Даступная вытворчасць высокага ўзроўню ў Кітаі стала новым магнітам для глабальных інвестараў

Разглядаючы магчымасці, якія ўзнікаюць у выніку адкрыцця і мадэрнізацыі вытворчага сектара Кітая, транснацыянальныя кампаніі сабраліся на канферэнцыю, якая была праведзена ў рамках Сусветнай вытворчай канвенцыі-2024 у горадзе Хэфэй (адміністрацыйны цэнтр прав. Аньхой, Усходні Кітай), перадае «Сіньхуа».

Іх дыскусіі былі сканцэнтраваны на тым, як дасягненні краіны ў галіне вытворчасці адчыняюць дзверы для пашырэння глабальнага супрацоўніцтва і інвестыцый, што сведчыць аб росце прывабнасці галіны для міжнародных інвестараў. Канферэнцыя, якая стала ключавой падзеяй канвенцыі, сабрала 178 палітычных і дзелавых лідараў з 19 краін і рэгіёнаў, у тым ліку прадстаўнікоў 92 кампаній са спіса Fortune 500 і транснацыянальных карпарацый.

«Скаардынаваная лічбавая і экалагічная трансфармацыя традыцыйнай вытворчасці з’яўляецца неад’емным патрабаваннем для развіцця прадукцыйных сіл новай якасці, і гэта стварыла новыя перавагі для якаснага эканамічнага росту Кітая», — заявіў на канферэнцыі Уільям Юй, прэзідэнт кампаніі Honeywell China.

Валодаючы больш за 50-летнім досведам у вобласці прамысловай аўтаматызацыі, транснацыянальная амерыканская кампанія ў апошнія гады няўхільна нарошчвала свае інвестыцыі ў Кітай. Яе дзейнасць ахоплівае такія ключавыя галіны, як аўтаматызацыя, пераўтварэнне энергіі і авіяцыя. У ліпені кампанія Honeywell China падпісала пагадненне аб стратэгічным супрацоўніцтве з BBCA Group па распрацоўцы экалагічна чыстага авіяцыйнага паліва і іншых ініцыятыў у горадзе Бэнбу ў правінцыі Аньхой, накіраваных на падтрымку экалагічна чыстага і нізкавугляроднага развіцця. Кампанія Honeywell з’яўляецца адным з замежных прадпрыемстваў, якія пашыраюць свае інвестыцыі ў другую па велічыні эканоміку свету, што абумоўлена ростам аптымізму ў адносінах да эканамічных перспектыў Кітая і прызнаннем высокага ўзроўню адкрытасці яго вытворчага сектара.

Па даных Міністэрства камерцыі КНР, за восем месяцаў 2024 года ў Кітаі было створана 36.968 новых кампаній з удзелам замежнага капіталу, што на 11,5 працэнта больш, чым за аналагічны перыяд летась.

За гэты час аб’ём фактычна выкарыстаных прамых замежных інвестыцый (ПЗІ) у кантынентальную частку Кітая склаў 580,2 млрд. юаняў (каля 82,1 млрд долараў). Высокатэхналагічны вытворчы сектар прыцягнуў 12,4 працэнта, або 72,1 млрд. юаняў, ад агульнага прытоку прамых замежных інвестыцый, што на 1,9 працэнтнага пункту больш, чым за аналагічны перыяд мінулага года.

Акрамя таго, раней у гэтым месяцы Дзяржаўны камітэт па справах развіцця і рэформ КНР аб’явіў, што абмежаванні на замежныя інвестыцыі ў вытворчы сектар будуць знятыя. «Гэтая палітыка не толькі дэманструе пазітыўнае імкненне Кітая да пашырэння міжнароднага супрацоўніцтва, але і ўмацоўвае ўпэўненасць прадпрыемстваў з замежным капіталам, у пастаянным пашырэнні сваёй прысутнасці на кітайскім рынку», — адзначыўў Тамаі Такешы, намеснік генеральнага дырэктара кампаніі Mitsubishi Electric /China/ Co., Ltd.

Па меры таго як Кітай паскарае развіццё прадукцыйных сіл новай якасці і ўстойлівай вытворчасці, замежныя прадпрыемствы ўсё часцей разглядаюць гэтыя дасягненні як рэальныя магчымасці. А інтэграцыя ў мадэрнізацыю вытворчасці ў Кітаі стала тэндэнцыяй сярод міжнародных фундатараў.

«Кітайскі рынак развіваецца. Надаючы асаблівую ўвагу патрэбнасцям кітайскіх кліентаў, кампанія Volkswagen імкнецца да работы „ў Кітаі для Кітая“ дзякуючы паўнавартаснаму мясцоваму навукова-даследчаму цэнтру і трывалым партнёрскім адносінам на месцах», — сказаў Томас Ульбрых, тэхнічны дырэктар кампаніі Volkswagen Group у Кітаі.

Аптымізуючы свае працэсы даследаванняў і распрацовак і падаючы больш паўнамоцтваў для прыняцця рашэнняў на мясцовым узроўні, кампанія Volkswagen імкнецца скараціць час вываду прадукцыі на рынак на 30 працэнтаў, сказаў Томас Ульбрых, расказваючы на канферэнцыі аб планах развіцця кампаніі на кітайскім рынку на бліжэйшыя некалькі гадоў.

Згодна з інавацыйнай справаздачай Гандлёвай палаты Германіі ў Кітаі за 2024 год, якая была апублікавана ў гэтым месяцы, нямецкія кампаніі ў Кітаі падвойваюць намаганні па лакалізацыі інавацый, каб павысіць канкурэнтаздольнасць і ў большай ступені выкарыстоўваць КНР у якасці інавацыйнага цэнтра для выхаду на сусветныя рынкі.

«Нямецкія кампаніі інвесціруюць у мясцовыя інавацыі і пашыраюць стратэгічнае партнёрства з кліентамі і пастаўшчыкамі, каб заставацца канкурэнтаздольнымі ў напружаным і дынамічным рыначным асяроддзі», — сказаў Марцін Клозэ, выканаўчы дырэктар і член праўлення Гандлёвай палаты Германіі ў Паўднёвым і Паўднёва-Заходнім Кітаі.

«Замежныя інвестыцыі ў галіны прамысловасці Кітая будуць садзейнічаць трансгранічнаму прытоку капіталу, талентаў і тэхналогій, а таксама міжнароднаму абмену ў галіне навукі і тэхнікі. Гэта дапаможа стварыць больш адкрытыя і інавацыйныя экасістэмы ў Кітаі, яшчэ больш раскрыўшы патэнцыял эканамічнага развіцця краіны», — сказаў Лю Цяа, дэкан Школы менеджменту Гуанхуа Пекінскага ўніверсітэта.