросты гістарычны момант у жыцці нашых краін мы разам. Нас падзяліць немагчыма, таму што гэта нашы карані, гісторыя, менталітэт і стаўленне адзін да аднаго. Нам унікальна пашанцавала, у нас цудоўныя лідары — Прэзідэнты, якія думаюць пра свае народы, пра лёс сваіх краін, і жывуць менавіта гэтым. Гэта іх жыццё, пакладзенае на алтар сваіх народаў і краін. І, вядома, мы павінны зрабіць усё для таго, каб аказваць усялякую падтрымку ў рашэнні тых задач, якія стаяць перад намі», — адзначыла спікер.

У снежні гэтага года мы будзем адзначаць 25-годдзе падпісання Дагавора аб стварэнні Саюзнай дзяржавы. «Гэта ўнікальнае рашэнне, якое было некалі прынята, сёння дае свае вынікі — гэта і рэалізацыя 28 дарожных карт, збліжэнне абсалютна па ўсіх напрамках, пагадненне на 2024-2026 гады, — падкрэсліла Наталля Качанава. — Мы маніторым і будзем кантраляваць дакладнае выкананне пастаўленых задач, бо гэта дае далейшае развіццё нашых краін».

Еўразійскі жаночы форум — аўтарытэтная міжнародная пляцоўка для дыялогу жанчын-лідараў з усіх кантынентаў і выпрацоўкі сумесных рашэнняў па актуальных пытаннях міжнароднага супрацоўніцтва, устойлівага эканамічнага развіцця, асваення новых тэхналогій, забеспячэння здаровага ладу жыцця і экалагічнай бяспекі, прасоўвання сацыяльных дабрачынных праектаў. Удзельнікі форуму — жанчыны-парламентарыі, прадстаўнікі выканаўчых органаў улады, міжнародных арганізацый, дзелавых колаў, бізнесу, навуковай супольнасці, грамадскіх арганізацый і дабрачынных праектаў, аўтарытэтныя дзеячы міжнароднага жаночага руху з многіх краін свету.

Арганізатары форуму — Савет Федэрацыі Федэральнага Сходу Расійскай Федэрацыі і Міжпарламенцкая Асамблея дзяржаў—удзельніц Садружнасці Незалежных Дзяржаў.