Валейбалісткі «Мінчанкі» атрымалі першую перамогу ў сезоне расійскай Суперлігі

Валейбалісткі «Мінчанкі» атрымалі першую перамогу ў рэгулярным чэмпіянаце жаночай расійскай валейбольнай Суперлігі сезона-2024/25, паведамляе БелТА.

У другім матчы сезона нашы дзяўчаты ў Саратаве сустракаліся з мясцовым «Пратонам». Адносна роўная барацьба разгарнулася толькі ў стартавай партыі, якую госці выйгралі з лікам 25:20. Другі і трэці сэты праходзілі пад поўным кантролем «мінчанкі»: беларускі захоплівалі лідарства з першага ж розыгрышу і ўпэўнена даводзілі справу да перамогі — абодва разы па 25:17. Вынік паядынку-3: 0, наша каманда набірае першыя тры ачкі ў сезоне-2024/25.

У дэбютнай гульні рэгулярнага чэмпіянату, якая адбылася 15 верасня ў сталічным Палацы спорту, «Мінчанка» пацярпела паражэнне ад калінінградскага «Лакаматыва» (0:3). Далей нашых дзяўчат чакае хатні паядынак супраць «Уралачкі-НТМК» з Екацярынбурга, які пройдзе 25 верасня. Усяго ў цяперашнім розыгрышы жаночай Расійскай валейбольнай Суперлігі прымае ўдзел 14 клубаў, у плэй-оф пройдзе лепшая васьмёрка.

Прэв’ю: БелТА